LUKA 4:4-37

⁴Tsono Jezu adamutawira aciti: “Bzidanembedwa kuti: Munthu ambacira lini na kudya mkate okha basi, maka na fala la Mulungu.”

⁵Ndipo dyabu adamutenga acikwira naye paphiri, acimulatiza kabodzi na kabodzi madziko yentse ya pantsi.

⁶Na tenepo dyabuyo adamuuza kuti: “Ndin'kupasa umambo na mbiri yentse nakuti bzentsebzi mpsangu ndidapasidwa. Ine-pano ningapasembo omwe ndin'funa.

⁷Iwepo ukandipemba, bzentsenebzi bzindzakhala bzako.”

⁸Tsono Jezu adamutawira kuti: “Bzidanembedwa kuti undzatumbize Mbuya Mulungu wako basi. Ndipo ucidzaphatira basa iye yekha.”

⁹Ndipo adamutenga pomwe aciyenda naye kuJeruzalema, acikwira naye pa pantsonga ya Nyumba ya Mulungu acimuuza kuti: “Penu ndiwe Mwana wa Mulungu, bzithuse pantsi.

¹⁰Thangwe bzidanembedwa kuti: “Mulungu an'dzakutumiza anjo zace kuti zidzakukhocherere.”

¹¹Izo zindzakuyakha kuti udzasaye kuchoka minyendo ukadzagwera pa pamwala.”

¹²Ndipo Jezu adamutawira aciti: “Leka kuyezera Mbuya Mulungu wako.”

¹³Pomwe dyabuyo adamala kumuyezera na njira zentse, iye adacoka pang'ono.

¹⁴Jezu adabwerera kuGalileya na mphambvu ya Mzimu. Ndipo mbiri yace idabveka kumii yentse ya mphimpha yomweire.

¹⁵Iye akhapfundzisa mnyumba zakupembera ndipo wanthu wentse akhambamutenda.

¹⁶Pomwe adabwerera kuNazaree komwe iye adakulira, iye adayenda kunyumba ya kupembera pa pasabudu ninga ukhali msambo wace. Ndipo iye adalamuka kuti awerenge.

¹⁷Na tenepo adamupasa bukhu la mpolofeta Zaiya. Ndipo iye adafununkhula pa pambuto pomwe pakhadanemba tenepayu:

¹⁸Mzimu wa Mbuya una ine. Ndipo iye adandidzoza kuti ndikapalizire anyakusauka. Adandituma kuti ndikatsudzule anyakumangidwa na kudzapenyesa azimola, na kudzapasa mtendere anyakupondereredwa,

¹⁹na kudzalewa nthawe yomwe Mbuya adzapulumusa wanthu wace.

²⁰Ndipo iye adafunga bukhulo aciripereka kuna nthena ya nyumba ya kupembera, acikakhala. Ndipo wanthu wentse omwe akhali m'nyumba ya kupemberamo adamubzokola.

²¹Ndipo Jezu adawauza kuti: “Bzakunembedwa bzomwe mwamala kubvabzi, bzatewezeka lero-lino.”

²²Wanthu wentse akhamucitira umboni ndipo acikomedwa pomwe na mafala yomwe iye akhalewayo acimbabvundzana kuti: “Kodi ngumweyu lini mwana wa Zuze?”

²³Tsono adawatawira kuti: “N'cadidi kuti imwepo mun'dzandiwuza mwani ule wa kuti: 'Mulapi, bzilape wekha. Citambo kudziko kwako kuno bzentse bzomwe tidabva kuti udacita kuKafarnau.'”

²⁴Iye adawawuza pomwe kuti: “Ndirikukuwuzani bzacadidi kuti palibe mpolofeta omwe ambatambiridwa bwino kudziko lace.

²⁵Ndiri kukuuzani pomwe bzacadidi kuti panthawe ya mpolofeta Eriya, kuIjirayeri kukhana amamsiwa azinji ndipo kudapita magole matatu na minyezi mitanthatu mbvula iribe kubvumba, kuciwoneka njala ikulu kwene-kwene.

²⁶Na tenepo Eriya alibe kutumidwa kuna amamsiwa wentse, maka kuna mamsiwa m'bodzi yekha omwe akhakhala kuSerepita, pafupi na Sidonya.

²⁷Panthawe ya mpolofeta Erizeu, kuIjirayeriko kukhana wanthumbo azinji anyamapere. Tsono palibe m'bodzi wawo omwe adalapidwa, maka Namani yekha wa kuSiriya.”

²⁸Pomwe wanthu wentse omwe akhali m'nyumba ya kupemberamo, adabva mafala yomweyo, adakalipa.

²⁹Ndipo iwo adamuthotha mumzindamo, mpaka pantsonga ya phiri lomwe mzindayo ukadakonzedwa kuti akamugwinyire kuphompho.

³⁰Tsono iye adapsola na pakati pawo aciyenda.

³¹Ndipo iye adabuluka kuKafarnau, kumzinda wa Galileya, acimbawapfundzisa pasabudu.

³²Wanthu wentse akhadabwa na mapfundzisidwe yace thangwe mafala yace yakhana mphambvu.

³³Mnyumba ya kupemberamo mukhana munthu m'bodzi omwe akhana Ciwanda. Ndipo iye adabvundza acikuwa aciti:

³⁴“Nandi Jezu wa kuNazaree! Kodi takucita ciyani ife-pano? Kodi wabwera kudzatipha? Thangwe ine ndin'kudziwa kale kuti ndiwe Wakucena wa Mulungu.”

³⁵Pamwepo Jezu adacikalipira aciti: “Nyamala! Coka mu munthuyu.” Ndipo ciwandaco cidamugwesera pantsi pomwe pakhana wanthu azinji. Ndipo ico ciribe kumucita kuipa.

³⁶Wanthu wentse adadabwa nabzo, acimbabvundzana kuti: “Kodi bzomwebzi bziri kulewa ciani? Iye ali kutonga na bziwanda kubodzi, ndipo iyo icimubvera.”

³⁷Ndipo mbiri yace idabveka kumphimpha zomwezire zentse.