Lukaj 4:4-37

⁴A Iejuj kotin japen i majani: A intinidier: Kaidin prot eta, me aramaj en memaureki, pwe majan en Kot akan.

⁵Tewil ap kaluadalan i pon nana ileile eu o kajala on i wein jappa karoj ni marep taieu.

⁶Tewil indan i: I pan ki on komui manaman pukat karoj o a linan, pwe a muei on ia er, a i pan ki on, me i mauki.

⁷Ari, ma komui pan poni ia, karoj ap pan japwilim omui la.

⁸Iejuj kotin japen i majani: A intinidier: Koe en poni on Kaun om Kot; i eta, koe en papa.

⁹I ap kalualan i Ierujalem o kauada i pon konkon en im en kaudok o indai on i: Ma komui japwilim en Kot, kajedi pein komui,

¹⁰Pwe a intinidier: A pan kajilaki japwilim a tounlan kai komui, pwen apapwali komui.

¹¹O wa komui nan lim ar akan, pwe aluwilu omui der dipikelekel ni takai eu.

¹²Iejuj kotin japen majani on i: A lolokido, koe ender kajonejon Kaun om Kot!

¹³Tewil lao kanikiela jonejon karoj, ap muei jan i anjau kij.

¹⁴Iejuj ap kotin pure don Kaliläa ni rojon en Nen, ap indand jili nan jap karoj me mi imp a.

¹⁵A kotin kaukawewe nan ar jinakoke kan, o karoj kapina i.

¹⁶A kotin lel Najaret, waja a kotin kakairida ia, ap kotilon jon nan jinakoke duen a kin wiada ni ran en japat o kotida, pwen wadok.

¹⁷Puk en jaukop Iejaia ap wijike don i a lao lim pajan puk o ap diarada waja o me intinidier:

¹⁸Nen en Kaun kotikot re i, i me a keie kin ia da, pwen padaki on me jamama kan ronamau. A kadar ia do, pwen kaloki on me jalidi kan, me ren jaladokela, o me majkun akan pan kilan waja, o me patau kan pan maioda,

¹⁹O kaloki jaunpar mau en Kaun o.

²⁰A kotin lim pena puk o ap kupure on me papa men o kotidi. Maj en karoj nan jinakoke kankakil i.

²¹I ari tapiada majani on irail: Kijin likau wet pwaidar mo ’mail ran wet.

²²Ir karoj ap kadede o puriamuiki majan kompok kan, me pwili jan jilan i, ap indada: Kaidin i nain Iojep?

²³A ap kotin majani on irail: Nan melel, komail pan indan ia karajeraj wet: Jaunwini, jauaja pein uk! Pwe je ronadar duen jon kapuriamui, me wiauier nan Kapernaum; ari kom pil wiada dueta waja et nan jap omui.

²⁴A kotin majani: Melel I indai on komail, jota jaukop amen me konekon nan jap we.

²⁵A melel I indai on komail, li odi toto mi nan Ijrael ni muein Eliaj, ni anjau nanlan matata par jilu o jaunipon wonu, ni lek lapalap kipadi jap karoj;

²⁶A jota amen, me Eliaj pakadar won, pwe ren li odi men nan Jarepta nan jap Jidon.

²⁷O me tuketuk kan me toto nan Ijrael ni muein jaukop Eliaj, a jota amen re ’rail, me kelailadar, pwe Naeman eta men Jirien.

²⁸Karoj, me mi nan jinakoke ni ar ronadar mepukat, ap makar kida kaualap,

²⁹Re udar jikonlar i jan kanim o, o kalualan i pon kailan dol o, waja ar kanim kakaudar ia, pwen kajedi jan ia,

³⁰A i kotin weid nan pun ar, kotila jan irail.

³¹I ari kotilan Kapernaum kanim en Kaliläa, o kotin kawewe on irail ni ran en japat akan.

³²Irail ari puriamuiki a padak, pwe a majan me manaman.

³³A aramaj amen mi nan jinakoke, me nen en tewil jaut amen ti po a, me weriwer laud,

³⁴Inda: Ko jan kit, menda re omui kit Iejuj en Najaret! Kom kotido, en kawe kit ala. I aja, me komui nain Kot jaraui.

³⁵Iejuj ap kidaue i majani: Nenenla o ko jan re a. Tewil lao kajedi i nan pun arail, ap koiei jan re a, jota me jued kot a wiai on i.

³⁶Irail karoj ap puriamui kila, kajokajoi nan pun arail indada: Dakot majan pot et? Pwe a majan manaman o rojon on nen jaut akan, irail ap kin ko wei jan.

³⁷I ari indand jili nin jap karoj waja o.