Luk 23:18-33

¹⁸Baing ding duwagi bila waxutu taininau, duwagi ba, “Oxop lipua li mala bu mati! Uyunga Barabas nam!”

¹⁹(Barabas dita salak yabania namua na iti haungingua long sabangga Yerusalem rangua gabman, xaung ung lipu tela mati.)

²⁰Mana namua Pailat bo ba yunga Yesu mala, xusungadi muli.

²¹Ning duwagiwagi ba, “Ung mati xai balingamia! Ung mati xai balingamia!”

²²Bunging tuwa xusungadi muli, harua ba, “Baruta? Libu kubolu diang baruamta? Ngabagu kubolu tela bu ngaung mati mana te. Binabu bagula ngagusi, saing bagula ngayunga mala.”

²³Ne duwagi haringing sibuna ba ung mati xai balingamia. Dahaxi buk, saing haxingadinga dali,

²⁴binabu Pailat hau hatuminganoa ba nai mana haruangadinga.

²⁵Baing lipua ba wa salak yabania namua na iti haungingua xaung ung lipu tela mati, lipua ba duxusunga mana, Pailat yunga mala, saing soxi Yesu mala bu mati bila muruding mana.

²⁶Daxai Yesu malau, baing dituxu Saimon, lipu tela mana long sabangga Sairin, ina sok sangua umangadi ma. Dilibu xoxi xai balingama saing ma kimu mana Yesu.

²⁷Lipu xumana disu mana mala. Haingdi xauna disu mana, saing ditangia haringing sibuna.

²⁸Ne Yesu xugia mala ranguadi saing harua nadi ba, “Haing Yerusalemgam mana, atangia ngau tai! Atangiang xaung garaimdi.

²⁹Bagu namua na xaidaba ma bungina bagula aharua ba, ‘Xai sibuna mana haingdi duwa xuhi, mana haingdi dahayau te xaung haingdi disina suidingdi te!’

³⁰Baing “ ‘bagula daharua na bimbidi ba, “Autuang mari mam!” Saing bagula daharua na xaxagandi ba, “Ayaxanggam!” ’

³¹Namua na nga bila xaiya gamata, saing abagu kubolua dilibu manga baing. Ne ang bila xaiya mutuxu—bagula diriang baru?”

³²Lipu diang luwa, daxai dingtang xaung Yesu mala bu dung dingtung mati.

³³Dila disok mana longga duxu ba Toxotaxu Guana. La ba digoxi xai balingamia xaung lipu diang luwadi ba, tela wa rimamo, tela wa xong.