LUKU 10:25-41

²⁵Dokadↄ̃ri ke fùtɛ de à Yesu yↄ̃ à gwa à pì: Dannɛri, deran mani kɛ nà mà wɛ̃̀ndi kũ àdi lákaro lee?

²⁶Yesu pìnɛ: Deran ò kɛ̃̀ doka takadan nàa? N a kyó kɛ̀ n mà deramɛɛ?

²⁷Gbɛ̃ pìi wèa à pì: Ǹgↄ̃ ye Dikiri n Ludai kũ nɛ̀sɛɛo mɛ̀n do kũ n ninio pínki kũ n laasunnwo pínki n gbãna lɛ́n, n swɛ̃̀ gↄ̃ kúa, abire gbɛra ǹgↄ̃ ye n gbɛ̃dakei lán n zĩda wɛ̃̀ndii bà.

²⁸Yesu pìnɛ: N we mana. Ǹgↄ̃ kɛ lɛ, ĩnigↄ̃ kun.

²⁹Gbɛ̃ pì ye à yã nna kpá a zĩdaa, akũ à Yesu là à pì: Dín ma gbɛ̃dake ũu?

³⁰Akũ Yesu pìnɛ: Gbɛ̃ke mɛ́ à bò Yurusalɛmu àtɛn gɛ́ Yɛriko, akũ kpãni kàsaranↄ zɛ́ zↄ̃̀nɛ. Ò a pↄ́kasanↄ sìa, ò a gbɛ̃̀ búgubugu ari à kà gana. Akũ ò a tòn ò gɛ̃̀ zɛ́la.

³¹À sù à lè sa'ori ke zɛ́ dokↄ̃nↄ pìi sɛ̀. Kũ à a è, akũ à pã̀nɛ à gɛ̃̀tɛ.

³²Lɛmɛ dↄ kũ Levi buri ke kà gu pìn, à a è, akũ à pã̀nɛ à gɛ̃̀tɛ.

³³Ama Samaria bùsu gbɛ̃ke tɛ́ zɛ́ pìn. Kũ à sù à a è, akũ à kɛ̀nɛ wɛ̃nda.

³⁴À nài, à ɛzɛ màma gu kũ à kĩ̀nnanↄa kũ nísio kũ sèwɛ̃o, à pↄ́ yĩ̀yĩa. Akũ à a sɛ̀ à dì a zaaki kpɛ, à gɛ̀ɛ kãao nibↄnↄ kipakia, gu kũ à a gwàn.

³⁵Kũ gu dↄ̀, akũ à andurufu ↄgↄ bò mɛ̀n pla à kpà kipakide pìia à pì: Ǹ a gwamɛnɛ. Tó n ↄgↄ dɛ̀ de adila a musu, mani fĩna bonnɛ, tó ma su.

³⁶Tↄ̀! Gbɛ̃nↄn aakↄ̃ pìnↄ tɛ́ dín ntɛn da gbɛ̃ kũ kpãninↄ dàalɛ pì gbɛ̃dake ũu?

³⁷Dokadↄ̃rii pìi wèa à pì: Gbɛ̃ kũ à a wɛ̃nda dↄ̃̀mɛ. Akũ Yesu pìnɛ: Ǹ gɛ́ ǹ kɛ lɛ se.

³⁸Gↄrↄ kũ Yesu kũ a ìbanↄn tɛ́ zɛ́n, ò kà wɛ̃tɛ gũn, akũ nↄgbɛ̃ kũ òdi pinɛ Maata Yesu sì a bɛa.

³⁹À dakũna vĩ, òdi a sísi Mariama, à vùtɛ Dikiri gbá sarɛ, àtɛni a yã ma.

⁴⁰Kĩni zĩ kɛ̀ Maataa dasi, akũ à sù Yesu kĩnaa à pì: Dikiri, kũ ma dakũna ma to zĩ gũn mado, adi kɛnnɛ yãke ũroo? Ǹ onɛ à kpámai.

⁴¹Akũ Dikiri wèa à pì: Maata, Maata, ntɛn damu kɛ dasi, ntɛn wari dↄ n zĩdaa kũ yãnↄo dasi.