Luka 4:4-37

⁴Iesu arinana i heuio, i ene, “Se uriyao meta si ene, ‘Areto mo taba nige tau i mauriei, Eaubada ena riba gamagaridi eai hinage’.”

⁵Diabolo ia i woeai oea deba pogana eai, ma esega tanoubu basileia gamagaridi ia i heitadi.

⁶Diabolo i ribalau ia arinai, i ene, “Teina gigibori ta abo ea lediwaheohidi, ma tepodi hinage, paana se ledimao arigu eai, taba ea ’ne ea mosedi abo ea mosedi.

⁷Ena u tabaohuiguma, gamagaridi abo enam.”

⁸Iesu arinana i heuio, i ribalau ia arinai, i ene, “Satani e, u lausuara murigu eai: si uriyao, si ene, ‘Guiau em Eaubada, taba u aihelahui ede iabom mo taba u heaeaiei ede.’”

⁹Ia abo i woeasae Ierusalema eai, dubu lailai isu saesaena eai ie tore, i ribalau ia arinai, i ene, “Ena oa Eaubada Natuna ede, hage u gabadobem:

¹⁰doha se uriyao, si ene, ‘Ena aneru abo i hetorodi se itawataikomakomanim:

¹¹isi nimadi eai abo se abiisinim, ata aem u hetupanei we’u eai.’”

¹²Iesu arinana i heuio i ribalau ia arinai, i ene, “Si ene, ‘Guiau em Eaubada tabu u nohoi.’”

¹³Diabolo ena noho gamagamagari se ohi, i lausuara i lau e huia esau.

¹⁴Iesu Earua Tabuna ena gigibori debana eai i uio Galilaia eai; ia wasana i lau eanua gamagamagari i hetaiiridi.

¹⁵Edi sunago gamagamagari alodi eai i lauheataedi, tatao gamagaridi ia se hedebasaei.

¹⁶Ia abo ie lage Nasareta eai, eanua wa ia abaabihelaina: ia kamanina, asubena Sabati eai i awasae sunago alona eai, i totoro bena buka i hasiri.

¹⁷Isaia peroveta ena buka se mosei ia arinai, Buka wa ie ala, abauriurina wa i lobai si uri ina doha.

¹⁸“Guiau ena Earua Tabuna eau potagu eai, paana i heyausigu gogogesagesa tataodi wasa lolona abo ea lauguguiaidi; i hetamarigu taunuanuadubu abo se henuabigadi, tatao auaudi lebohai ribana abo se lauguguiaidi, tatao matagibugibu matadi abo se helaladi, isi se hebaaeadi abo se eairigabaedi.

¹⁹Guiau ena huia lolona ina abo ea lauguguiaei.”

²⁰Buka wa abo i heapu, abo i moseuioi sunago tauitawataina arinai, abo i bawabigabiga. Tatao gamagamagari sunago alona eai se itaitagogolau ia arinai.

²¹Riba wa i ribahetubu aridi eai, i ene, “Ina asubena ta teina uriuri ta beamiu eai se hemamohoiei.”

²²Gamagaridi ia se riba helolo eo riba amna wa ia awana eai se laoma se noonooedi. Eo si ene, “Teina ta Iosepa natuna, e nige’e?”

²³Ie ribalau aridi eai, i ene, “Mamohoi teina riba sonoga abo au ribalaoma arigu eai abo au ene, ‘Doketa e, u hemauriuioim: hari laulau eo hari laulau wasadi ai ataiedi Kaperenauma eai u ginauridi, em eanua mamohoi eai ta abo hinage u ginauridi.’”

²⁴I ene, “Mamohoi, ea heribamiu ta, nige peroveta esau ena eanua mamohoi eai se hemataei.

²⁵Riba mamohoina ea heribamiu ta, Elia ena huia eai wabu gamagaridi Isaraela eai se mia, galewa se gudu wa borimai haiona eo nawalai haligigi‐esega, eanua gamagamagari guriam lailai se hearo;

²⁶Elia nige se hetamari aridi eai, i lau mo Sarepeta, Sidona eai, sine esau arinai, sine wa ie wabu.

²⁷Hinage Elisaia peroveta huiana eai, lepera tataodi gamagaridi Isaraela eai se mia, nige esau se heaa. Naamana Suria tauna iabom.”

²⁸Isi gamagaridi sunago alona eai, teina ginauri ta se ataiedi, abo se ouyalayala ariri.

²⁹Se torohai, se abilau ia arinai se heduheduiahalai eanua murimurina eai, abo se woeasaei edi eanua oea tupina eai, ia bena se hedonapiledobei.

³⁰Isi boeadi eai i sapurihai, i lauo ena dobila eai.

³¹I dobima Kaperenauma, Galilaia eanuana esau, asubena sabate gamagamagari i lauheataedi.

³²Ena lauheata wa se noonooei: paana ena riba ma gigiborina.

³³Tau sunago alona eai, earua biibiina ie lui, i eabayaba arinana lailai.

³⁴I ene, “Taiede tabu u laoma arimai eai; oa Iesu Nasareta abo ai sahaim? U laoma bena u unuimai wa? Ea itam’o; oa Eaubada ena Tau Tabuna.”

³⁵Iesu ia i ribasuui, i ene, “U monou me, u lulage murimuri eai.” Diabolo tau wa i heguri boeadi eai, ia abo i lulage murimuri eai, tau wa nige i hebaaea.

³⁶Isi gamagamagaridi se noonoo, se heuheunaboisaha, si ene, “Riba sahasaha ina? Ma gigiborina earua biibiidi i lauhesomdi, abo se lulage murimuri eai.”

³⁷Ia wasana lailai i lau dimo gamagaridi oea wa se tauhetaiiri.