San Lucas 23:18-33

¹⁸Jayave opaete vae iñeeãta reve jei: —Iyucaca cua cuimbae. Iyoraca oreve Barrabás —jei reta.

¹⁹(Tenonde yave Barrabás upuruyuca Jerusalén pe, mburuvicha reta ndive uñerãro yave. Jáeramo umɨingue peresorɨru pe.)

²⁰Ẽrei Pilato uipota tẽi oyoraca Jesús. Jáeramo jei ye chupe reta.

²¹Ẽrei iñeeãta reve jei reta: —Icutuca curusu re. Icutuca curusu re.

²²Jayave Pilato upɨrandu ye chupe reta: —¿Mbae pa uyapo? Avãe'ã mbae icavi mbae vae jese umano vaerã. Jáeramo ainupacañota jare ayoraca yeta —jei.

²³Ẽrei jeiete iñeeãta reve jei reta uicutuca vaerã Jesús curusu re. Jare sacerdote reta itenondegua reta jare ĩru joco pe ñugüɨnoi vae reta iñee umɨquɨrẽɨ Pilato.

²⁴Jayave Pilato jei uyeyapo vaerã Jesús pe jae reta uipota vae.

²⁵Jayave oyoraca chupe reta tenonde yave mburuvicha reta ndive uñerãro yave upuruyuca ramo peresorɨru pe umɨingue vae, jae reta uipota rami. Ẽrei umee Jesús chupe reta uyeyapo vaerã chupe jae reta uipota vae.

²⁶Jayave güɨraa reta Jesús joco güi. Jare penti cuimbae Simón jee vae tenta guasu Cirene pegua, ou uvãe tenta guasu cotɨ. Jocoropi uasa oĩ yave, sundaro reta uipɨsɨ Simón jare güɨraaca chupe Jesús icurusu. Jayave Simón güɨraa curusu Jesús jaɨcue.

²⁷Jare yugüɨraa vi Jesús jaɨcue jeta vae. Jare jae reta ipɨte pe yugüɨraa cuña reta. Jae reta uapĩro yugüɨraa Jesús.

²⁸Ẽrei Jesús uyerova umae jese reta jare jei chupe reta: —Jerusalén pegua cuña reta, agüɨye piyao cheré. Piyao piyee jare pemembɨ reta re —jei—.

²⁹Mase, outa uvãe ara reta jei reta vaerã: ‘Uyerovia co imembɨ mbae vae. Uyerovia co umɨcambu mbae etei vae’ —jeita, jei—.

³⁰Jayave umbɨpɨta tẽi jei ɨvɨtu guasu pe: ‘Piyapara oreárambo. Oreasoi’ —jeita, jei—.

³¹Uyapo reta icavi mbae vae cheve yave, ¿mbae ra uyapota peve? —jei.

³²Jare sundaro reta güɨraa vi Jesús ndive mocui cuimbae icavi mbae vae uyapo vae uyuca vaerã.

³³Jare yugüɨraa uvãe Ãcacüerenda jee vae pe. Jayave joco pe sundaro reta uicutu curusu re Jesús jare cuimbae reta icavi mbae vae uyapo vae. Oñono reta penti Jesús iyacata cotɨ jare ĩru iyaso cotɨ.