Luka 23:18-33

¹⁸Rehano vaze ḡuḡuvaḡa niduꞌa huau iḡuniro, raenaꞌa, “Vaze adiꞌe manoꞌi, u Barabasiꞌe tuḡune bunoꞌi!”

¹⁹Barabasi ani Ierusalema habaꞌano gavamani utitoziniro zu vaze zimiro. Eꞌanoꞌo ani ḡuꞌano ohoniro.

²⁰U Pilato ani vaze ḡuḡuvaḡa teite taꞌirotitiro, mazaḡa ani Iesu tuḡune bunihi reiro.

²¹Rehano zeꞌa huaro, raenaꞌa, “Satauronoꞌi! Satauronoꞌi!”

²²Pilatoꞌa ḡae uḡiduḡano ziro, raenaꞌa, “Ani nagi veꞌoḡa haḡaeha? E ani rune moneo tuḡuniꞌuma veꞌoḡa ꞌahoganiꞌa mene horoneha. Eꞌanoꞌo e ani masine tauḡiꞌuma ebu tuḡune buniꞌuma!”

²³Rehano vaze ḡuḡuvaḡaniꞌa Iesu satauronoga veize ḡihau teoteꞌau huaro. Zeḡe agoꞌe ufeta boro hune uꞌano,

²⁴Pilatoꞌa zeꞌa urateꞌeteꞌe ibiḡano haḡaoziniro.

²⁵ꞌOugadu ani gavamani utitoziniroteꞌe zu vaze goruziroteꞌe vazeḡa, Barabasi ḡuꞌanonoꞌo mae buniro. U vaze ḡuḡuvaḡaniꞌa uratiroteꞌe idunaḡano, Iesuꞌe satauronoga veize uti azaḡa evora riꞌiniro.

²⁶Uti azaḡaniꞌa Iesu tutune onamiroteꞌe zamaḡano, Kurene vazeḡa ꞌahoga niḡa Simona, aniꞌe ane habaonoꞌo onaeꞌenogano ibio hidiro. Uti azaḡaniꞌa obone teadu Iesu satauro mae heratoharo ebu Iesu ḡaruna onamiro.

²⁷Vaze ḡuḡuvaḡaniꞌa zuni Iesu hegote onamiro. Zeḡe boꞌaḡano roḡaeroḡaeꞌa Iesu vetuḡanadu niau kuaro.

²⁸Iesuꞌa tehadu zinaꞌa, “Ierusalema roḡaeroḡae, eḡe uꞌano ago nianoꞌi, rehano zae zu ubudeze veize nianoꞌi!

²⁹Mazaḡa aduga boro hidiꞌuma madaḡa ꞌai onaiꞌuma. Eꞌe madaḡano vazevazeꞌa ꞌahige reꞌuma, raenaꞌa, 'Gabani roḡaeḡa zu ene ize ꞌizema mouga roḡaeḡaniꞌe manoḡa tauḡi!'

³⁰Eꞌe madaḡano ze maḡamaḡa komeꞌa boro zinaꞌa, 'Fahanadu emeḡe ḡahifoꞌi!'

³¹Eꞌe ire ḡaboḡa heuḡa, rehano zaꞌa sataurohiꞌohe. ꞌOugine zaꞌe, ire roḡa azaḡa heuḡa, aduga ufeta boro hidiꞌuma.”

³²Ḡonore boro vazeḡa ꞌaheu zuni Iesu teite zemoga radu tutuze onamiro.

³³Ebu zeꞌe haba ꞌahoga niḡa Vadini Isiga feuriro. Eꞌea Iesu ebu ḡonore vazeḡa ꞌaheu satauroziro, vaze ꞌahogaꞌe edaꞌe moneo zu ꞌahogaꞌe kauri moneo.