1Dedeng Kirenius daid gubernur se Siria, lahing tuan Agustus sa puting prenta mes elia, “Totoang atuil man hutu-atan deng pamarenta Roma la in kuasa ngas, musti pait oen ingu-mana las le muid in sensus!” Pamarenta Roma la in kaih un hutu-atan nas laih hmunan na ka, na.
3Tiata atuli las totoang pait oen ingu-mana, le muid sensus.
4Lam dedeng na, Yusuf daad se iung Nasaret ne propinsi Galilea. Un neleng Maria, man behe son. Yusuf na mo laih Daud in hua-koet, tiata un musti pait lako laih Daud kota la, Betlehem, ne propinsi Yudea le muid sensus. Undeng na le oen duas bok lakos se kota Betlehem.
6Oen lakos lius se luas nesang lo kam, Maria oras in hua ka maa lisu.
7Mo se na, oen haup kamar se um in hani ngas lo. Tiata oen tamas lakos se okat mesa. Kon nam Maria hua Ana hmunan na, Aan biklobe. Hidim oen duas losen nini kitu, le nene laok se hmukit tas poo ka.
8Duman na, atuil in lolo-poa hmukit at ila lo, melang le doh oen laen nol lae-blai las se epe mesa, se kota la likun na.
9Nahkiut tuun nam, oen ngat net Ama Lamtua Allah ima-ii mes deng sorga. Hidim Ama Lamtua langa ka kaloe pukiu one, kon oen lii isi.
10Mo ima-ii na tekas noan, “Mi lii deken, le hii babanan ne! Ta auk maa le tek mi deng dais banan mesa. Totoang atuil in ming haup dais ni ngias, taon elola ko dalen kolo.
11Dais banan ni isin na elia: Leol ni bihatang mes hua Kristus son, ne Betlehem, laih Daud kota la! Kristus na mo, Atuling man Ama Lamtua Allah in hid meman son, deng lolo hmunan nua ka. Ama Lamtua tunang Un maa le bel boa-blingin atuli li deng oen in kula-sala ngas! Una, man mam atuli li haman noan, ‘Lamtua!’
12Mam mi in taan Una ka elia: mi tutnaal tana-ana blutu mea mesa, man losen nini kitu. Un nini ne hmukit tas poo ka dalen.”
13Un tek hidi ela kon, nahkitu lam Ama Lamtua Allah ima-ii deng sorga mamo isi maas le nakbuan nol una. Hidim oen naka Ama Lamtua nini in tao dani noan,
14“Kaim nikit sakeng Ama Lamtua Allah ngala ka lapa-lapa! Un man daad le kil bandu se apan man lapa dui hihidi kua. Ama Lamtua Allah le tao daem atuli-atuil in se dale-dapang nias, man tao Un dalen kolo ngas!”
15Hidi nam, Ama Lamtua ima-ii las pait lakos sorgas. Kon atuil in lolo-poa ngas tek apa noan, “Hoe! Maa le kit laok Betlehem, le tinang tana-ana mea na le! Ta Ama Lamtua tek kit dehet na son nan.”
16Kon nam oen lalaba tuun lakos bus el Betlehem. Lius se luas kon oen tutnaal Maria nol Yusuf. Oen kon ngat net Tana-ana blutu mea na, nini se hmukit tas poo ka dalen.
17Nikit oen ngat net Tana-ana na kon, oen dehet noan, “Apin Ama Lamtua Allah ima-ii deng sorga tek kaim son deng Tana-ana nia!” Hidi nam oen dehet beles totoang asa man oen in tutnala ka.
18Ming atuil in lolo-poa ngas in dehet ela ka kon, oen totoang herang-herang.
19Mo Maria pesang totoang in dading nas se un dalen na. Nol un nangan ete-ete le nuting nahin na elola.
20Hidi kon atuil in lolo-poa ngas pait lakos oen laen nol lae-blai las. Oen nikit sakeng Ama Lamtua Allah ngala ka lapa-lapa. Oen nodan mamo se Una, undeng oen in ming nol in neta ka, tom nol asa man Ama Lamtua ima-ii la in teka ka.
21Hua hidi Tana-ana na lelo palu lam, oen sunat muid upung Musa atorang nga. Kon Un ina-aman nas ngali, ‘Yesus’. Ngaal na ka, ngaal man ima-ii in deng sorga ka in tek oen son, se oras Un ina ka in beeh Un lo bii ka.
22Muik atorang mes deng upung Musa, man tek noan, bihaat man hua hidi nal lelo buk aat ta, musti laok tao muid hadat in hiti-lingin, le tao niu apan se Um in Kohe-kanas Tene ka. Nini ela lam, oen boel in taam se Um in Kohe-kanas sa pait, el in biasa ka. Tiata Yusuf nol Maria lakos kota Yerusalem, le tao muid hadat na. Kon oen kil nol Yesus, man ana blutu mea nabale, lako se Um in Kohe-kanas Tene ka dalen, le sao Un daid Ama Lamtua nena.
23Oen tao muid Ama Lamtua atorang man tek noan, “Bihaat in hua aan hmunan na, eta aan biklobe lam un musti sao tana-ana na le daid Ama Lamtua nena.”
24Eta sao tana-ana na bel Ama Lamtua muid Un atorang nga lam, un ina-aman nas musti bel tiul-tuan ina-lakin, tamlom hmuktai ana dua, le daid in tunu-dadung. Tiata Yusuf nol Maria daek muid atorang na.
25Dedeng na, muik blalan mes ngala Simeon, daad se kota Yerusalem. Un nam mo, atuil in dalen lolo nol kom isi le net Ama Lamtua. Ama Lamtua Koo Niu ka tek un son noan, mam un net Kristus le, halas-sam un mate. Kristus na, man mam bel boa-blingin atuil Israel las.
27Leol na, Ama Lamtua Koo Niu ka pel nol Simeon lako Um in Kohe-kanas Tene ka, tom nol Yesus ina-aman nas in kil nol Un lako se la, le sao daid Ama Lamtua nena ka.
28Ngat net Tana-ana na kon, ama Simeon simun le kokon, hidim un naka Ama Lamtua Allah, le tek noan,
29“Naka Ama Lamtua! Ta Ama Lamtua daek muid asa man Un in hid au ka son. Tiata Ama Lamtua bisa sao auk tia, le halin nam auk mateng nol babanan,
30ta auk net Atuling man Ama Lamtua tunang maa, le bel boa-blingin kaim deng kaim in kula-sala ngias sa son!
31Ama Lamtua pake Tana-ana nia, le bel boa-blingin bangsa-bangsa lias totoang.
32Mam Un banansila el langa in kaloeꞌ, man kil in todan bel Ama Lamtua bangsan Israel las. Un kon banansila el langa, man tulu Ama Lamtua lalan na bel totoang bangsa didang ngas sa.”
33Ming ela kon, Yusuf nol Maria herang isi nol asa man ama Simeon in aa deng oen Anan na ka.
34Hidi nam, Simeon aa le bel oen hangun. Un kon tek Maria noan, “Yesus mama! Mam atuli hut mamo se Israel hutun soleng maam Ana kia. Mo oen in tao saol Una ka, mam tom bali one. Maam Ana ki kon, tao atuli hut mamo dalen kolo.
35Nini ela lam, mam Ama Lamtua tek tulu-balang totoang atuli li dalen in banan-daat ta. Mo ku, Maria, mam haup in susa-daat ngele, banansila el suli in hai tama lako se ku hupum ma ka.”
36Se Um in Kohe-kanas Tene ka kon muik blalan bihatang mesa, ngala Hanaa. Un umur buk palu beas aat son. Un ama ka, ngala Fanuel deng ngaal Aser. Un saap hidi taun iut kon, un sapa-bikloben na mate nang una. Upung Hanaa nam mo, Ama Lamtua Allah mee-baha. Un in daek lelo-duman na, kohe-kanas nol telang se Um in Kohe-kanas Tene ka, le todan-lahing Ama Lamtua Allah.
38Dedeng Simeon in aa nol Yusuf duas Maria ka, blalan bihatang na maa dadani le hii one, kon un naka-naka Ama Lamtua Allah. Hidi nam, un aa deng Yesus apa ka, bel totoang atuil in nata-natang Lahing man Ama Lamtua hid son, le tunang maa halin sao puting bangsa Israel las sa.
39Daek muid upung Musa atorang ngas totoang hidi se kota Yerusalem kon, Yusuf nol Maria pait lakos propinsi Galilea, se oen ingu la, iung Nasaret.
40Kon oen Anan Yesus tene maa, Un apa ka kuat-tes, hidim Un taan taplaeng, nol Un kon nangan taan dasi mamo. Ama Lamtua Allah kon tulu dalen banan na bel Una.
41Taun-taun nam, Yusuf nol Maria lakos kota Yerusalem, le muid fesat Paska se las.
42Oe mesan na, dedeng Yesus umur taun hngul dua kon, oen leo-leo lakos se Yerusalem le muid fesat Paska el in biasa ka.
43Lelo-leol Paska las mana le hidis kon, Yusuf nol Maria pait lakos el Nasaret, leo-leo nol atuil hut mamo man in pait lakos Galilea ngas. Mo oen taan lo, molota Yesus dada bii ne Yerusalem. Oen bali le Un laok leo-leo nol Un tapan nas. Mo didiin lelo-maun kon, oen net Un lo. Tiata oen lako-pait le nuting Un se oen nenan nas nol oen tapan nas.
45Undeng tutnalan lo, tiata oen pait lakos Yerusalem le nuting Un se lua.
46Lakos lius se uas kon, oen nuti-nuting Un didiin lelo tilu, halas-sam tutnalan se Um in Kohe-kanas Tene ka dalen. Un daad le keket-ketan nol guru-guru agama Yahudi las.
47Totoang atuil in ming Yesus sas hera-herang, undeng Un nangan taan isi baktetebes, isin deng Ama Lamtua Allah in Dula ngas. Un kon siut nal oen in ketan Una ngas nol banan.
48Net ela kon, Un ina-aman nas nahkitu nol herang. Hidim Un ina ka tek noan, “Yesus! Tasao le Ku tao sus kaim eli lia? Auk nol Ku amam mi net lalan lo nol kaim nangan Ku isi, hidim kaim lako-pait pukiu le nuting Ku!”
49Mo Yesus siut noan, “Tasao le maam nol paap susa-kae in nuting Au kia? Mi taan esan tuun! Auk muik in dake ne Auk Amang ngi Uma.”
50Mo oen nangan taan Un in aa na nahin na isi lo.
51Hidi nam oen tilus pait lakos Nasaret. Yesus muid Un mama nol papa in prenta ngas. Kon Un mama pesang dais nas totoang se un dalen na.
52Yesus tene le maa, Un koon na tuan nol kil taan apa ka keko lako. Ama Lamtua Allah nol atuli li kon namnau Una.
