LUKU 10:25-41

²⁵Dokadↄ̃ri ke fɛ̀ɛ lɛ à Yesu yↄ̃ à gwa à bè: Dannɛri, dian mɛ́ kɛ nà mà wɛ̃̀ndi kɛ̀ è yãaroo ee?

²⁶Yesu bènɛ: Dian wà kɛ̃̀ doka takadan nà? N kyó kɛ̀ ń dↄ̀rↄ dↄ̃ diamɛ?

²⁷Gbɛ̃ pì wèàla à bè: Ǹgↄ̃ ye Dii n Ludazi kↄ̃n nↄ̀sɛo do kↄ̃n n niniio píngi kↄ̃n n laasuuo píngi n gbãa lɛ́n, beee gbɛra ǹgↄ̃ ye n gbɛ̃daaazi lán n zĩnda wɛ̃̀ndi bà.

²⁸Yesu bènɛ: N we maa. Ǹgae kɛ lɛ, nɛ́gↄ̃ kuu.

²⁹Gbɛ̃ pì yezi à yã nnaa kpá a zĩndaa, ben à Yesu là à bè: Dén ma gbɛ̃daaa ũu?

³⁰Ben Yesu bènɛ: Gbɛ̃ke bé à bↄ̀ Yerusalɛmu èe gaa Yɛriko, ben kpãi kàsaranↄ zɛ́ zↄ̃̀nɛ. Aↄ̃ à pↄ́kãsãanↄ sìa aↄ̃ à gbɛ̃̀ búgubugu ai à kà gana. Ben aↄ̃ à tòn aↄ̃ gɛ̃̀ zɛ́la.

³¹À mↄ̀ à lè sa'ori ke zɛ́ dↄ̃nkↄ̃ pì sɛ̀. Kɛ̀ à à è, ben à pã̀nɛ à gɛ̃̀tɛ.

³²Lɛmɛ dↄ kɛ̀ Levi bori ke kà guu pìn à à è, ben à pã̀nɛ à gɛ̃̀tɛ.

³³Mↄde Samaria bùsu gbɛ̃kee tɛ́ zɛ́ pìn. Kɛ̀ à mↄ̀ à à è, ben à kɛ̀nɛ wɛ̃nda.

³⁴À sↄ̃̀zi à ɛ̃zɛ̃ màma guu kɛ̀ kɛ̃̀nnaanↄa kↄ̃n nↄ́sio kↄ̃n geepiwɛ̃ɛo, à pↄ́ yìyia. Ben à à sɛ̀ à dì a zaaki kpɛɛ à gàao nibↄnↄ pitakiia, gura kɛ̀ à à gwàn.

³⁵Kɛ̀ guu dↄ̀, ben à kondogi ↄↄ bↄ̀ mɛ̀n plaa à kpà pitakidee pìa à bè: Ǹ à gwamɛ. Tó n ↄↄ blè dɛ kɛ̀la à musu, mɛ́ fĩa bonnɛ, tó ma su.

³⁶Tↄ̀! Gↄ̃ↄn aagↄ̃ↄ pìnↄ tɛ́ dén nɛ́ɛ daa gbɛ̃ kɛ̀ kpãinↄ lɛ̀ɛa pì gbɛ̃daaa ũu?

³⁷Dokadↄ̃ri pì wèàla à bè: Gbɛ̃ kɛ̀ à à wɛ̃nda dↄ̃̀mɛ. Ben Yesu bènɛ: Ǹ gá ǹ kɛ lɛ se.

³⁸Gurↄↄ kɛ̀ Yesu kↄ̃n a ìbanↄↄ tɛ́ zɛ́n, aↄ̃ kà wɛ́tɛ guu, ben nↄgbɛ̃ kɛ̀ wè benɛ Maata Yesu sì a bɛ.

³⁹À dãaro vĩ wè à sísi Mariama, à vɛ̃̀ɛ Dii gbá saɛ èe à yã maa.

⁴⁰Kĩi zĩi kɛ̀ Maataa bíta, ben à mↄ̀ Yesu kiia à bè: Dii, kɛ̀ ma dãaro ma to zĩila mado, èe kɛnnɛ yãke ũroo? Ǹ onɛ à ma ĩan ká.

⁴¹Ben Dii wèàla à bè: Maata, Maata, nɛ́ɛ damu kɛɛ bíta, nɛ́ɛ ĩa daa n zĩndaa kↄ̃n yãnↄo pari.