Luk 24:11-52

¹¹Mba moloku mamɔkɔ mɛnayi ŋa pəmɔ ntɛ abəc ŋandelok-lokər ŋa mɔ, ŋanalaŋ fɛ moloku ma aran akakɔ.

¹²Kɔ Piyɛr ɛyɛfɛ, k’ɛyɛksɛ kəkɔ nde dəkufu. Ntɛ ontulnɛ kəmɔmən mɔ, ɛnəŋk fɛ daka o daka mɛnɛ mopol ma kəloto mɔkɔ mɛnafəntərɛ dəntɔf mɔ; k’ɛyɛfɛ k’ɔŋkɔ ndɔrɔn, pəciyanɛ kɔ tɔkɔ ɛnəŋk mɔ.

¹³Dɔsɔk din dadɔkɔ, acɛpsɛ a Yesu darəŋ mɛrəŋ ŋac-kɔ dare dɔlɔma ndɛ aŋc-we Emayus mɔ, dare dɛnayi, ndɛ dɛnabɔlɛnɛ Yerusalɛm kəkɔt ka dec mɛrəŋ mɔ.

¹⁴Afum akaŋɛ mɛrəŋ ŋac-lokɛnɛ mes mɔkɔ meŋcepər mɔ fəp.

¹⁵Ŋayi kəlokɛnɛ mes mamɔkɔ, ŋac-gbɛkəlɛnɛ, kɔ Yesu ɔlɔtərnɛ ŋa, kɔ ŋasol.

¹⁶Mba paka pɔlɔma pɛŋc-yaməs ŋa kənɛpəl kɔ.

¹⁷Kɔ Yesu eyif ŋa: «Ake moloku mɔ nəyi tantɛ nəŋkɔ mɔ?» Kɔ ŋaŋcəmɛ, kɔ dis dɛndɛŋcɛ ŋa.

¹⁸Kɔ wəkin wəkɔ aŋc-we Kəleyopas mɔ, oloku kɔ: «Məna sona gboŋ, məna eyi mɔkɔ Yerusalɛm nwɛ ɔntɔcərɛ ntɛ teŋcepər mata mamɛ mɔ?»

¹⁹K’eyif ŋa sɔ: «Ake?» Kɔ akakɔ ŋaloku kɔ: «Ntɛ teŋcepər teta Yesu wəka Nasarɛt, nwɛ ɛnayɔnɛ wədəŋk wəka Kanu wəpɔŋ mɔ; ɛnamentər ti dəmɔyɔ kɔ dəmoloku, fɔr ya Kanu kiriŋ, kɔ nnɔ afum ŋayi mɔ.

²⁰Aloŋnɛ apɔŋ asu, kɔ abɛ asu aka dɔtɔf ŋalɛk kɔ, kɔ ŋambɛr kɔ afum dəwaca, k’aŋcaŋ kɔ dəkətɔk kəpandən ka defi.

²¹Səŋcɛm-cɛmnɛ fɔ nkɔn enader kəwurəs pəbaŋ Yisrayel, mba mamɛ oŋ fəp, tataka ta maas tɔ tantɛ, ntɛ mes mamɛ meŋcepər mɔ.

²²Kaŋce kɔ: A aran alɔma ŋayi su dacɔ, aŋɛ ŋasɔŋɛ kɔ pəciyanɛ su mɔ; ŋanuŋkɛnɛna kəkɔ nde dəkufu,

²³ntɛ ŋantɔna-nəŋk fure fa Yesu mɔ, kɔ ŋander ŋaloku su a mɛlɛkɛe mowurərna ŋa, kɔ moloku a eyi doru.

²⁴Kɔ afum alɔma ŋayina su dacɔ, kɔ ŋaŋkɔ dəndo dəkufu, kɔ akakɔ ŋaŋkɔ ŋabəp mes pəmɔ tɔkɔ aran ŋalokuna su mɔ, mba nkɔn, ŋa ŋanəŋkna fɛ kɔ.»

²⁵Kɔ Yesu oloku ŋa: «Nəna afum atɔsɔk səbomp, bəkəc yonu yoŋwon kəlaŋ moloku mmɛ adəŋk a Kanu ŋanaloku mɔ!

²⁶Pənamar dis dɔlɔl Krist Wəyɛk-yɛk wəka Kanu tantɛ a pədebɛrɛ debeki dɔn dɔn disrɛ?»

²⁷Kəyɛfɛ ka buk ba Musa kəbəp ka yecicəs yecempi ya adəŋk a Kanu aləpəs aŋɛ fəp, kɔ Yesu ɔlɔmər ŋa tɔkɔ Yecicəs yosoku fəp yoloku tetɔn mɔ.

²⁸Ntɛ ŋalɔtərnɛ tadare tɔkɔ ŋaŋc-kɔ mɔ, kɔ Yesu ɔyɔ pəmɔ ntɛ ɛŋfaŋ kəcepər pəkɔ pəbɔlɛ mɔ.

²⁹Mba kɔ ŋamɔnɛ kɔ kəcepər, ŋac-loku: «Məyi nnɔ kɔ səna, dec dɛfaŋ kəkalɛ, kəbiyɛ kɔ pəndɛ. Kɔ Yesu ɛmbɛrɛ kəkɔ-yi di kɔ ŋa.»

³⁰Ŋandɛ dɛmɛsa kəkɔ-di yeri, kɔ Yesu ɛlɛk kəcom, k’ontola Kanu; k’entepi ki k’ɔsɔŋ ŋa.

³¹Kɔ fɔr yaŋan yemepɛ, kɔ ŋanɛpəl kɔ; mba k’ɔsɔlɛ sɔ fɔr yaŋan kiriŋ.

³²Kɔ afum aŋɛ ŋayɛfɛ kəlokɛnɛ: «Pəyina fɛ pəmɔ ntɛ nɛŋc deŋyi su dəcor, ntɛ endenasɔkəsɛ su moloku mecic nde dɔpɔ mɔ?»

³³Kɔ ŋayɛfɛ gbəŋcana babɔkɔ kɔ ŋalukus Yerusalɛm, kɔ ŋaŋkɔ ŋabəp acɛpsɛ darəŋ a Yesu aŋɛ wəco kɔ pin ŋac-loŋkanɛ kɔ asol aŋan,

³⁴ŋac-loku: «Kaŋce kɔ: Wəbɛ ɛyɛfɛ afi dacɔ, k’ɔŋkɔ pəwurər Simɔŋ!»

³⁵Kɔ afum aŋɛ mɛrəŋ ŋalɔm sɔ tɔkɔ tɛnacepər dɔpɔ mɔ, kɔ tɔkɔ ŋananɛpəl kɔ kətepi kɔn kəcom pəsɔŋ ŋa mɔ.

³⁶Ŋayi kəloku moloku mamɔkɔ, kɔ Yesu nkɔn sərka owurər ŋa, k’oloku: «Pəforu peyi nu!»

³⁷Kɔ ayek-yek ŋontorər ŋa, kɔ ŋanesɛ, kɔ pəyi ŋa pəmɔ ntɛ ŋaŋnəŋk tubɛri mɔ.

³⁸Mba kɔ Yesu eyif ŋa: «Ta ake tɔ pəyinɛ nu yama-yama tantɛ-ɛ, ta ake tɔ nəŋgbɛkəlnɛnɛ dəbəkəc-ɛ?

³⁹Nəmɔmən ma wɛcək wem kɔ waca wem-a, ina ɔfɔ yati! Nəgbuŋɛn’em, nəmɔmən! Tubɛri tɔyɔ fɛ sɛm, tɔyɔ fɛ bɛnt. Mba ina, iyɔ yayɔkɔ fəp.»

⁴⁰Yesu eyi kəloku moloku mamɔkɔ, k’ementər ŋa waca wɔn kɔ wɛcək.

⁴¹Mba ntɛ pənanaŋkanɛ kəbɔt ŋa haŋ ta ŋantam kəlaŋ mɔ, kɔ ŋayi pəciyanɛ disrɛ. Kɔ Yesu eyif ŋa: «Nəyɔ paka pɔlɔma pedi ba?»

⁴²Kɔ acɛpsɛ ɔn darəŋ ŋawurɛ alop ŋɛnɛkət ŋin kɔ ŋasɔŋ kɔ.

⁴³Kɔ Yesu ɛlɛk alop ŋaŋɔkɔ k’ɔsɔm ŋi fɔr yaŋan kiriŋ.

⁴⁴Ntɛ elip kəsɔm alop nŋɛ mɔ, k’oloku ŋa: «Mes mamɛ m’ iŋc-lok’un ntɛ inayi kɔ nəna mɔ; mɛnɛ mes mɔkɔ aŋcic tetem Tawureta Musa, yecicəs yecempi ya adəŋk a Kanu kɔ Yabura Dawuda mɔ fəp meyi.»

⁴⁵Kɔ Yesu ɔsɔŋɛ ŋa kəsɔk səbomp ntɛ tɔŋsɔŋɛ ŋacərɛ Yecic ya Kanu fəp mɔ.

⁴⁶Kɔ Yesu oloku ŋa: «Ntɛ tɔ aŋcic dəyecicəs ya adəŋk a Kanu, a dis dendelɔl Wəyɛk-yɛk wəka Kanu, kɔ tɛyɛfɛ dənda-ɛ, pəde pəyɛfɛ afi dacɔ tataka tɔn ta maas.

⁴⁷Mɛnɛ pacamɛ kəsəkpər mera pacəmɛ pəlompu darəŋ tewe tɔn, kəyɛfɛ ka Yerusalɛm, ntɛ tɔŋsɔŋɛ paŋaŋnɛnɛ afum a tɔf fəp kiciya kəŋan mɔ.

⁴⁸Nəna ŋɔ mes mamɛ meŋcepər fɔr yonu kiriŋ.

⁴⁹Kɔ ina, kəkɛrɛ nu k’inder daka ndɛ Papa kem ɛnasɔŋ’un temer kəsɔŋ mɔ; nəyi nnɔ dare dandɛ haŋ Kanu kəlas nu fənɔntər fa dareŋc.»

⁵⁰Kɔ Yesu osolɛ ŋa k’eŋkekərɛ dare kəsək ntende Betani, ntɛ ŋambəp di mɔ, k’ɛmpɛnɛ waca dareŋc, k’ontolanɛ ŋa.

⁵¹Eyi kətolanɛ ŋa, k’ɛsak ŋa, k’ɛmpɛ dareŋc.

⁵²Kɔ ŋaŋcəpɛ kɔ mobu kəsɔŋɛ kɔ pəleli, kɔ ŋalukus Yerusalɛm, pəbotu disrɛ;