Luka 1:11-77

¹¹Nuy nanga si muynu Awgadhaw angela danapa yakamiz nubepa oltaw getha doegamoenu tharaydhin senaw ngalaga nanga ganul thu.

¹²Zakaraya nanga Angela imadhin nuyn mina koeyma madhu pamadhin a nuydh koey aka gasamoedhin.

¹³Kasa kay kedha Angela nubepa kedha mulaydhin, ‘Zakaraya, ngi akan maygi Awgadh nuydh karngemidhin nginu thoeythu poegay a nginu ipin bangal thurkiyay kazi imane, a ngidh bangal nuyn nel tharane Yoewane.

¹⁴Ngi bangal ika dhiw gasamoene kalmel koeyma mabaygal nungu kazimay thonara.

¹⁵‘Nuy ngaru bangal koesimidhe kadaypa mina adhapudhay koey mabayg Awgadhaw parunu. Nuy bangal woenig umal nguki a matha kedha puridhoeral umal nguki. Nungu kazimay thonarngu Maygi Mari nubiya muynu magaw poelaypa nubepa nungu zagethoenu.

¹⁶Nuydh koey garsar Isoereylaw mabaygal bangal kuniya ruwaymaypa thanamun Kuykupa Mina Awgadh.

¹⁷Nungu zageth bangal Awgadhaw parunu ngoedhe kedha Elayza, nuy bangal Maygi Mariw magawnu siparuy Kuykulmay yabugud buth pathan. Nuydh bangal mabaygaw ngoenakap lak balbayg poelaypa thathiw ngoenakap thanamun kazipa a matha kedha kawragi mabaygal garthil thoeyaypa balbayginga niyaypa mina mabaygiya. Nuydh mabaygal dhoeynidhaypu balbayginga Kuykulmaypa.’

¹⁸Nuy Zakaraya kuniya mulaydhin Angeloepa kedha, ‘Ngath kay midh paru ngulayg kedha, ngalbe bangal kazi gasamoene, kedha zoengu ngay koey thathi a ngaw ipi koey mabayg aymayzinga.’

¹⁹Nuy Angela kedha mulaydhin nubepa, ‘In ngay Gabriyel. Ngay mura thonara Awgadhaw parunu kaday sipa a nuydh ngoena ngapa wayanu ngibepa nabi kapu wakayl yangukudu manin.

²⁰Ngi kurusipagi, wa ngidh ngaw yangukudul mina yoepathamayginga; a ngidh bangal imane. Itha bangal thabi yangukudul kuykunidhamoeyne mina balbayginga sethabi thonara. Wa, ngibepa kedha, ngi bangal yagig kurusipa senabi thonar gasamoene, kuyk ngidh ngaw ya mina yoepathamayginga.’

²¹Wa, senabi thonara mura mabaygan ugar Zakarayan, thanamulpa kakal nuy koey kuykuthalnga muynu oltanu.

²²Nuy nanga adhapadhadhin nuyn yagi paladhin. Wa, thana ngulayg asimoeyn kedha, nuydh adhapudhay za goeygiw piki iman muynu koey yoewthanu, kedha zoengu nuy ya mulayginga. Nuy thanamulpa gethan ya muliz.

²³Nungu zagethaw thonar nanga muwasidhin muynu koey yoewthanu, nuy kuniya tidaydhin lagoepa.

²⁴Soeyzi moegina dhadhabuth nungu ipi Elisapetha na mapunga aymaydhin. Payb moelpalalnga na matha lagoenu muynu.

²⁵Na kedha mulaydhin, ‘Ngay mina koey kuykuthalnga kasa uzaraydhin, kazigig kurusipa Kuykulmay ibupuydhan a kozan ngayapa poeyban. Ngayapa lak azirpa lawnga mabaygaw parunu.’

²⁶Elisapethana nanga siks moelpalal aymoeydhin maythapa, Awgadhan nungu yaday woeyay Angela wayadhin Gabriyelan Galiyoepa, moegina goegath nel Nazareth.

²⁷Nubiya yangukudu mer muynu ngoewakazipa, Yoewsepalpa nga nanga gudapa thurayzinga. Nuy Yoewsepa Dhawithan buway mabayg. Nanu ngoewakaziw nel Mariya, kapu akasizi ngoewakaz.

²⁸Angela ngapa nabepa kedha mulaydhin, ‘Awgadh ngibeya kalmel a nungu adhapudhay koey woenab.’

²⁹Wa, Mariya nabiya koeygarsar wakay thoemamay, Angelaw yangukudungu. Nadh kedha wakay thayadhin, ‘Ina kow aykap gar sike midh paru.’

³⁰Kasa kedha Angela nabepa kedha mulaydhin, ‘Mariya ngi akag, Awgadhan ngin mina adhapa thamadhin.

³¹Ngi bangal mapunga aymidhe a ngidh bangal thurkuyay kazi gasamane, ngidh bangal nungu nel tharane Yesu.

³²Nuy bangal mina adhapudhay, a nuyn bangal kedha thoeraypu Awgadhaw Kazi, nuy koey Awgadh gimal. Awgadhan nuyn bangal Mopakuyk aymoene, Dhawitha nanga midh, nungu buway apakuyk.

³³Nuy bangal Yakubun kaziw kaziw ingaru Mopakuyk, nungu basalaya kuthaginga kuykuginga!’

³⁴Na Mariya angeloepa kedha mulaydhin, ‘Ngath bangal midh paru kazi gasamoene, ngay alaygig ngoewakaz?’

³⁵Angela kedha mulaydhin Mariyalpa, ‘Awgadhaw Maygi Mari bangal ngibiya kalmel, a Awgadhaw bibir a woenab bangal ngibiya ngidh bangal gasamoene. Kedha zoenguz nginu maygi kazi bangal kedha thoeraypu “Awgadhaw Kazi.”

³⁶‘Wa, ngidh nginu tukuyap Elisapethana ngoenanu maypa? Thana waza kedha, “Nabepa kazipa gasamoeypa lawnga.” Kasa kay kedha na nanu geth lak mapunga lak siks moelpalal, na kasa koey apu.

³⁷Awgadhoepa mura za aymoeypa zagethoeginga, mura balbayginga.’

³⁸Na Mariya kedha, ‘Ina bangal ngaybiya aymidhe nginu yangukudu ya midh nanga. Wa, ngay mina Awgadhaw zagethaw mabayg.’ Kalanu Angela nan wanadhin.

³⁹Angelaw yangukudu kalanu nanga, Mariya wakay thoemamayn gasamadhin nanu tukuyap Elisapethana. Nadh nanu moenari rugal matha thoeray buth pathaydhin kalanu sobaginga uzaraydhin Yoewdhayoepa Elisapethana goegath muynu padaw dhadhabuthanu.

⁴⁰Na nanga mangaydhin si, na muy araydhin Zakarayan lagiya Elisapethana alay. Mariya nan Elisapethana ikan gasamadhin.

⁴¹Sena namuyth nanga Mariya ikan gasamadhin Elisapethana. Senawbi thonara Elisapethana mapeth ikan dhiwan soersimoeydhin muynu nabiya. Mina senabi thonara na ngulayg asidhin Maygi Mariw zageth nabiya, a Maygi Mariw woenab nabiya ngoena pudhaydhin.

⁴²Na gima gudiya mulaydhin kedha, ‘Wa, Awgadhaw woenab ngibiya, a ngin mina adhapa thamayidhin mura yoepkaziya, a Awgadhaw woenab nginu kaziya senaw ngibiya nanga muynu!

⁴³Ina mingu mina adhapudhay za ngayapa aymiz kedha, ngoezu Kuykulmay apu ngayapa ngapa imaypa mema?

⁴⁴Sena namuyth nanga ngath karngeminu nginu ikal yangukudu nguzu mapeth muynu ngaybiya ikan dhiwan katan thoeydhadhin.

⁴⁵Wa, ika dhiw gasamar ina mina matha ngoedhagidh ngidh mina yoepathamadhin Kuykulmay woeyayzi yangukudu ngibiya kuyku nidhane.’

⁴⁶Mariya kedha, ‘Ngath ngoezu ngoenakapun Kuykulnga koeyma thawmaypa;

⁴⁷ngath koey ika gasamoedhin kuyk ngaw Kaludhay Mabayg, Awgadh.

⁴⁸Nuydh ngoena ngoenanu manin ngay nungu parunu koey apal zagethaw mabayg. Koezi kayboengu pawpa mura mabaygal ngoena bangal kedha thoeraypu, “Koey dhiwal yoepkaz.”

⁴⁹Kedha zoenguz kedha adhapudhay Koey Awgadh nuydh mina kapu zageth ayman ngayapa. Ngalpa ngaru koeyma thawmanin nungu maygi nel.

⁵⁰Nuydh nungu pawdh a gabu pawa yakaman ngalpalpa mura mabaygal ngaya nanga apasin nubepa, maykuyk mulupa maykuyk kadaypa.

⁵¹Nuydh nungu koey bibiril geth woenabalnga, poeraparalnga, adhapa gud paliman gamu dhub yoewruyl mabaygoepa mathamaypa. Thanamun buwayl thoeyay idimoeyn mura.

⁵²Nuydh ngulayg Adhapudhay Mopakuykul mulupa thayamoeyn, thanamun kupay zagethoengu. A mabaygal ngaya mina apal nuydh kadaypa mamayin.

⁵³Aygi zagi mabaygal nuydh zapun poeybiz, gamul dhiba mamayin, a setha ngaya aydegal a zapulgal thana adhapuydhan gethal aygimayl.

⁵⁴Nungu kulkubaw yawadhayzinga ngalpan thathiw thathipa, nuyn kuyku nidhan kayib. Nuy ngapa Isoereylaw kaziw kazipa ibupuydhaypa

⁵⁵Nuydh ngoenanu manin Abrama, yakaman nungu sib wanan a matha kedha mura nungu kaziw kazipa ngaru a ngaru, nungu kulay yangukudu midh nanga.’

⁵⁶Mariya na sike thoeri moelpalalnga Elisapethaniya, wagel kay na kuniya tidaydhin nanu lagoepa.

⁵⁷Na na gasamadhin thonar Elisapethana kazimay thonar, nadh gasamadhin thurkiyay kazi.

⁵⁸Nanu pasiw mabaygal a mura nanu buway karngemidhin kedha, Kuykulmay mina pawa midh, nabepa. Thana mina koey ika gasaman nabiya kalmel.

⁵⁹Urapun wiki kaliya thana mura ngapa mapethoepa motho poethaypa. Wa, thanamun ubi kedha thana nuyn Zakarayan thoeraypa, nungu thathiw nel.

⁶⁰Kasa kay kedha nungu apu kedha, ‘Maygi, nungu nel bangal Yoewane.’

⁶¹Thana kedha nabepa, ‘Buwaynu muynu kedha nelginga!’

⁶²Kalanu thana nungu thathipa geth aymayn yapu poeybemin kedha, ‘Nginu ubilnga mi nel nubepa maypa?’

⁶³Zakaraya gethan yadu palgan thusi poelay za, kalanu kedha palan, ‘Nungu nel Yoewane.’ Thana koeyma madhu pamemidhin.

⁶⁴Mina senabi thonara nuy Zakaraya balbayg asidhin gudiya ya muliz a nuydh mina koeyma thawmanin Awgadh.

⁶⁵Thanamun pasiw igalgal mina koey aka gasamoedhin sethabi zapungu. Na ya gud palaydhin adhapa nupa mura senabi padaw lagiya Yoewdhayanu muynu.

⁶⁶Mura setha ngaya nanga karngemidhin thana ngoenanu madhin senabi zapa a yapu poeybemidhin, ‘Nuy bangal senawbi mapeth mi mabayg?’ Mabaygoepa kakal kedha Kuykulmay woenab nubiya muynu.

⁶⁷Nungu mapethaw thathi Zakaraya, nubiya muynu Maygi Mari, nuydh Awgadhaw ya yadu poelgaypu kedha,

⁶⁸‘Ngalpa koeyma thawmanin Kuykulnga Isoereylaw Awgadh! Nuy ngapa ngalpalpa ibupuydhaypa a nungu mabaygoepa gudaz puydhaypa.

⁶⁹Nuydh ngalpalpa poeybadhin Adhapudhay Kaladhuy Mabayg Dhawithan buwayngu ngapa, nuy Dhawitha Awgadhaw zagethaw mabayg.

⁷⁰Nuydh mina kulay mulaydhin, a ya wadhadhin nungu maygi peropethaya kedha,

⁷¹“Nuydh ngalpan gudaz puydhamoeyne mura wati mabaygoengu, a sethabi wati bibiringu mabaygan ngadh ngalpan gegeyadh yawaypa.”

⁷²Nuy senawbi thonara thanamulpa mulaydhin kedha, “Nuydh bangal yakaman gabu pawa a pawdh ngalpan thathiw thathipa. A ngoenanu maypa nungu maygi ya woedhayzinga ngalpalpa.”

⁷³Ya woedhan koey ridhanga nuydh ayman ngalpan muruygoepa Abramalpa. Nungu koey ridha ya kedha, nuydh gudaz puydhamoeyn ngalpa ngalpan wati mabaygoengu. Nuydh ayman ngalpa nungu zagethaw mabaygal, akapa lawnga mina zageth ayman.

⁷⁵Lak ngalpa balbayginga nungu adhapa thoemayzimayl, maygi mabaygal nungu parunu, mura ngalpan igililmay goeyginu.

⁷⁶Ngaw Kazi ngin bangal kedha thoeraypu, Maygi peropetha, Mina Koey Awgadhaw. Ngi kulay thayiz ngalpan Kuykulmaya Buth pathan yabugud nubepa.

⁷⁷Lak ngidh nungu mabaygal yadu thuriz kedha, thana bangal kedha kuniya gudaz puydhamoeyne, gudwoeyamoeyn thanamun wati pawal.