Lucas 7:17-48

¹⁷jaska Jesúsun axu ninkabain Judea mai pakeanuabu inun mae betsa betsapa anuabundi yuiaibu bana ninka akeakenibukiaki.

¹⁸Nashimanika Juan bichiti jiwe anu jiwea jaska Jesúsun akubainaikidi jawen tsumabu Juanki chanikubainaibu

¹⁹ninkatan jawen tsumabu dabe kenaxun jatu yunukin: —Jesús anu kaxun: “Mekenika Diosun nukun xenipabu yubani chanima juxanaidan, ¿min jabiamen? ¿Betsa daka nun manai?” akin ea yukaxuntankanwen— iwanan, jatu yunua

²⁰buxun isin betsa betsapa teneaibu xuxawakin yushin chakabu betsa betsapa kainmakin bekun inun bexuxbu uinmakin Jesúsun jatu kaya wapakeaya Nashimanika Juanki chiti ika dabe Jesús anu kaxun jaska wai bechitan atimas jaki nukutan betsan yuikin: —Mianu Nashimanika Juanen nuku yunushinaki. Mekenan Diosun nukun xenipabu yubani chanima juxanaidan, ¿min jabiamen? ¿Min jamadaka? ¿Betsa daka nun manayuai?— aka

²²ja dabe shinanmakin Jesúsun yuikin: —Jawada uinkin man ninkakubainaidan, jaska Juanki chaniditankanwen, eskaibudan. Bekun inun bexuxbun uiainbu inun, jaska mapuisbuma mapuaibu inun, jabu bichiki dasibi chami betsani jaki dakemisbu main sakada iki keyuaibu inun, patabun ninkakin keyuaibu inun, mawa ana besteainbu inun, jabu yumainbu jatun paxati kakape ninkatan benimaibudan, jaska Juan yuitankanwen.

²³Tsuanda ea ikunwain jawen shinan chakabui chintuinsmadan, chanima benimaxankanikiki!— jatu wa

²⁴Juanen jatu yunushina iwani ana chintunbainabun ja dapi mapubaunabu Jesúsun Juankidi jatu yui taewakin: —Janu tsua jiweabumanuadan, ¿jawa man uintantanimamen? Tawa pei niwen bubi bubi wai keska wakin ¿junin jawen shinan betsa betsapa maewa akeakeimamenkain?

²⁵¿Jaskamen? ¿Jaskamadaka? ¿Jaskada jakidi kaiain man uintantanimamen? ¿Junin tadi pepa sawea daka? Tadi pepa sawea benimai beyusidan, mabu akunjaidayabu jatun xanen ibun jiwe jawendua anu besti jiwea ikaibu man uintidubuki.

²⁶Jaskakenan, ¿jawa man uintantanimamen? ¿Diosun jancha yuixunikamenkain? Jaki. Juanan, chanima Diosun jancha yuixunikaki. Ja inun, yuixunika betsabu Diosun yununi Juanen ma jatu binuaki.

²⁷Ja inun, Diosun jawen bake nichinkatsi Juankidi yuikin: ‘Ninkawe. Janu min kaxanun jau pewai kanun en jancha yuixunika betsa bebunkidi en yunuxanaii, en mia nichindiamadan’, akin jakidi jawen kaka kenenibuki.

²⁸Chanima en matu yuiaii. Yuda dasibibun Dios dayaxunkin tsuan Juan binuama ibianibun janu Epa Dios xanen ibuaitian ikunwainbu jaki dasiabu bexmasjaidabiabun Juan binuxankanikiki— jatu wai

²⁹Jesúsun jancha ninkakin jabun Nashimanika Juanen jancha ninkatan shinan betsa waibu jawen unanti wakin Juanen jatu nashimaimawen taexun yudan kaian inun romanon xanen ibu pei bixunikabun yuikin: “Chanimaki. Jawada Diosun akaidan pepaki”, iwanan, shinan akeakeaibun

³⁰jakia judio fariseobu inun Diosun jancha kenenibu yusinananmisbun Juanen jancha ninkama inun jawen unanti nashimati danainmabuwen taexun Diosun jabudi duawapanan danainmabun

³¹Jesúsun ana jabianudi jatu yuikin: —Nukunabudan, ¿jaskada shinain imisbumenkain? Matu yuinun ninkakanwen.

³²Mae namakis jemaintin anu beyuskin jatun ibubu imis mawai bake mishtinbu xuku dabea tsauxun xuku betsan yuikin: “Tepe dewe nun mawabiaya benimai man nawamaki. Janua nun kaxei ikaskin nun nuiti nawa mawabiaya man kaxamaki”, jatu wabu jawawenda beyusti unanbuma keskabuki, nukunabudan. Matun shinan chankanti jubiaken man benimamaki. Jamen matun chakabu shinain kaxakatsi ikama man shinan betsa waismaki.

³³Eskaki, matu yuinun ninkakanwen. Ja dukun Nashimanika Juan juxun matu yusinkubainkin misi pepa piama vino paepa akama matube beyusamaken jakidi janchakin: “Yushin chakabu jayaki”, iwanan, man yuia akeakeimaki.

³⁴Janua eadi matun Juchi Kayabi Iyua juxun misi pepa pikin vino paepa aki en matube nawabiakunkainaya ea yuankin: “Uinwen. Pikeki. Paenkin romano pei bixunika chakabubu inun yuda chakabu betsabu jaibu wamiski”, ikin man eadi yuanmiski.

³⁵Jamen nuku dabe nun pepabiaken Diosunabu kayabibu besti unanepakin jabun nukun yusian ninkatan nuku chibankanikiki— jatu waya

³⁶januxun fariseo betsa jawen kena Simón jawen jiwe anuxun Jesús pimakatsi chanima jawen jiwe anu Jesús ka pikatsi ixkexkanan dakai baxti ibaunxun piaibun

³⁷jabia mae anuadi ainbu jininipan Jesúsun piai ninkatan xeni jene ininipa kadujaida nenkati juxupa bishtuki bexun

³⁸june Jesúsun tae dapi danti itan jawen chakabu shinain juinti nishmajaida june kaxakin jawen beun jene besti Jesúsun tae pechiki tuis tuis axun jawen bu chaipawen jutekede atan jawen tae petsu petsu akin keyutan xeni jenewen jawen tae cha akaya Jesúsun unanbiakin uianmaken

³⁹Jesús jatun iatun uintan Jesúskidi shinankin: “Dios nuku yuixunika kayabitunan ja ainbun jawen tae meaidan ainbu chakabukunkainmis unankeanaii”, ikaya

⁴⁰Jesúsun jawen shinan unantan medabewakin yuikin: —Simóon, ¿jawada mia yuipa?— aka fariseon yuikin: —Ea yuiwe, yusinaan— aka

⁴¹miyuiwen Jesúsun yuikin: —Juni dabetan juni betsa anua pei biyuimabu dibiabuki. Betsan 500 xaba daya pei dibiken betsandi 50 dibiaki.

⁴²Ja dabetun jania pei bixun pakatidubumaken juni betsan ja dabe pei inanyuima dibiabu jatuwen nuikin ja dabetun dibia jatu kenatan jakimashinaki, ana shinanmadan. Jaskaken ja dabetanan, ¿jadatutun ja jatun pei inanyuima bechipaijaidaimenkain, betsa binunkinan?— aka

⁴³fariseon yuikin: —En shinanan, ja midima jakimawashinatun bechipaijaidaikiki— aka —Chanimaki. Min yui kayabiaii— iwanan

⁴⁴Jesús nasauketan ainbu uinkin Simón yuikin: —Na ainbun ea duawaidan, ¿min uiain?— iwanan —Min jiwetan en jikiai jaska wamisbu keska wakin juchukiti unpax min ea tsaunxunama ibiaxuken na ainbun jawen beunwen ea juchuxun jawen buwendi en tae ea jutekede axuki.

⁴⁵Ja inun, ea beya wakin min ea tantsu akamaken mia anu jikia en dakaken na ainbun besti ea beya wakin en tae petsu petsu akin jeneamaki.

⁴⁶Ja inun, ea beya wakin xeni teipa ininjaidawen en bu min ea macha akamaken xeni jene ininjaidawen jatun en tae cha axuki, ea beya wakinan.

⁴⁷Jaskaken ewen nuikin ea bechipaijaidaiwen taexun jawen chakabu midimabiaken ma en buaxuna min unantiduki. Jamen tsuanda chakabu eskadabes nun buaxuna mawaida ea inun en Epa shinankin midinwanmisbuki— iwanan,

⁴⁸ainbudi yuikin: —Epa Dios en mia daewaxunxuki, min chakabu mia buaxuntan jau ana shinanyamanunan— akaya