Luke 1:11-77

¹¹Tangada di langi Dimaadua ga haga gida eia gi Zechariah, e duu i di baahi gau donu, di gowaa dudu tigidaumaha.

¹²Di madagoaa Zechariah ne gidee tangada di langi deelaa, geia gu homouli, gu madagu huoloo.

¹³Gei tangada di langi ga helekai, “Zechariah, hudee madagu! Au dalodalo la guu kila i baahi o God. Doo lodo go Elizabeth ga haanau dana dama daane, gei goe wanga ina dono ingoo go John.

¹⁴Goe ga tenetene ge noho i di aumaalia, gei digau dogologo ga tenetene gi di haanau o maa.

¹⁵Mee ga aamua i mua o God. Mee hagalee hai gii tale gi nia waini be gi nia dagaao maaloo. Taamada mai di haanau o maa, mee gaa honu i di Hagataalunga Dabu.

¹⁶Mee ga laha mai labelaa digau Israel dogologo gi Dimaadua, go di nadau God.

¹⁷Mee gaa hana i mua o Mee, e maaloo gei e mahi be soukohp Elijah. Mee ga hagahumalia mehanga nia damana mo nadau dama, gaa huli digau de hagalongo gi di tonu, mee gaa hai nia daangada o Dimaadua gi togomaalia gi Mee.”

¹⁸Zechariah ga helekai gi tangada di langi, “Dehee dagu hai e iloo bolo nia helekai aanei le e donu e kila aga i dogu baahi, gimaua mo dogu lodo la gu mmaadua?”

¹⁹Tangada di langi ga helekai, “Au go Gabriel. Au e duu i mua nnadumada o God. Au ne hagau mai belee haga iloo adu di longo humalia deenei.

²⁰Gei goe dela hagalee hagadonu dagu haga iloo dela ga gila aga i di madagoaa hai donu. Idimaa goe digi hagadonu, gei goe ga deemee di leelee, gaa dae loo gi di laangi dela e gila aga dagu hagababa deenei adu gi di goe.”

²¹Di madagoaa deelaa, gei digau dogologo e talitali Zechariah, e gologolo be mee e aha dela e duai mai i lodo.

²²Di madagoaa a mee ne ulu mai gi daha mo di Hale Daumaha, gei mee gu deemee di leelee. Digaula gu iloo hua bolo mee guu mmada gi di mee i lodo di Hale Daumaha. Gei mee e duu i mua digaula e aau ono lima bolo ia e helekai, gei mee gu deemee di helekai.

²³Di madagoaa ne lawa ana hegau i lodo di Hale Daumaha, gei Zechariah gaa hana gi dono guongo.

²⁴Muli mai hua, dono lodo go Elizabeth gu hai dama, gaa noho hua i lodo dono hale i nia malama e lima.

²⁵Mee ga helekai, “Deenei di hai o Dimaadua ne hagamaamaa au dolomeenei, i dono daa gi daha dogu haga langaadia i baahi nia daangada!”

²⁶Di madagoaa Elizabeth ne hai dama nia malama e ono, gei God ga hagau mai tangada di langi Gabriel gi tama waahale Nazareth i Galilee,

²⁷gi baahi tama ahina madammaa, dono ingoo go Mary, dela gu hagababa ang gi Joseph, tangada di madawaawa David.

²⁸Tangada di langi gaa hana gi baahi o mee, ga helekai, “Mary, di aumaalia gi madalia goe! Dimaadua e noho i do baahi gei e haga maluagina goe!”

²⁹Mary gu homouli gi nia helekai a maa, gei gu gologolo be nnadinga ana helekai le e hai bolo aha.

³⁰Tangada di langi ga helekai, “Mary, hudee madagu, idimaa, tumaalia o God guu honu i do baahi.

³¹Goe ga hai dama, ga haanau tama daane, gei goe wanga ina dono ingoo go Jesus.

³²Mee ga aamua, ga haga ingoo bolo Tama ni di God Aamua Huoloo. Dimaadua go God ga haga menege aga a Mee gii hai di king be dono damana go David.

³³Mee gaa hai di king ni di hagadili o Jacob, gaa hana hua beelaa, gei dono henua king la hagalee haga odi!”

³⁴Mary ga helekai gi tangada di langi, “Nia mee aanei e mee di kila aga behee i dogu baahi, i di au di ahina hua e noho madammaa?”

³⁵Tangada di langi ga helekai, “Di Hagataalunga Dabu ga hanadu gi di goe, gei nia mahi o God Aamua Huoloo ga haga holi goe, deenei tadinga Tama dabuaahia ga haga ingoo bolo Tama a God.

³⁶Maanadu ina do dangada go Elizabeth, dela e dugu go nia daangada bolo di ahina e dee huwa, gei dolomeenei gei mee gu hai dama, guu ono (6) ono malama, gei mee di ahina gu madumadua.

³⁷Idimaa, deai di mee e deemee di hai go God ai!”

³⁸Mary ga helekai, “Au di hege ni Dimaadua. Heia au gii hai be au helekai.” Tangada di langi ga hagatanga gaa hana.

³⁹Muli hua nia mee aanei, gei Mary ga hagalimalima gaa hana gi tama waahale i tenua gonduu o Judea.

⁴⁰Mee ga ulu gi lodo di hale o Zechariah, ga hagaaloho gi Elizabeth.

⁴¹Di madagoaa Elizabeth ne longono ia Mary e hai dana hagaaloho, gei di tama i lodo o mee gu ngalungalua. Gei Elizabeth guu honu i di Hagataalunga Dabu,

⁴²gaa wolo gi nua, “Mary, goe gu maluagina i baahi nia ahina huogodoo, ge gu maluagina go di Tama dela ga haanau kooe!

⁴³Di mee haga goboina deenei e aha dela e hai mai gi di au, tinana o dogu Dagi e hanimoi e haga hidihidi gi dogu baahi?

⁴⁴Do madagoaa ne hagaaloho mai, gei di tama dela i ogu lodo gu ngalungalua i dono tenetene.

⁴⁵E maluagina go di ahina dela e hagadonu bolo nia helekai Dimaadua ga kila aga i dono baahi!”

⁴⁶Mary ga helekai, “Dogu manawa e hagaamu Dimaadua.

⁴⁷Dogu mouli e tenetene gi God, dogu Dangada Hagamouli,

⁴⁸i Mee dela ne langahia dana hege dulii loo deenei! Dolomeenei gaa huli gi muli, nia daangada huogodoo ga haga hagaamu au,

⁴⁹mai i nia hagadilinga mee haga goboina ala ne hai go God Aamua mai gi di au. Dono ingoo koia e dabuaahia.

⁵⁰Mee e haga modongoohia dono dumaalia ang gi digau ala e hagalaamua Ia, di adu dangada nei mo di adu dangada nei.

⁵¹Mee ne holo dono lima mogobuna gi daha, ga hagahuaidu nia hiihai digau huogodoo ala e hagamuamua.

⁵²Mee ne daa nia king ala e hagamuamua gi daha mo nadau lohongo, ga haga mmaanege aga digau lligi.

⁵³Mee ne haga maaluu digau ala e hiigai gi nia meegai humalia, ga hagau gi daha digau maluagina gii hula nadau mee e kae ai.

⁵⁴Mee e dadaahi dana hagababa ang gi tadau maadua mmaadua, ne hanimoi belee hagamaamaa dana hege go Israel.

⁵⁵Mee e langahia dono dumaalia ne hai ang gi Abraham mo ono hagadili huogodoo gaa hana hua beelaa.”

⁵⁶Mary nogo noho i baahi Elizabeth nia malama e dolu. Nomuli, gei mee gaa hana gi dono hale.

⁵⁷Guu dae mai di madagoaa Elizabeth e haanau ai, gei mee ga haanau dana dama daane.

⁵⁸Digau ala i baahi o mee mo ono gau gu longono tumaalia o Dimaadua ang gi mee, gei digaula huogodoo gu tenetene huoloo madalia a mee.

⁵⁹Nia laangi e walu i muli di haanau di tama, gei digaula ga lloomoi belee sirkumsais di tama, ge wanga di ingoo o maa bolo Zechariah, e haga ingoo gi dono damana.

⁶⁰Tinana o maa ga helekai gi digaula, “Deeai, di ingoo o maa go John.”

⁶¹Digaula ga helekai gi mee, “E hai behee? John la hagalee di ingoo dahi dangada i lodo oo gau.”

⁶²Digaula ga aau nadau lima gi tamana o tama, dehee di ingoo dela e hiihai ginai eia e haga ingoo di tama.

⁶³Zechariah ga aau ono lima gi gaamai di lau beebaa, gaa hihi, “Di ingoo o maa go John.” Gei digaula huogodoo gu goboina huoloo.

⁶⁴Di madagoaa hua deelaa, gei Zechariah guu mee di leelee labelaa, geia ga daamada ga hagaamu a God.

⁶⁵Digau o di gowaa deelaa huogodoo gu uli nadau gai huoloo, gei nia longo o nia mee aanei guu dele gi nia madagowaa huogodoo i hongo tenua gonduu o Judea.

⁶⁶Digau huogodoo ala ne longono nia mee aanei gu hagabaubau mo di heheeu be di tama deenei la gaa hai dana aha? Idimaa, gu modongoohia bolo nia mogobuna o Dimaadua la gu i baahi di tama deenei.

⁶⁷Zechariah tamana o John guu honu i di Hagataalunga Dabu, ga hagi aga nnelekai a God:

⁶⁸“Gidaadou e hagaamu Dimaadua, di God o Israel! Mee gu hanimoi belee hagamaamaa ana dama, ge e haga dagaloaha digaula.

⁶⁹Mee ne dugu mai gi gidaadou Tangada Daa Hagamouli aamua o di hagadili David, go dana dangada hai hegau.

⁷⁰Mee gu hagababa ang gi ana soukohp dabuaahia namua,

⁷¹bolo Ia gaa daa gidaadou gi daha mo tadau hagadaumee, mo nia mahi o digau ala e de hiihai mai gi gidaadou.

⁷²Mee gu helekai bolo Ia ga dumaalia ang gi tadau maadua mmaadua, ge e langahia dana hagababa dabu.

⁷³Mee guu hai dana hagamodu gi tadau damana go Abraham, gei gu hagababa bolo Ia e daa mai gidaadou gi daha mo tadau hagadaumee, ge e dumaalia mai gi gidaadou gi hai hegau ang gi de Ia i tee madagu,

⁷⁵bolo gi dabuaahia gidaadou, gei gii donu i ono mua i nia laangi huogodoo i di waalooloo o tadau mouli.

⁷⁶Goe go dagu dama ga haga ingoo bolo di soukohp ni God Aamua Huoloo, idimaa, goe gaa hana i mua Dimaadua, e hagatogomaalia dono ala,

⁷⁷bolo goe gi agoago gi ana daangada di hai dela e mouli ai digaula, mai tumaalia o nadau huaidu.