Lukas 24:11-52

¹¹Pali e huriki a apostolo ri luhoi ta ngava tavula kunana, i uka ma ri luhoi ge muholi.

¹²Pali e Petrus i pesi rike, i nunu lakea na babe. I tuku dili, i masia a lavalava ni bunu a podane Isu vona. I matai lobo, i hamule na tanga, i luhoi hatekea ra maki i bele.

¹³Na parava iea kunana, a murimuri ala rua ru laho lakea na tanga e Emaus. Ra tanga iea i basi popote ne Ierusalem, a maravana a kilomita i ravulu a polona i taku.

¹⁴Na tahuna ru lalaho ru tuverei na maka maki i bele.

¹⁵Na tahuna ru vatuverei, ru vanana vona a maki i bele, e Isu i valai tabukoi ne rua i laho turane rua,

¹⁶pali i uka ma ru matakilalea.

¹⁷Muri e Isu i nana rua, “A ra muru vatuverei vona na dala?” Lakea a murimuri nga ru pesi tata ru mata tangitangi.

¹⁸A viri tara ne rua, a rana e Kleopas, i koli i ta maea, “Ioe kunana a mosi ne Ierusalem, o uka ma o lohoka vona a maki i bele vonga?”

¹⁹E Isu i koli i ta maea, “A ra maki?” Lakea ru ta maea, “A maki i bele ne Isu o Nasaret. Ia a propet i tahoka a nitora dagi na nitana, a nitora dagi na ni rata a nivakasiri na matana Vure, na matane huriki a bakovi, a ngatavine.

²⁰E huriki a matakari, a prister dagi ne mia ri habia na limane huriki a Rom, ri gi paditatea na kai tavalavala.

²¹Pali mia mi luhoi ia ta ge korimule e huriki a Israel. Pali ngane a toluna parava.

²²Mona e huriki a ngatavine ri vakaturutu mia vona tara ngava. Baroko na hatelanga ri lakea na babe,

²³pali i uka ma ri masia vonga a podane Isu. Ri hamule ri vakalongo mia ta ri matai a agelo ala rua, ru taki ria ne Isu i mahuri mule!

²⁴Muri e huriki ranga ne mia ri lakea na babe. Ri matai a maki i manga a ngava i taki e huriki a ngatavine, pali i uka ma ri masia e Isu.”

²⁵Muri e Isu i taki rua i ta maea, “Muru manga, muru maradoi hateka ni luhoi a ngava lobo i taki e huriki a propet.

²⁶E huriki a propet ri takia e Kristo ge bole a nimadihi taro, muri ge bole a bagetuanga vona.”

²⁷Muri i vakatubu ne Moses i valai ne huriki a propet lobo, i tuveve polo ne rua a maki lobo ni here puru mai ia na Hinere.

²⁸To valai tabukoi na tanga dagi e Emaus, lakea e Isu i rata manga ge laho polo­polo.

²⁹Lakea ru takia, ru ta maea, “O made turane maria, i malunga pali a hini, i popote ge rodo.” Lakea i vano i made turane rua.

³⁰Na tahuna to made halui a dede ta to go kani, lakea e Isu i bolea a bret, i vasileki langa vona, i kevea i habia ne rua.

³¹Ngane i malaharere a matane rua, ru matakilalea e Isu. Na tahuna ru matakilalea, i malaviriri kunana i marakavelu.

³²Lakea ru vanana, ru ta maea, “Muholi hateka, i rikerike a hatene tarua, na tahuna te lalaho na dala, i ta turane tarua, i tuveve puru ne tarua a ngava lobo na Hinere.”

³³Ru malaga malaviriri, ru hamule lakea o Ierusalem. Ru luve taho vonga e huriki a apostolo ala ravulu a polona i taku turane huriki ranga, ri vapopo vonga.

³⁴Lakea ri vakalongo rua, “Muholi hateka! E Bakovi Dagi i pesi rike mule na nimate, i vakasiria ne Simon.”

³⁵Muri ru vakalongo ria vona a maki i bele ne rua na dala, ru matakilalea e Isu na tahuna i keve a bret.

³⁶Ru tabana ni tuverei, lakea e Isu i bele ne ria, i pesi na kurukurune ria, i ta maea, “A nivalemu ge turane mua.”

³⁷Ri turutu, ri mangenge, ri luhoi ta ia a hanitu.

³⁸Lakea e Isu i taki ria i ta maea, “I navai mu turutu? I navai mu luhoi viliha lae?

³⁹Mu matai a limagu a vahagu. Iau kunana! Mu nugu kilangagu. A hanitu i uka bobona a tuhana ge manga nau.”

⁴⁰E Isu i taki lobo a ngava nga, lakea i vakasiri ria vona a limana, a vahana.

⁴¹Ri tabana ma ri luhoi kamumu, a vuhuna ri turutu ri vivi vona, lakea i taki ria, “Mu tahoka a maki ni kani koea?”

⁴²Lakea ri habi vona a manu ni langani.

⁴³E Isu i kani na matane ria a manu.

⁴⁴Lakea i taki ria, i ta maea, “Mu luhoi kado na tahuna a turane mua rira? A taki a maki ni here puru virihi mai iau bara i bele. Ra ngava lobo ni here puru na vinara ne Moses, na Hinere ne huriki a propet, na Linge.”

⁴⁵Muri e Isu i vakapalala a gine ria, ri gi lohoka na ngava ni here puru na Hinere.

⁴⁶Lakea e Isu i taki ria i ta maea, “A ngava ni here puru i taki e Kristo ge bole a nimadihi taro, muri na parava i tolu ge pesi rike mule na matenga.

⁴⁷Mu vakatubu o Ierusalem, mu vara na tanga lobo na malala a ngava ne huriki ri gi pulo a vilone ria, lakea a Vure ge puga vuroki a naro hale ne ria.

⁴⁸Mua kunana mu matai a maka maki nga.

⁴⁹Iau ga rudu vilia a Hanu Kiripiripi ra i taki mua vona hosi e Tata. Mu dava iea o Ierusalem, ge harena na tahuna mu bole a nitora na Vure.”

⁵⁰Muri i tuli ria lakea o Betani. Na tahuna ri bele vonga, i toto rike a limana i vakabagetu ria.Jesus

⁵¹Na tahuna i vakabagetu ria lobo, ni bole sike na hunu, i pe ria.

⁵²Ri kavurikea. Muri ri hamule lakea o Ierusalem ri pitei na dala.