San Lucas 4:4-37

⁴Orzeꞌ Jesuuz nam rab mi nuras: ―Lat de riidz ni Ñgyoozh rniin: “Walab gyishtily ziꞌl gyicy ñi nu cui mbañ mbecy”, rniiñ ―nam.

⁵Gazeꞌ nu nuras gua nuy mi tub zeꞌ nu gya. Orzeꞌ nañ tub miiñ ziꞌl blyuuy dela lugaar ni gyishlombecy lom.

⁶Orzeꞌ nay: ―Ya̱ gyicya̱ nu gac gyub ic ru dutuub la gyishlombecy ii, nunu grica̱ dela gyel nap nu yuꞌ loñ nir. Ya̱ bi guud ñi ne̱, nunu gac grica̱ ñii ni cyu ziꞌl mbecy nu rlagya̱.

⁷Ya̱ grica̱ ndeꞌ nir benu zu tib ru lo̱ nu griib zily ru ya̱ ―nay.

⁸Orzeꞌ Jesuuz nam rab mi nuras: ―Gun lat de riidz ni Ñgyoozh rniin: “Briib zily Shuaan ru, biñ nu nac Ñgyoozh nir, nunu se coz nu rlagy ziꞌl mi gyicy ru”, rnii riidz nim ―na Jesuuz.

⁹Gazeꞌ nu za nu nuras mi par Jerusaleeng. Orzeꞌ pshup yum zeꞌ nu gya zir ni yuꞌ nu driib zily de mbecy Israeel Ñgyoozh. Orzeꞌ nay rab yu Jesuuz: ―Benu rishli gaal nac ru iꞌñ Ñgyoozh, orzeꞌ bzut yeñ gashtal lo yu la re.

¹⁰Gun lat de riidz ni Ñgyoozh rniiñ: Ñgyoozh cuꞌm riiñ yaa de anc nim nu ña dey ru, nunu wazaan dey nu shiñ gzac ru.

¹¹Orzeꞌ lagy yaa dey ru, gun orzeꞌ cueꞌ nu gad güii par ni gyiꞌr lo de gyitaꞌ, rniiñ, nay.

¹²Orzeꞌ Jesuuz nam rab mi yu: ―Niꞌ ziꞌl rniiñ lat de riidz nim: “Cueꞌ gyicy ru preb Ñgyoozh, Shuaan ru”, rniiñ ―na Jesuuz.

¹³Orzeꞌ nuras wangadaꞌ mod nu ñgyicy yu preb Jesuuz. Orzeꞌ bruu chuy lom par la be tiem.

¹⁴Orzeꞌ Jesuuz ya gaꞌm par lo de yu ni Galilea, nunu riib ic zaꞌ la Espiriit Yon ni Ñgyoozh mi. Orzeꞌ brush las riidz ni de coz nu bicy mi dela lugaar nu yuꞌ gaab ga zeꞌ.

¹⁵Orzeꞌ rlyuum nañ de yuꞌ nu rsyaꞌ de mbecy Israeel riidz ni Ñgyoozh de ga la lugaar zeꞌ nu rded mi. Nunu dela mbecy ryabic dey gyel mbecy nim.

¹⁶Orzeꞌ Jesuuz yam Nazaret, gyedz zeꞌ nu guul mi. Na ornu pshuub sab, dzi nu rzu lagy de mbecy Israeel, orzeꞌ bicy mi gal mod nu nil ricy mi. Orzeꞌ guꞌm nañ yuꞌ zeꞌ nu rsyaꞌ dey riidz ni Ñgyoozh. Gazeꞌ nu wes sum nu lab mi riidz ni Ñgyoozh.

¹⁷Orzeꞌ briic dey libr ni Isaías, tub yu nu rnii por cuen ni Ñgyoozh, par nu lab mi. Na ornu pshaal mi looñ, orzeꞌ byap mi zeꞌ nu cañ nu rniiñ:

¹⁸Espiriit Yon ni Ñgyoozh Shuaana̱ riib ic mi ya̱, gun bzum ya̱ nu cha̱ ne̱e̱ de riidz nu sac lo de mbecy zi. Nunu bzuu nez mi ya̱ par nu gyicya̱ nu cueꞌ gyub ic reñaꞌ coz nañ lardoo de mbecy. Nunu bzuu nez mi ya̱ nu gyicya̱ nu zac de mbecy nu wacsac. Nunu bzuu nez mi ya̱ par nu gyicya̱ nu gruu nap de mbecy nu rzac zi nu nac nu shiñ ricy nu de losaꞌy yu.

¹⁹Nunu bzuu nez mi ya̱ nu ne̱e̱ lo dela mbecy nu bi pshuub ñaꞌn nu nap gyicy nu Ñgyoozh dela mbecy, rniiñ, nam.

²⁰Laab ndeꞌ la. Orzeꞌ Jesuuz ptub mi gyicy zeꞌ. Orzeꞌ byabic mi ñii ni yu nu zu riiñ nañ yuꞌ zeꞌ. Orzeꞌ gusub mi. Orzeꞌ mbi la bgüii de yu nu yuꞌ nañ yuꞌ zeꞌ lom.

²¹Orzeꞌ brugyiꞌ rniim. Orzeꞌ nam rab mi dey: ―Lat nu blaba̱ de riidz zeꞌ lo der, orzeꞌ byuꞌ niñ ―nam.

²²Orzeꞌ dela mbecy nap mnii dey nu nac Jesuuz, nunu bet lagy dey de riidz cyit na nu mniim. Orzeꞌ na dey rab dey losaꞌy: ―Zeꞌ, ¿a walab yu ii iꞌñ See? ―na dey.

²³Orzeꞌ na Jesuuz rab mi dey: ―Ya̱ rad lagya̱ nu segur la nii der tub riidz cyit. Riidz zeꞌ, ndeꞌ: “Ru nac ru tub mbecy nu ricy guñaa. Orzeꞌ gyicy yac ru ub ru. Orzeꞌ gal nu bicy ru gyedz Capernaum, niꞌ ziꞌl gyicy ru ledz ru ii”, nii der lo̱.

²⁴Ya̱ rishli rne̱e̱ lo der nu ni tub la mbecy nu rnii por cuen ni Ñgyoozh, de mbecy ledz yu wagyicy cuen dey yu.

²⁵Gun rishli gaal tonaꞌ la yuꞌ byud Israeel tiem ni Elías, yu nu mnii por cuen ni Ñgyoozh, tiem nu wangyet gyey chon naꞌñ nu. Nunu tonaꞌ la byan mbecy dutuub la lugaar zeꞌ.

²⁶Tees Elías wanchay lo ni tub la byud nu yuꞌ Israeel, sinu guay lo tub byud nu rcyiiñ Sarepta. Ndeꞌ tub gyedz nu ri gaab ga Sidón.

²⁷Niꞌ ziꞌl tiem ni Eliseo, yu nu mnii por cuen ni Ñgyoozh, tonaꞌ la zigy de mbecy Israeel gurat yu gyedz nu la lepra. Tees ni tub la dey wangyac yu. Nomaas byac tub mbecy nu la Naamán. Yu zeꞌ tub mbecy nu bruu lo yu ni Siria ―nam.

²⁸Ornu güeñ dela mbecy nu nguaa nañ yuꞌ zeꞌ de riidz nu mniim, orzeꞌ tonaꞌ la pchaꞌ ic dey.

²⁹Orzeꞌ wes su dey, nunu gua nu dey Jesuuz por fers la par ruꞌ gyedz zeꞌ. Gazeꞌ nu pshup dey mi too tub bicy zeꞌ nu ri gyedz zeꞌ, gun bicy pee dey nu nshet lag dey mi gal zeꞌ nu gya ni bicy zeꞌ, gal lo yu la.

³⁰Orzeꞌ bded mi lat dey yam.

³¹Orzeꞌ Jesuuz yam tub gyedz nu ri lo yu ni Galilea nu la Capernaum. Orzeꞌ sab, dzi nu rzu lagy mbecy Israeel, guꞌm nañ yuꞌ zeꞌ nu rsyaꞌ de mbecy Israeel riidz ni Ñgyoozh par nu lyuum ni dey.

³²Orzeꞌ de mbecy za nu la ic dey nu nac coz nu rniim, gun rlyuum ni dey gal nu rlyuu tub mbecy nu riib ic zaꞌ la.

³³Na nañ yuꞌ zeꞌ ri tub mbecy nu bicy ni nuras. Orzeꞌ ye la rbish tiy.

³⁴Orzeꞌ nay rab yu Jesuuz: ―Bruu chu. ¿Lagu yad ru lat de̱, Jesuuz, biñ nu bruu Nazaret? ¿A yad ru par nu zaꞌ lor de̱ ya̱? Ya̱ rad lagya̱ nu ru nac ru mbecy yon ni Ñgyoozh ―nay rab yu Jesuuz.

³⁵Orzeꞌ Jesuuz bdzaꞌm ni nuras zeꞌ. Orzeꞌ nam rab mi yu: ―Dzi chel, nunu bruu chu lo yu ii ―nam. Orzeꞌ nuras zeꞌ mneꞌy mbecy zeꞌ lo yu lo rgüii la dela mbecy. Orzeꞌ gazeꞌ nu bruu chuy lo mbecy zeꞌ, nunu se la la bicy yu.

³⁶Orzeꞌ dela mbecy nu yuꞌ zeꞌ gudzib dey. Orzeꞌ na dey rab dey losaꞌy: ―¿Lac yaruu nu nii? ¡Mbecy ii ricy cup yu rishbeey, nunu ricy cup yu mod nu ricy yu mandaar gashtal nuras, nunu orzeꞌ druu chu dey lo mbecy! ―na dey.

³⁷Orzeꞌ lueg la bzu riidz ni de coz nu bicy Jesuuz dela lugaar nu yuꞌ gaab ga.