LUKA 24:11-52

¹¹To edia hereva be gori ena mamina bamona, vadaeni idia abia dae lasi.

¹²To Petero ia toreisi, ia heau lao, guria gabuna ena lalona ia itaia, dabua sibona ia noho. Vadaeni iena ruma dekenai ia giroa lou, idia vara gaudia dekenai ia hoa.

¹³Unai dina dekenai, tau rua be hanua maragina ta, ena ladana be Emausa, dekenai idia lao, Ierusalema bona unai hanua edia huanai be 12 kilomita hegeregerena.

¹⁴Dala dekenai inai idia vara gaudia idia herevalaia idia sibona dekenai.

¹⁵Vadaeni idia herevahereva neganai, Iesu be idia dekenai ia raka kahirakahira lao, idia danu ia raka hebou.

¹⁶Tauna idia itaia, to idia diba lasi ia be Iesu.

¹⁷Iesu ia gwau, “Umui be dala dekenai dahaka umui herevalaia?” Vadaeni idia ruaosi idia gini, edia vairana be mai metau danu.

¹⁸Vadaeni idia ta, ena ladana be Kleopa, ese ia haere henia, ia gwau, “Oi be Ierusalema dekenai sibona oi noho, unai dainai inai gaudia idia vara be oi diba lasi, a?”

¹⁹Ia gwau, “Dahaka gau?” Idia gwau, “Iesu, Nasareta tauna, ena sivarai. Ia be peroveta tauna, Dirava ena vairana dekenai, bona taunimanima ibounai edia vairana dekenai, iena kara bona iena hereva be mai siahu danu.

²⁰To dubu biagudia bona hanua lohia taudia ese iena mase dala idia karaia, idia hasatauroa.

²¹To ai laloa bona ai gwau ia be Israela edia hamauria tauna. Dina toi idia ore vadaeni unai gaudia idia vara.

²²Harihari aiemai hahine haida edia hereva dekenai ai hoa. Idia be daba maragi guria gabuna dekenai idia lao.

²³To iena tauanina idia davaria lasi, vadaeni idia giroa mai, idia gwau aneru haida idia itaia, bona unai aneru ese idia hamaoroa idia dekenai, idia gwau ia be ia mauri lou vadaeni.

²⁴Bona aiemai turana haida danu guria gabuna dekenai idia lao, hahine edia hereva hegeregerena idia davaria, to Iesu be idia itaia lasi.”

²⁵Vadaeni Iesu ese idia ia gwau henia, ia gwau, “Kavakava taudia, emui lalona be dibura, peroveta taudia edia hereva umui abia dae lasi!

²⁶Ia maoro lasi a, Keriso ese unai bamona do ia hisihisi, bona iena hairaina do ia abia?”

²⁷Vadaeni Mose bona peroveta taudia edia buka dekenai, iena sivarai herevadia ibounai edia anina, be Iesu ese idia dekenai ia hadibaia.

²⁸Idia lao henia hanua be ia kahirakahira, vadaeni Iesu be ia raka hanaia gwauraia.

²⁹To idia ruaosi ese idia dogoatao, idia gwau, “Do ita noho, badina be ia adorahi vadaeni, dina be kahirakahira do ia diho.” Vadaeni idia danu ruma dekenai idia daekau.

³⁰Idia toiosi aniani gabuna dekenai idia helai diho, vadaeni Iesu ese paraoa ia abia, ia hanamoa, ia makohia, idia ruaosi dekenai ia henia.

³¹Vadaeni edia matana idia kehoa, idia diba ia. Vadaeni edia vairana dekena amo ia boio.

³²Vadaeni idia ruaosi sibona idia herevahereva, idia gwau, “Dala dekenai ia hereva ita dekenai, bona Buka Helaga ena anina ita dekenai ia hadibaia neganai, iseda lalona be idia siahu, ani?”

³³Vadaeni idia toreisi, Ierusalema dekenai idia giroa lou, taudia 11 mai edia turana danu idia hebou noho neganai idia davaria.

³⁴Idia ese idia ruaosi dekenai idia hamaoroa, idia gwau, “Momokani, Lohiabada be ia toreisi vadaeni! Simona ese ia itaia vadaeni!”

³⁵Vadaeni idia ruaosi ese dala dekenai idia vara gaudia idia hamaoroa idia dekenai, bona paraoa ia makohia neganai edia lalona idia kehoa herevana danu.

³⁶Idia hereva noho neganai, Iesu be edia huanai ia gini, ia gwau, “Maino umui abia.”

³⁷Idia be edia kudouna dekenai idia hoa, idia gari dikadika, idia laloa ia be lauma ta.

³⁸To Iesu ia gwau, “Badina dahaka umui emui kudouna idia hoa? Badina dahaka umui laloa daradara?

³⁹Egu imana bona egu aena umui itaia, lau inai. Egu kopina dekenai do umui dogoatao, vadaeni do umui diba, badina be lauma be tauanina lasi bona turiana lasi, inai lau umui itaia hegeregerena.”

⁴⁰Inai bamona ia hereva, vadaeni iena imana bona ena aena ia hedinaraia idia dekenai.

⁴¹To idia moale bona idia hoa dainai, do idia laloa daradara noho. Vadaeni Iesu ese ia nanadaia idia dekenai, ia gwau, “Emui aniani sisina ia noho, o?”

⁴²Idia ese gwarume sisina, idia gabua gauna, idia henia.

⁴³Vadaeni ia ese ia abia, edia vairana dekenai ia ania.

⁴⁴Ia ese ia hereva henia idia dekenai, ia gwau, “Ita noho hebou neganai umui lau hamaoroa, Mose bona peroveta taudia edia Buka dekenai, bona Salamo Buka dekenai, lauegu sivarai idia torea herevadia ibounai, be do idia momokani.”

⁴⁵Vadaeni ia ese Buka Helaga ena anina ia hadibaia idia dekenai, ela bona edia lalona idia kehoa.

⁴⁶Ma ia hamaoroa idia dekenai, ia gwau, “Inai bamona ia torea vadaeni: Keriso ese unai bamona hisihisi do ia abia, bona dina toi murinai mase dekena amo do ia toreisi lou.

⁴⁷Vadaeni Keriso ena ladana dainai, lalona giroa bona dika gwauatao do idia harorolaia gabu ibounai dekenai. Ierusalema dekenai inai gaukara do umui hamatamaia, ia lao bona tanobada besedia ibounai dekenai do idia harorolaia.

⁴⁸Umui ese inai gaudia ibounai emui matana dekenai umui itaia vadaeni, unai dainai do umui gwauraia hedinarai.

⁴⁹Bona Harihari Gauna, egu Tamana ese umui dekenai ia gwauhamata do ia henia, be lau ese emui latanai do lau siaia diho. Umui be Ierusalema dekenai do umui noho, ia lao bona ataiai dekena amo do ia diho siahuna do umui abia.”

⁵⁰Vadaeni Iesu ese idia ia hakaua murimuri dekenai, ela bona Betania idia kahirakahira vadaeni. Vadaeni iena imana ia abia isi, ia hanamoa idia dekenai.

⁵¹Idia dekenai ia hanamoa noho neganai, ia be idia dekena amo ia abia siri, ia abia daekau guba dekenai.

⁵²Idia ese idia tomadiho henia ia dekenai, vadaeni mai moale danu Ierusalema dekenai idia giroa lou.