Luk 10:25-41

²⁵De iak, i maikka i qe taqat drlem ma Moses aa Lo, dai qa maarlviit, be qe narliip ke siquat ne ma Iesus. Be qa ruqun ma’, “Gua Tiksiqa, ngu lu diip ngu sana ip diip mager ip ngu raneng ama iames masmas?”

²⁶De ma Iesus ka virliit sagel ka ma’, “Ngia mis per ama Lengi ama narligel-vem-nget. Dai be ngerel sil nanaa?”

²⁷De luqa qa virliit ma’, “Maikka ngi rarlik gia Slurlka, i gia Ngemumaqa ne gia revan. De ngia tu gia qevep mai sever a qa nade gia rlan mai. De maikka gia ngimsevetki veviit sagel ka. De maikka ngi kuarl temiis mai bareq a qa. De maikka mager ip ngi rarliq iari ip katikka raquarl ai de ngi rarlik nas.”

²⁸De ma Iesus ka ruqun na qa ma’, “Lungera ama Lengi i ngia guirltik na nget dai maikka gia revan. Dai qatikka mager ip ngi tekmet taqurla ip diip ngi raneng ama iames masmas.”

²⁹Dap luqa i qe taqat drlem se ama Lo dai qatikka qe narliip ke taqat lu gel aa rlenki iv ama atluqi. Taqurla be qa snanpet ne ma Iesus ma’, “De ngu lu iara dai nemta ip gua arlem naver a ra?”

³⁰De ma Iesus ka virliit ma’, “Diip ngul sil sever iaq i lek me qa navet ma Jarusalem be qa tit imanep savet ma Jeriko. Dai ama suamta ra uamet na qa samen ama aiska, de ra rlekmet ne aa luan be qurli qa sena. I maikka ra uamet na qa maden. Ta rekmet taqurla de ra mit. Dap kurli luqa men ama aiska i batdarlen per a qa be ama qares ip kep ngip.

³¹De vet luqa ama nirlaqa de iaq i ama Barlka nep ma Lautu dai qa tit nep luqa ama aiska imanep. Dai qa lu qa, de qa aang gel ka i qa tit miaimit per ama aiska aa garli.

³²Dai saqikka raqurla i iaq ama Livaiqaqa tit be qa men pet luus aa be saqikka qa lu luqa de qa aang gel ka. I qa tit per ama aiska aa garli be saqikka qa mit.

³³Dap katti iak navet ma Samaria qa tit nep ma aiska be qa men gel luqa ama qaqeraqa. Be qa lu qa de maikka buup ka ne ama arlem naver a qa.

³⁴De qa mit be sagelna na qa, be qa rletik ne ama marles nev ama mengka ma Ulip de ngen ama vain mer aa bias, de qa uung ne ama luaniit. De qa met luqa de qa mugun a qa ver aa dongki ara rleng. De qa mit se qa sev ama Pasindiaqena araa vetki be qe uas tem ka.

³⁵Baip bigia de qa qurl luqa i ai de qe uas te ama Pasindiaqena araa vetki re ama qelaing. De qa ruqun ma’, “Ngi taqa uas te luqa. De ariq aip ngia matna ver a qa ne ngen a qeng ama qelaing nagelemiis, dai aip ngua guirl de diip ngu virliir a nget.”

³⁶De ma Iesus ka snanpet ma’, “Ngia tu gia qevep ai a qek nanaa nevet lura ama depguas na ra i maikka aa arlem nevet luqa i ama suamta ra lenges na qa?”

³⁷De luqa i qat drlem se ama Lo qa ruqun ma’, “Luqa i a arlem never a qa de qa matna never a qa.” De ma Iesus ka ruqun na qa ma’, “Dai ngia tit de ngi tekmet taqurla.”

³⁸Be lua i ra tit savet ma Jarusalem, dai ma Iesus ka man saver iaiq ama luqupki. Be iaiq ama nanki i ara rlenki ma Mata dai qia mit nanaik ka sev ara vetki.

³⁹I ma Mata dai ara qelatki ma Maria. I ma Maria qia men be qia mugun gelna ne ma Iesus aa ilaing, de qurli qi aa, i qi narliip ki narli aa lengi.

⁴⁰Dap ma Mata dai qi tekmet ne ama rleriirang i buup i ani qia tuvem ne ama asmes. Be ara tuaqevep dai quasiq ai qurli nget maget. Taqurla be qia mit sagel ma Iesus be qia ruqun ma’, “Gua Barlka, gua qelatki qia mit namen na ngua be ngerek se ngua i ngua tuvem ne ama asmes. Kua quasik ngia tu gia qevep sevet liina? Ngi ruqun na qi ip kia ren ip kia raat never a ngua.”

⁴¹Dap ma Iesus qa virliit ba qi ma’, “Mata, guari, ngia tu gia qevep maberl de ama arlemigl na ngi never ama tekmer-iirang i buup.