Luk 24:11-52

¹¹Ka navong eiloheh keil along tunien onen ahin keil enek amundemi avit amul aluvos, sakini arkurtei anatin en keil.

¹²Ka Pita mea ka muloh va en valengeihat. Ka navong rapehai ka lele va neim, lesi keke kaliko koa akav koe teiai onen Iesu eni mules veah, ka teiai tovuol eni. Evus, Pita va ris teim, ka mundem houlu usil asa koa kur out.

¹³En avong enesek, meatin elu koa lumul en mari vangi meatin keil koa amusil Iesu lumul lumual luva en meteimal tai koa avise en Emeas. Meteimal enek mul soutin neli, kilomita teni vi teindan tai (11 km) ran out Serusalem.

¹⁴Keilu lumual ka lumul luselus usil tounah vasi keil koa kur out.

¹⁵Ka navong lumul veah lurun, Iesu varei mai katau en keilu ka kapil vituai ral min keilu telva.

¹⁶Ka Ahi ring koe rendemien onealu keke lurlei kileatei.

¹⁷Navong telmual mukok, Iesu vis keilu vit, “?Kamil milmul milselus usil asa en sise onamil?” Keilu luvati en sise, ka veinaealu mot.

¹⁸Tai en keilu koa isen vi Kleopas vis Iesu vit, “?Mukave? ?Keik kos kumai keitinek en out Serusalem keke korkileatei tounah vasi koa kur out en avong vahis koa muli?”

¹⁹Iesu vis keilu vit, “?Tounah sa?” Ka keilu luvit kesi mini luvit, “Tounah vasi keil koa kistal min Iesu ten out Nasaret. Meatin enek vi provet tai koa selus ka mum ral min keihoen, ka vi hetetamen imok en meten Ahi ka en meten meatin keil.

²⁰Ka asuv keil onen pris keil ral min hetetamen keil onen Siu keil amaeni va en hen koakeil ten kavmen. Ka keil asan matien mini en kot, amuti kati en aiveave, ka kei mat.

²¹Ka komai memul memundesini keke kei varei hesakin me-Isrel keil imea iha imaluv ran hen koakeil amumoni keih min keil. Ka tounah tamun, kosa vi avong etel (3) tuai keke tounah keil enek kur out.

²²Ka kosa, en visokon semau, tei en ahin keil koa akapil ral min komai uva en valengeihat koa aling teiai onen mul ien, ka arun usil tounah koa sakin komai memutimanin eni.

²³Keil umai ris aviteni min komai keke keil arvotintei teiai onen Iesu en valengeihat enek. Ka keil aviteni mun keke ales angelo elu lukistal min keil koa luviteni keke Iesu moul eris ran matien.

²⁴Evus, tei en komai uva en valengeihat ka ales tounah vasi mal musil asa ahin keil enek aviteni. Ka teiai onen arlestei.”

²⁵Ka Iesu viteni min keilu vit, “!Kamil milvi varu vareis! Milroun vareis keke milvakur anatin en tounah vasi koa provet keil avit luvati.

²⁶Veni keil aviteni keke, helamu, Mesaea hekur mahien hemukok. Hevus, hekur eis tai ten hetetamenien ka heha en out ten houhouen.”

²⁷Evus, Iesu vit kilea tounah vasi en Tus Votut usil kei min keilu ka en tisien keil onen Mosis va rokol koa provet keil amutisi.

²⁸Navong telmai vesesal en meteimal ten out Emeas, Iesu vit heles housil sise heha.

²⁹Ka keilu lupeahi luvit, “Kito li mau hetal min komal, veni meteiai mul munu ke, ka hervitei tuetin out hevopoli.” Sakini va ro ral min keilu.

³⁰Ka navong Iesu rondan en avet taanianien ral min keilu, kei kur veret, masmas Ahi veni, vul vasi, ka sani min keilu.

³¹Hatte tas, rendemien onealu maluv ka lulei kilea keke vi Iesu. Ka navong lumul veah lulei mamah eni, Iesu vuol en metealu.

³²Ka keilu luviteni min keilu eris luvit, “!Meatin enek vi Iesu varei! Navong mul semau vit kilea selusien keil ten Tus Votut min ialu, lolong kilea en tineralu keke vi kei.”

³³Sakini, en avong etin varei enek, keilu lumea ka luva ris en out Serusalem. Navong lurokol out Serusalem, luvotin meatin teindan tai (11) onen Iesu koa amul aro vituai out tas ral min meatin sav keil emun.

³⁴Ka keil aviteni min keilu avit, “!Vi anatin! !Asuv Iesu moul eris ran matien, veni kistal min Saemon Pita!”

³⁵Evus, meatin keilu ekek luvit usil asa koa kur out en sise, ka mukave lulei kilea en Iesu navong vul vas veret.

³⁶Navong meatin keilu enek lumul veah luselus usil tounah keil ekek min keil, Asuv Iesu varei mai kistal ka mulomal luhu en keil. Kei viteni vit, “Tomat hel ven kami.”

³⁷Keil amutimanin ka ametau houlu veni amundemi avit amul ales ninin onen.

³⁸Ka kei viteni min keil vit, “?Vensa mimetau? ?Ka vensa varei rendemien onami mul langlango ka mirkultei veah anatin keke inau namoul eris ran matien?

³⁹Alles hek keilu ka alok keilu ekek. Vi inau etin. Mihemai, mihetokol inau keke mihelong kilea keke husi onak ka sik mul, veni ninin keil, husi ka sin keil one tovuol.”

⁴⁰Ka navong viteni mukok, kei rie hen keilu ral min alen keilu min keil.

⁴¹Navong alesi, avilelau en sien, ka keih veah en keil keke avakur anatin eni. Sakini Iesu vis keil vit, “?Anien tei mul keke maani?”

⁴²Asan hati mesau tai koa alengasi mini,

⁴³ka kei kuri ka kani en mete.

⁴⁴Evus, Iesu viteni min keil vit, “Tounah koa kur out musil asa koa naviteni min kami navong naro veah ral min kami. Ka kistal minau vasakin tounah koa amutisi usil inau en mengkatien keil onen Mosis, tisien onen provet keil, ka selusien keil ten Sam emun vamai vahi anatin.”

⁴⁵Evus, kei sehen rendemien one keke akilea availea selusien keil koa mul en Tus Votut.

⁴⁶Ka viteni min keil vit, “Aneite ten tisien keil keie: Mesaea koa Ahi rie lati hekur mahien ka heha hemat. Ka navong avong etel heli, hemoul eris ran matien.

⁴⁷Evus, en isen, meatin keil ihitehiteni keke Ahi helesi hetahos eris ka houtut moulien onen meatin vasi keil en out netan munak aviles ran tisaen keil one. Selusien ekek heha helamu ven meatin keil ten out Serusalem. Hevus, heha hekarahit out vasi en out netan.

⁴⁸Kami koa miles tounah keil ekek, miheha mihehit usili min mesav keil.

⁴⁹!Mihetaengoni! Inau nisan Ninin Votut koa Ahi Tata vat kati vasani min kami. Sakini, kami mihetos emau ekonek en taon ten out Serusalem hetokol avong koa keihoen onen Ahi hemai hesien kami.”

⁵⁰Evus, Iesu mulamun vangi meatin keil onen alokovein out Serusalem ka uva en meteimal ten out Betani. En out enek, kei vati lat hen keilu vina nesa ka san tokolkatien min keil.

⁵¹Navong mul veah san tokolkatien min keil, Ahi kulati ran keil ka kuri vina en out nesa.

⁵²Navong keil alesi, uva netan mini. Evus, ral min sien, uva ris en out Serusalem.