LUUKA 7:17-48

¹⁷Dhali gwo yansan gom a’di mo tani a’di yaki’d ki lala’th mo e bampa/ gi ’Kwani Yahuudiyya ’baar mo dhali eya ris bampa/ kun ’kon ka kukul is mo be.

¹⁸Dhali imanciḵa Yohaan gwo uni ṯorki a’di gwo mo goma ris to gwansan mo be.

¹⁹Dhala Yohaan yuḵki imanciḵ gwom piti isu/ mo mmohash uni mo e Tap̱a mo mmo/o gwo mo ki: A/e ta a’di jin midi yayu/ mo ’taa? Walla aman mina hil jaŋ kamu/ mo?

²⁰Dhali ki ’kwani p̱u’dkin mo e a’di mo tani uni o a’di gwo mo ki: Yohaan jin ta’da manmiiya mii ki yi’de/ mo tani a’di hashki am i /e mo mmo/o gwo mo ki: A/e ta a’di jin midi p̱u’du/ mo ’taa? walla aman mina hil jaŋ kamu/ mo?

²¹Dhali e mo c̱aan mo tani a’di wac̱ki ’kwani ka ris mo kun ’kosha ’ba’th mo dhali kun doru ki isa nyor mo dhali ka rum thus kun nyo/on mo dhali ’kwaniny ja’da/ ka ris woṯẖkina a’di mo mmomish mo mo be.

²²Dhali a’di ki thoḵ uni gwo mo ki: Iiku/ mo ma dhali ṯora Yohaan gwo mo gom to kun p̱arkina um e mo dhali ciḵ mo be ki ’kwani kun tana ja’da/ mo bu’thki momish mom buni mo dhali ’kwani kun ta ŋwol mo tani iin ki sho’k mo dhali uni gun ’kosha monthus mo tani dhelelkunu is mo be dhali uni kun tana ’diye/ mo tani ciḵki gwo mo dhali uni gun wukin mo tani cukunu mis mo dhali uni kun hatha’ko’d mo tani tanki gwom ’boro’d jin c̱ikunu uni mo be.

²³Dhali mom’bor mii gom a’di jin diki gam to jin kol a’di mo e aha/ mo be.

²⁴Ki ’kwani kun hash ma Yohaan iikin mo tani a’di ṯelki gwo ’pen mo mmo/owa waambuhany ’kwani gwo mo isi gwo goma Yohaan mo ki: Atinta i/iikina um ka pije/ mo e mombwaasho mo mmohil mo? Apil jin yiḵinkina ’tham is mo ’taa?

²⁵Atinta i/iikina um ka pije/ mo mmop̱ar e mo? Wathi/ jin hithi burrinye/ jin na’bula/ na’bul mo ’taa? Hili mo mo ma uni gwansan kun ’kokin mo mmohi’th burrinyeny jaro/ jaro/ mo dhali mmo’ko ’kom ’penkap̱an mo tani uni ’kon mo e gu’b ma maliḵ mo be.

²⁶Atinta i/iikina um ka pije/ mo mmop̱ar e mo? Amanc̱i gwo ma Arumgimis kadhamo/ mo ’taa? Nye, aha/ ṯora um gwo mo dhali amanbola manc̱i gwo ma Arumgimis kadhamo/ e mo.

²⁷A’di yansan ta a’di jin ’kwarkunu gwo mo ki: Hili mo mo ma. Aha/ hashkina agum bway pem nṯwa/a/ e jis/em pini mo, a’di jin midi thoson bway pini nṯwa/a/ gom /e mo be.

²⁸Aha/ ṯora um gwo mo ki: E bwaman uni gwansan kun dhodhu mo e bwam up̱ mo tani jan ṯal ’deŋ kamu/ yisa di’da jin ca’d jin bolki’da Yohaan e mo hili isi ciki/ a’di jin p̱isi’d mo e Bampa/ ma Arumgimis mo tani a’di i/eḵki’d ki a’di mo be.

²⁹(Ki uni ciḵki gwo gwansan mo tani aris ’kwani ’baar mo dhali imantera thulp̱a/ karkina Arumgimis ki a’di jin ta jaŋ ḵar/e mo mmomiikunu uni ki yi’de/ mo ki mii yi’de/ jin miikin ma Yohaan mo be.

³⁰Hili ’Kwani P̱arisiyiin dhali imanmisha jo’d gwo mo tani uni ki p̱uu gwo jin di’da Arumgimis mbwa mo gom is buni mo mmo’koki miiya mii ki yi’de/ ki a’di mo be.)

³¹’Kwani ma nyaḵum yil gwansan mo tani miga/ dhu uni ka p̱ar ’ban kata mo? Uni wana e kata mo?

³²Uni wana e ki uc̱i gun ’kon mo e mo ma suug mo dhali yuḵa yuḵ ka rem ’kup̱ mo ki: Am p̱ina athele/ gom um mo dhali um ’koki sa mo be. Am gwona mo mmomiiya c̱inthar mo tani dhali um ’koki ko ki kony jwa mo.

³³Haala Yohaan jin ta’da manmii ki yi’de/ a’di p̱u’dki’d mo mmodiki shwa tonṯe/ mo dhali mmodiki p̱i yimana mura’th jin ḵa/u ki ŋah ŋah mo dhali um o gwo mo ki: A’di ta’d ga ruma ’cesh mo be.

³⁴Ya/ gi ’Kwani a’di p̱u’dki’d mo dhali shwa to mo dhali p̱i to mo dhali um o gwo mo ki: Hili mo mo ma. Amanshwana ṯe/ anyor mo dhali aman’kosh ma su mo. A’di jin ta’da mugu gi imantera thulp̱a/ mo dhali imanmii miinthus mo.

³⁵Hili moyuḵ a’di karu ka ḵar/e mo ki uc̱i ma yimi ’baar mo be.

³⁶Wathi/ ’deŋ kamu/ ’peni ’Kwani P̱arisiyiin a’di doṯki a’di mo mmonyaḵ to shwa ki a’di mo dhali a’di cic̱ki gu’b gi Wathim P̱arisi mo dhali a’di c̱a’bki’da tharabeesa mo be.

³⁷Dhali hili mo mo ma, a’boma kamu/ ’peni ’peŋkuman bampa/ yan mo a’di ta’da manmii miinthus mo. Ka yim da/arki gwo ki a’di c̱a’bki’da tharabeesa gi gu’b gi Wathim P̱arisi mo tani a’di guyi’d turaŋ gasaas jin ta gi kush jin din ma yina ’borga/ mo.

³⁸Dhali a’di ki doshi bwamp̱o/ a’di isho’k piti mo. A’di ki ko mo. A’di ki ṯel mii ’pen mo mmoli/ a’di sho’k ki jabu’th em piti mo dhali a’di ki shumuṯ uni ka mur ’kup̱ ma yim mo dhali a’di ki p̱i sho’k piti ’twa/ mo dhali a’di ki ’kosh uni ka yina ’borga/ mo be.

³⁹Dhali ki Wathim P̱arisi jin yuḵki a’di mo p̱arki a’di e mo tani a’di o gwo e is piti mo ki: Waḵki/ wathi/ yan ta’da amanc̱i gwo ma Arumgimis kadhamo/ mo tani a’di midi ’taki nyiṯẖ mo mo ka ’bom yansan si’da/ ta’da ’bom jana mo jin taki a’di is is ki me’d mo haala yim ta’da manmii miinthus mo be.

⁴⁰Dhala Yesus thoḵki gwo mo dhali o a’di gwo mo ki: Simaan, aha/ tana gi gwoŋ kamu/ mo mmo/o /e mo. Dhali a’di ki thoḵ a’di gwo mo ki: Katinta mo Manṯor Gwo mo?

⁴¹Wathin ’deŋ kamu/ ta’d gi ’kwani su/ mo kun ’kon ma mure/ m’ba/ mo. Jan ’de/ din ma mure/ ma riyaal iss ’kwanimpa ka ḵarpaci ’ba/ mo dhali jamu/ ka riyaal iss wathimpa mmota iss ’de/ i’ce’dka ’kume’d mo.

⁴²Ki uni mol to c̱i ka nyaŋ’ko’d mo tani a’di ki dhal uni su/ ’pen mo ka mure/ i’ba/ mo. Shwane/ jana ’peni bwam uni midi en a’di ki nyanye/ mo?

⁴³Simaan thoḵ a’di gwo mo ki: Jan ’de/ jin ṯoshka/ mo ki a’di jin dhalkunu amure/ ’pen mo ki nyanye/ mo. Dhali a’di ki o a’di gwo mo ki: /e o gwo ki ’bore/ mo be.

⁴⁴Yan’ko’d a’di ki ṯu’k ’kup̱ ka ’bom mo dhali owa Simaan gwo mo ki: /e mishkina ’bom yansan mo ’taa? Aha/ cic̱kina gu’b pini mo tani dhali /e diki c̱i aha/ yi’deŋ kamu/ mo ki sule/ mo gom sho’k pem mo. Hila yim a’di ki li/ aha/ sho’k pem ki jabu’th em piti mo dhali shumuṯ uni ka mur ’kup̱ piti mo be.

⁴⁵/e diki c̱i aha/ momp̱i ’twa/ ki sule/ mo. Hili ’pena tee ki aha/ p̱u’dkina mo tani ayim diki daḵ mo mmop̱i sho’k pem ki ’twa/ mo be.

⁴⁶/e diki ’koshaa/ ’kup̱ pem ka yin mo be. Hila yim a’di ’koshki aha/ sho’k pem ka yina ’borga/ mo be.

⁴⁷Wakan aha/ ṯorkina /e gwo mo ki miinthus ma yim kun takina ris mo tani uni dhalkunuwa yim ’pen mo haala yim enki’da en ki nyanye/ mo. Hili a’di jin dhalkunu miinthus ’pen ki gwa’de/ mo tani a’di enki’da en ki gwa’d gwa’d mo be.

⁴⁸Dhali a’di ki owa yim gwo mo ki: Miinthus pini dhalkunu /e ’pen mo be.