Luke 1:11-77

¹¹Semal angelusel Samol yesa llah ngali le ye su mo rela gilemra irel altar we.

¹²Yodwe Zechariah ye wiri ngo yesa lluwdah ngo sa budoh yal motog.

¹³Iwe ngo angelus we sa kangalu bo, “Ho towe motog ho Zechariah! Deus yesa rongrong yalol mapel we yam, ila ngo Elizabeth we rim ye bele siylagili semal yalwich mal. Iwe ngo hobe hadeda bo Johannes.

¹⁴Yebe kkel yam raey mo cchehas ngo ye wol cholop rechokla yebe kkel yar raey irel yodla yebe subdoh iyang.

¹⁵Yebe mel le semal mal le ye tagiyet mo fael metal Samol. Ye towe ma yul wine hare hachi ka ye kkel. Ye bela subdoh chog ngo ye mel Espritu Santus uwol.

¹⁶Iwe ngo ye cholop yeramtal Israel le bele hatefalir ngal Samol le yar Deus.

¹⁷Ye bele hamo mo imol Samol le yebe kkel, ngo ye kkemal le yebe wochog profeta Elijah. Ye bele wol hatefali fengalir temtam mo loaloy; ngo ye wol hatefalir yarmat ngal yalap la ye fel; ngo ye hafle ngal Samol mekla lol.”

¹⁸Zechariah sa kangal angelus we bo, “Be ifa sengal ngo isa gola le yebe yoh mekla ho sosor? Ngang ila isa malelap ngo mala riy ila sa wol yulolap.”

¹⁹Angelus we yesa sor bo, “Ngang Gabriel. Ima su fael metal Deus, le iy mele ye fangdoh ngang bo ibe kangalug hapatpat momay le.

²⁰Iwe ngo gel ho ted chepar irel meka ikangalug. Iwe ngo bela hola mala yodol ngo bele llah le ye katos meka ikangalug. Ila towol mmal le hobe hapatpat le fal mala ho te chepar irel meka iy sa kangalug. Ho bele paoy le towol mmal le hobe hapatpat yee la hola yodla ihatugulu ngalug bo be llah le ye katos meka iy kangalug.”

²¹Chowe re wiwidi Zechariah resa luluwaley hare meda mele sa sulay lal Templum we iyang.

²²Yodwe yela buyoy ngo tay mmal le yebe hapatpat. Iwe chog ngo resa gola le Samol yesa llah ngali mo lal Templum we. Tor sepad hapatpat le ye mmal le yebe kangalur. Iwe yesa pongpong ngalir chog.

²³Yela haw bungul yal yengang mo lal Templum we ngo Zechariah sa tefael loh lubugtal.

²⁴Yela wol miril ngo yesa siyal molwe ril, iwe ngo lemow meram le ye mel chog irel imw we imwer.

²⁵Iwe ngo yesa sor bo, “Igala ila Samol yesa holbuwayey bo yesa hachuyaloh maa we yai!”

²⁶Yela wolow meram yael Elizabeth siyal ngo Deus yesa fangdiy angelus we Gabriel irel sew haplom woal Galilee le Nazareth mala idal.

²⁷Angelus we ye hasidoh sew hapatpat irel semal lefechig le Maria idal. Maria ila resa faesul kapta mo semal mal le Joseph idal bo rebe ppao fengal. Joseph ila ye budoh mo irel daowe yael King David.

²⁸Yesa budoh angelus we irel lefechig we ngo yesa kangalu bo, “Ha rrayi lal depom! Samol ye mel irem ngo yesa holbuwah mo luwulur fefel!”

²⁹Iwe sala weres loh lal depel Maria irel mokwe yalol angelus we ngo yesa luluwaley loh chog hare meda fael mokwe yalol angelus we ngali.

³⁰Iwe angelus we yesa kangalu bo, “Maria, ho towe motog. Ye fel depel Deus irem.

³¹Ho bele siyal le hobe dimolwagili semal yalwich mal. Iwe ngo hobe hadeda bo Jesus.

³²Yebe tagiyet ngo rebe ffesangu le iy Lol Deus we ye Hartal Tagiyet. Samol Deus ye bele foru le be mel bo semal king, le be wochog David we yal chaep,

³³ngo ye bele mel le kingel haleng we yael Jacob le towe yor siyal ngo mala lamliyal ila tor yugul!”

³⁴Maria sa kangalu angelus we bo, “Ngang semal birgo. Be ifa sengal chog ngo sala mmal mala ho sosor?”

³⁵Angelus we sa kangalu bo, “Be bidiy Espritu Santus uwom ngo mala kamalal Deus be mel uwom. Ila fal yalwich le ye santus le rebe ffesangu bo Lol Deus.

³⁶Luluwaley Elizabeth we chol bugtam. Iwe re sor bo towe yoh le yebe loloy ngo yela igla le sa yulolap ngo sa wolow mermal yal siyal.

³⁷Bo tor mele towe yoh ngal Deus le yebe foru.”

³⁸Iwe ngo Maria sa sor bo, “Ngang re haforol yalol Samol. Ligdi bo yebe faor ngaliyey le be wochog ikala hosa sor.” Iwe ngo angelus we sa ligdi Maria ye sa loh.

³⁹Yela wol miril ngo Maria sa hamallo fedaley ngo yesa yesa loh le ye nngat wol sew haplom le ye meldah wol tayit mo wol Judea.

⁴⁰Yela bulong lal imw we imwel Zechariah re sala wer fengal mo Elizabeth.

⁴¹Yodwe Elizabeth ye rongrong chog lliyalol Maria ngo yesa mmagud yalwich we mo lal siyal. Iwe ngo yesa bidiy Espritu Santus uwol Elizabeth.

⁴²Ngo yesa tawulagliloh le ye sor bo, “Ho hartal yolbuw mo luwur panger fefel ngo yebe wol yolbuw yalwich la ho bele dimolowagili!

⁴³Meda mele sala wel ngaliyey mele iyang. Meda mele sil Samol la yai sala budoh tefael mo irey iyang?

⁴⁴Yodwe chog iy rongrong lliyalom ngo sa mmagud yalwich le mo lal mele siyey irel yal raey.

⁴⁵Ifa lepal yam raey le yela tugul lal depom le mala yalol Samol ngalug ila ye bele llah le ye katos!”

⁴⁶Maria ye sor bo, “Mele buley ila ye kapingpinga Samol;

⁴⁷sa momay depel mele nguluy bo fael Deus le yai Demer,

⁴⁸bo ye chil luluwaleyey chog le ngang re haforol yalol le iy totol! Bele chaep igla sa loh le pangal yarmat ngo re bele ffesanguyey bo iraey,

⁴⁹le fal mekla ye paleng fal le Deus le ye Hartal Tagiyet sa foru ngalyey: Ye santus mala idal;

⁵⁰Pangal yad ngo ye kaweraloh ffahol ladep la yal ngalir rechoka rema hasrowu.

⁵¹Yesa kaweraloh mala kkelal ngo ye hataropropa yar luluwal rechokla re hattodah.

⁵²Yesa hatetalordiy King kala re tagiyet mo wol mekla liliyer ngo ye hatagitardah rechoka re totol.

⁵³Yesa fang ngalir rechokla re hafohoy pangal mekla ye momay,

⁵⁴ngo yesa ddaberloh rechoka re mmal le tor mele ye fang ngalir. Ye yitli chog liliyel molwe ye hatugulu ngalir chapdoh kowe yach.

⁵⁵Yesa budoh tipingi Israel we yal re hagoloy. Ye luluwaley chog le yebe kkewar ngal Abraham mo panger chol daowe yal ffahol ladep la tor siyal!”

⁵⁶Malbo be suluw meram yal mel Maria irel Elizabeth ngo yesa moch tefael ngal bugtal.

⁵⁷Yela hola yodwe yebe molow Elizabeth iyang ngo ye dimolowagili semal yalwich mal.

⁵⁸Mekla yeramtal mo rechokla re harpa resa rongrong molwe ye kamdidiy we Samol yesa faor ngali Elizabeth. Iwe ngo panger fengal mo Elizabeth ngo yesa raey lal deper.

⁵⁹Yela haw bungul yalwich we ngo resa budoh bo rebe hagilla ngo re hadeda ngal Zechariah we idel molwe temal.

⁶⁰Iwe ngo molwe sil sa sor bo, “Yeab! Mala idal ila be mel bo Johannes.”

⁶¹Iwe ngo resa kangalu bo, “Iwe ngo ifa sengal mala tor semal yeramtam le ila sengal idal!”

⁶²Iwe resa pongpong ngal Zechariah hare ifa sew yid le ye dipli bo yebe hadeda ngali yalwich we.

⁶³Zechariah yesa dongor sew mokwe rema teftaf uwol ngo yesa tefadiy bo Johannes mele idal. Pangerloh ngo re lluwdah irel molwe.

⁶⁴Irel chog yodle ngo Zechariah sa mmal le yebe kaptapat. Iwe ngo yesa chaep yal hapingpinga Deus.

⁶⁵Pangaer rechokwe re tteydoh ngo sa budoh yar motog. Iwe ngo sa palengloh kaptal meka mo wol pangal loh lobowle mo wol Judea.

⁶⁶Panger rechokwe re rongrong kaptal molwe ngo resa luluwaley long lal deper ngo resa kasiy bo, “Be ifa sengal yalwich le wagey? Yesa lleloh le ye mel mala kkelel Samol uwol.”

⁶⁷Espritu Santus yesa bidiy woal Zechariah we temal Johannes. Iwe Zechariah yesa kaptaloh mokwe yalol Deus:

⁶⁸“Siya hapingpinga Samol Deus we yar re Israel! Yesa budoh bo be tipingir ngo ye hataldagir mekla lol.

⁶⁹Yesa hayaho ngalgich Demer we ye tagiyet le ye budoh mo irel daowe yael David we yal re hagoloy.

⁷⁰Muswe chog ngo yesa hatugulu ngalgich mo irer profeta kowe lol we re santus,

⁷¹le iy yebe hadoragich mo irer rechoka re hatodah ngalgich ngo ye taldigich mo irer rechoka re hafobidirigich.

⁷²Ye sor bo yebe kaweraloh ffahol ladep la yal ngalir chapdoh kowe yach. Iwe ngo ye mel chog lal le yebe foru mokwe ye mel lal bogtag we yal ngalgich we ye santus.

⁷³Ye hatosiya ngal Abraham we yach chapdoh le yesa hatugulu le yebe hafaligich mo irer rechokla re hattohar ngalgich. Iwe ngo ye taldigich bo sibe foru mekla yalol le si towe motog,

⁷⁵bo si bela mel le sibe santus ngo si fel mo fael metal irel yodle si molow iyang.

⁷⁶“Gel layi, re bele ffesangug le gel semal profeta le lol Deus we ye Hartal Tagiyet. Ho bele hamo mo imol Samol bo ho bela hafle mala yalepal,

⁷⁷ngo hobe kangalur mokwe lol bo ir ila re bele daor bo ye bele hachuya molfidir.