1Sisa Okasatasa bala Lomo tane gapomane akali kawane ateane-angi, balato mana mindi yata wato, yuu pitakana atalaini wandakali tupa yakamana yuu tene tupana poto, gene yalapape leaipia. Akali Saitiniasa lene oko bala Sitiya potopinja okona gapomane akali kawane ateane okone angi bulupane tewa, wandakali pitaka yakamana gene yoyale, yakamana yuu tene tupana puku peainipia.
4Josepe bala kiŋi Dapiti yamena mandiyene mindi ateaipia. Jutiya disitiki tano Beselekeme Dapitina yuu tene oko yaepia. Tene okonena, Josepe bala bakale lene wana mapokae Matiya towa atu Galili disitiki tano Nasatesa oko tepa alu, liyambana gene Beselekeme tano okona yolo peapelepia. Matiya bala andopane mandipe-pene petea-kola, liyamba peapelepia.
6Peapi-kola, wandakali opene epo paliyaini anda tupa pitaka tumbi lea-kola, liyamba bulumako anda mindina poto, peteapele-pia. Anda okonena peteapi-kola, Matiya bala andopane mandulane gii oko epea-kola, balana iwana bulupane oko mandeaipia. Manduto, Matiyato andopane okone lapalapa-mane kau puato, bulumako tomo nalaini bokisa mindina yata yaepia.
8Yuu ongane teke utulu okona yia sipisipi yatawa atalaini akali minditupa-mane yakamana yia sipisipi tupa yuu maliwa mindina yatawa ando ateainipia.
9Ateai-kola, Gotena enjole mindi akali utupane ateainga epea-angi, Gotena tii-pene okomane akali utupanenga tii pikoyo pea-kola, akali utupane-mane okone andoto, yuku andane wete yainipia.
10Yuku yai-kola, enjole okomane utupane lamawuato, yakama yuku naene kondalapa leaipia. Andipa Dapitina tano okona pituto, wanda mindimane yakama molo-peke lolane iwana oko mandiya. Iwana okonena gene oko Kataisa. Bala nanimana Akali Andane. Nambato pii epene oko yakama langulu epeyo okomane wandakali pitaka mo epele aya olopeya.
12Yakamato iwana okone ayia pima poto andolai-kola, bulumako tomo nalaini bokisa mindina bala lapalapa-mane kau pitane pangulanga andolopeyai. Iwana okone andolai-angi, pii nambato leyo okone enene ya lo yakamato nembo tolopeyai leaipia.
13Enjole okomane pii okone lo koyo pea wete, enjole kambua wete ati kenga atala, kapoyale epoto, bala towa atu atoto, Gotena gene oko laiyu lo, tama peainipia.
14Tama puato, Gote ati kenga ateya okomane wandakali balana yame ateakale lo lata yane tupa towa epele wato, yakamana yamapane mo epene pale leya-ko. Balana gene oko laiyu lo atalapape leainipia.
15Enjole utupane ati kenga peke leai-kola, sipisipi yatawa atalaini akali tupamane yakama teke-teke pii lalawa puato, mangene mindi piya lo, Goteto nanima lapanawa langiya oko nanimato Beselekeme tano okona andolo maa leainipia.
16Wuane lalu, akali utupane taimane poto andeai-kola, Josepe Matiya-lamane iwanaŋa oko bulumako tomo nalaini bokisa okona paleakale peteapinga andeaini-pia.
17Andoto, enjole okomane matili iwanaŋa okomane wua pulupeya lo pii leane oko sipisipi yatawa atalaini akali tupamane lapana yainipia.
18Lapana yai-kola, pii okone ale yaini wandakali tupa pitaka-mane nembo kambua teainipia.
19Matiyato pii utupane pitaka ale wato, balana yamapanenga mo yata wato, nemboto peteaipia.
20Sipisipi yatawa atalaini akali tupamane minditaka lee-mane andeaini tupapi, pii ale yaini tupapi, utupane pitaka nembo toto, Gotena gene oko laiyu loto, tama pima yakama peke leainipia.
21Matiyato Jisasa mandu yatawa petea-kola, ole kitupasa peaipia. Ole kitupanena iwanaŋa oko bala Juta yame guleakale loto, balana yala-pene umbaini katu apolane oto oko epeaipia. Epea-kola, wamba Jisasa bala Matiya ininga piti napea-kola, enjole okomane iwanaŋa okona gene lalapape leane pua teke, balana gene Jisasa leainipia.
22Gotena loo pepa pelene eya okomane pii mindi loto, wanda-mane andopane mindi mandula-angi, Gotena wenonga okonelapo kalato atalapele layene eya. Okone-lapona kalato kunu apolane oto oko epola-angi, pitisa akali okomane liyambana kalato atolane tupa kunu apia-geakale lo eka itapuluma lapo yandopi, uya andopane lapo yandopi, mindi opa Gote maiyapape layene eya. Gotena loo pepa pelene eya waka mindimane loto, iwana bulupane mandulai oko manduto, Gote maipe-pene layene eya. Wuane layene eya pua, iwanane angini-lana kalato kunu apolane oto oko epea-kola, Matiya Josepe-lamane Gotena mana Mosesato pepa peleane oko wato minuto, Jisasa bala Gotena lapakale loto, bala mandiyu, Jutusaleme peapelepia.
25Okone angi, akali Simiyone lene mindi Jutusaleme tano okona ateaipia. Oli Sipitisa oko balanga atea-kola, Simiyone bala akali epene tika-pene mindi atoto, Gote lo pote lalaepia. Wamba Oli Sipitisa okomane Simiyone lamawuato, nimba ini oma napulupele. Gotena iwanane Kataisa oko andalu, omolopele leaipia. Wuane lea-kola, Isatale tane wandakali mini kendawa ateyai tupa Kataisato moyolo epolopeya lo, Simiyone bala maliyo ateaipia.
27Maliyo ateaneko, alu mindi Oli Sipitisa okomane akali Simiyone balana nembo-tene oko mina ika laya ya-kola, bala lotu anda andane okona kolandaka leaipia. Okone angi, Gotena loo okomane layene yene pua pipakale nembo toto, Jisasana angini ayiane-lamane bala awua, lotu anda andane okona kolandaka leapelepia.
28Kolandaka leapi-kola, Simiyoneto Jisasa ope lo moto, Gote lo tama peaipia.
29Tama puato, Ayiane Gote, wamba nimbato molo-peke lolane akali mindi epeakale lokale lee leaipia. Andipa nimbato akali okone wandakali pitakana wenonga epeakale lele oko namba nimbana piape akali okomane lee-mane andalu, mini epene paleyo-ko. Andipa namba omewando, okone katu.
32Ale mindi awua peyama-kola, ale tii peya okomane asia andawa lalane. Wuane pua teke, Jisasato nimbana asia epene oko wandakali yame waka tupanga andawa lolopeya. Bala Isatale tane ateya okonena, Isatale tane wandakali tupana gene andane yolopeya leaipia.
33Simiyoneto Jisasa andayo pii utupane lea-kola, Matiya Josepe-lamane nembo kambua teapelepia.
34Nembo kambua teapi-kola, Simiyoneto pote loto, Gote nimbato wandakali okolapo moyape leaipia. Wuane lalu, balato Jisasa angini Matiya lamawuato, matili iwanaŋa oko anda yoto, Gotena piape pua atolopeya leaipia. Gotena piape pua atola-kola, Isatale tane wandakali kambua-mane bala akali koo mindi ya lolai-kola, utupanena nembo-tene koo tupa panakame yolopeya. Panakame yola-kola, nimbana yamapanenga yandate atene gulo tandaka pulupeya. Matili Jisasato Gotena piape pua atoto, nembo-tene koo palene wandakali utupane yuunga peakeakale laya wato, Isatale tane wandakali kambua minditupa ika laya olopeya. Wuane peakale nembo toto, Goteto bala epeakale lapia. Simiyoneto wuane leaipia.
36Okone angi potopisa wanda gene Ana lene mindi lotu anda okonena peteaipia. Bala Asa yame Panule lene okona wanane peteaipia. Wamba bala mapokae pitiyu, akali poto, mali yanasa angu akalini towa peteapi wete, balana akalini oko omeaipia.
37Omea-kola, bala wanda yalo pituto, utulu otongapi, Gotena piape tupa pimawua piti-yaepia. Ole minditupa balato tomo nanene pitiki puato, ole dindi lo lotu anda andane okona poto, pote lo piti-yaepia. Mali paiyasa kitupasanga tukumindi pea-kola, wanda okone bala mini-yene wete peteaipia.
38Ee ana kambua wete Lomo tane gapomane okomane Jutusaleme tane wandakali tupa taimane bosa lo ando atea-kola, Jutusaleme tane wandakali tupamane utupane embo wato, Mesaya okomane yakama moyolo epeakale lo mali yo ateainipia. Jisasana angini ayiane-lamane bala awua epeapele-angi, potopesa wanda Ana okomane bala andoto, Gote ando wayu pele leaipia. Wayu pele lalu, potopesa pii mindi Mesaya oko maliyo ateaini wandakali tupa lamawuato, matili iwanaŋa oko anda yola-angi, balato yakama molo-peke lolopeya leaipia.
39Matiya, Josepe-lamane Gotena loo okomane piyapape layene tupa pitaka pikoyo piyu, Galili disitiki okona poto, liyambana Nasatesa tano okona peke loto peteapele-pia.
40Peteapi-kola, Goteto iwanaŋa okone epelewa moyo ando atea-kola, bala anda yoto, mana kambua mialu, iwana wai-ene tai mindi ateaipia.
41Wamba Isatale tane wandakali tupamane Pasopa tomo oko no ateai-kola, enjole okomane Isipi tane wandakali tupana iwanane bulupane tupa peyo ome loto, Isatale tane wandakali tupana iwana bulupane tupa peyo ome nalene konda yaepia. Wamba Goteto wuane peane nembo toto, mali dindi lo Pasopa tomo nalaini oto okone epea-kola, Jisasana angini, ayiane-lamane atu Jutusaleme puku piyapele-pia.
42Matili Jisasa mali alesa penenga, Pasopa tomo nalaini oto okona mana yene okone wato minuto, Jisasa bala angini, ayiane-la towa Jutusaleme peainipia.
43Pasopa tomo nalaini gii koyo pea-angi, Jisasa angini ayiane-lamane liyambana amenepi, yamepi, wandakali kambua utupane towa Jutusaleme tepa alu, ole mindiki asini peainipia. Okonelapo-mane Jisasa atu andaka peyama nembo teaini tekeko, bala wandakali utupane towa atu asini puu napene, Jutusaleme tano okona ateaipia. Atea-kola, matili ole lene balana angini, ayiane-lamane bala liyambana yamepi, amenepi, utupane towa atu epalaipe lo ayia peapelepia.
45Jisasa bala liyamba yame tupa towa atu ata napea-kola, angini ayiane-lamane Jutusaleme tano okona ayia pulu-peke leapelepia.
46Bala ayia pua ateapi-kola, ole lapo peaipia. Ole teponena angini, ayiane-lamane Jutusaleme lotu anda andane okona kolandaka loto andeapi-kola, Jisasa bala mana lalaini akali tisa tupana tombenenga peteanga andeapele-pia.
47Andeapi-kola, balato akali utupanena pii leaini tupa ale wato, pii minditupa tipa pita piki pua peteaipia. Bala mana andene akali gulo atoto, pii kuai lo wete lea-kola, wandakali balana pii ale yaini tupa pitaka-mane moko loto, nembo kambua teainipia.
48Jisasa bala mana lamayaini tisa tupa towa pii lo ateanga andoto, angini ayiane-lamane moko andane teke leapelepia. Moko loto, Jisasana angini-mane bala lamawuato, iwana, nimba ayiane nalipa yamapane kendawa, nimba ayia pua ataipa-ko. Tene anu pipia-kola, nimba nalipa towa andaka atu makale ipu napene, wali mee atapipe leaipia.
49Wuane lea-kola, Jisasato okonelapo lamawuato, anu peakale liyambato namba ayia pua atapiapipe. Namba ayiane okona andaka namba atolopeya nembo na-tapiapipe leaipia.
50Wuane lea-kola, bala angini ayiane-lamane pii balato leane okonena tene oko nembo nateapele-pia.
51Okone angi, Jisasa bala angini, ayiane-la towa Nasatesa yuu okona peke loto, okonelapo-mane pii leapele tupa wato minu atea-kola, Matiyato Jisasana pii leane tupapi, mana mineane tupapi, utupane pitaka balana yamapanenga yakale lo, nembo tatawa peteaipia.
52Jisasa bala anda yama-yama, mana mima-mima pea-kola, Gotepi, wandakali tupapi, utupane pitaka-mane bala epele wete yainipia.
