Luk 24:11-52

¹¹Weni wivinesi ivi sisiya na Yesu kana kivikivina ke iti tumaghanesi, inotai da ivivi sisiya wapawapa.

¹²Ma Pita ina kina kava ivomiiri ma iverau da ku karawaga. Ma ku buba irugenara da Yesu tupuwina kana gere kava ikitai. Ma ivovovira ku numa ma aviyavisina itupuwa na inota kavakavai.

¹³Ma bade nani maranai na Yesu kana kivikivina ruwa Jerusalem ikuyowei da ibaba inenae ku Emeyas kwanatuna.

¹⁴Ma i baba kamonai na aviyavisina kudubina itupuwa na ivivi sisiyei.

¹⁵Ivivi sisiya na Yesu kurisi inekiibau da yavata ibaba patapata.

¹⁶Ma kana kivikivina matasi ikiivurei da Yesu ke ita vogiini.

¹⁷Ma ivi tarakiiyanesi bo, “Aviyavisina koisisiyei?” Ma ere nuwadugarisi ivi kiimiiriyesi ma idune.

¹⁸Ma sago, kana vava Kiriyopas ivi tarakiiyana bo, “Numanumataya peyarisi iakovi da aviyavisina Jerusalem kamonai etuputupuwa ma ikikava tam ina kim kava ke kutakovi?”

¹⁹Ma ivi tarakiiyanesi bo, “Avi berasi?” Ma ivonapotei bo, “Aviyavisina itupuwa Nasaret wawaya Yesu kurina. Tuna na peroveta ma God ma wawaya ku matasi ina sisiya ma ina bera peyarina na ivi rewapana kirakai.

²⁰Ma taparoro babadisi i babada ma Jerusalem damkai akii babada na tomowina iviiya ma kupuna damsi ku imasi iterei. Ma ti na ivi tupavirei ma ivonakiiyaragha da ita rabobo ma korosiyai ituparatui.

²¹Tokai kanotai da tuna tomowina Israel damta iti yawasita. Akii nuwapoya irakata, ma ku tepana na weni berasi murinai na ke sago biibiina ita tupuwa. Ma namada mara aroba ikovi.

²²Ma bade wivine viya kamokiiyai sisiya sago ivonekai na kavi deyei. Karako ivi mara ku karawaga ma irui ku buba kamona

²³da Yesu tupuwina ikita kavai. Ma ivovira ivonekai da aneya ikitisi. Ma sisiya gwabisiyai iviiya da Yesu na yawayawana.

²⁴Ma akii wawaya viya inae ku karawaga ma ikikava wivinesi ivivi sisiya na nakanani ipanani. Ma Yesu ke ita kitai.”

²⁵Ma Yesu ivonesi bo, “Tami neghaneghami ma gayama butabutami da aviyavisina peyarina peroperoveta ivivi sisiyei na ke koti tumaghanei.

²⁶Kotakovi da God ina kayowana da ina Vivinevine Wawayina iti kamaghi kirakiiyei ma ita rabobo ma murinai kana ku kadara ita rui.”

²⁷Vaghina ma Yesu ivi karei da ikikava giruma katamana kamonai God ina Vivinevine Wawayina ivi sisiyei na peyarina kurisi ivi debei. Kunona Moses aviyavisina igirumi na ivi sisiyei ma muriyai peroperoveta viya i giruma na iyamsi ivi sisiyei kurisi.

²⁸Namada ku Emeyas inenekiibau ma Yesu iberai da nama maninina ita nenae.

²⁹Ma kegha da kana kivikivina ivonatani. Ivona bo, “Ke kuna nae. Takena iyamna mara ikovi, namada ravi ipika.” Vaghina, ivovira ma yavata irui da imakai.

³⁰Kam kubiine na parawa iviiya ma God ivi kiikiiwei ma ivogimai. Ma ivi karei da ita veresi.

³¹Tuna maranai matasi ikiigigiri da kwinasi ikita bubuni da tuna na Yesu. Ikitakitai na iwapa.

³²Ma ti mani ivonavona bo, “Tuna kubiine ita baba kamonai giruma katamana kamonai miiba gavugavusi ivivi debei kurita na nuwanuwata itonatonai ma tavivi nuwabiibii kirakiiyei.”

³³Nani murinai ivi ruwa ivomiiri da maninina ivovirame ku Jerusalem. Ma nani dobunai kana kivikivina ivi 11 ma turaturasi viya namada ivi kiidaburana na ipananisi.

³⁴Ma ivi yanesi da peyarisi ivivi sisiya bo, “Vonavaghata da Bada rabobowai ivomiiri! Saimon kurina inekiibau!”

³⁵Ma ivi ruwa turaturasi ivi akovisi da aviyavisina tupuwa i baba kamonai, ma bade ikikava ivogiini da tuna Yesu, maranai parawa ivovogimai.

³⁶Ivivi sisiyei ma nani kamonai Yesu inekiibau da kamosiyai imiimiiri ma ivona bo, “Nuwanuba gwabimiyai ina makai.”

³⁷Ivi tataghanisi da iyabumana ma ogariri igheyesi ma inotai da nama momosika ita kitakitai.

³⁸Ma ivonesi bo, “Ke kona yabumana. Ami nota ke ina ragharagha ma ke ina gisi.

³⁹Imaku ma kaeku kokitai. Wena na taku! Kovotovoniku da damina kona viiya. Momosika viyosi ma tuwirisi kegha.”

⁴⁰Weni nakanani ivi sisiya kana kivikivina kurisi ma imana da kaena ivi beyesi.

⁴¹Peyarisi inota kavakavai da ke nuwanuwasi kudubinai iti tumaghana ma kegha da ivi nuwabiibii kirakai. Tuna kubiine Yesu ivonatovonisi bo, “Kade, aviyavisina emakamakai da ata kani?”

⁴²Iyana gibugibuna iverei,

⁴³ma kana kivikivina matasiyai Yesu nani iyanina ikani.

⁴⁴Ma ivonesi bo, “Rorova yavata tamakamakai na avonemi da aviyavisina Moses ina vonaviyoyovana ma peroperoveta ma Psalms kamonai igirugirumi da ita tupuwa kuriku na God ina kayowana da kudubina ina tupuwa.”

⁴⁵Muriyai i nota ivotawei da sisiya giruma katamana kamonai na iyamsi itakova bubuni.

⁴⁶Ivonesi bo, “Weni nakanani igiruma. ‘God ina Vivinevine Wawayina ini kamaghi kirakiiyei ma ina rabobo, ma mara viarobina kamonai na ina vomiiri.’

⁴⁷Ma bade igiruma da kana kivikivina ina dima da wawaya i berabero ininimayei ma ina miirikupukuputei da God i berabero ina notatawei. Jerusalem kamonai dima ini karei ma muriyai ina kiibau da dam ma dam kurisi.

⁴⁸Tami na weni berasi kudubina kana vivimamatara wawayimi.

⁴⁹Ma aku Mamai ikikava vonakiiyapa bagibagina iterei da ita puyomi na taku berana ana berai, puyona ana vonatawei kurimi. Tuna kubiine Jerusalem kamonai kovi koyakoyagha da rewapana kunumai inoru da ina towatepanimi.”

⁵⁰Vaghina ma, Yesu kana kivikivina irutinisi da Jerusalem ikiibutawe inae ku gawara sago Betani kwanatuna ririnai. Imana ivororona ma ivi biibiinisi.

⁵¹Ivivi biibiinisi kamonai na God iviitawei da ighae.

⁵²Ma kana kivikivina Yesu ivokavakavari ma nuwabiibiiyai ivovirame ku Jerusalem.