Lukas 23:18-33

¹⁸Ma den sma bari leki wan man taki: “Puru En na un tapu! Lusu Barabas gi unu!”

¹⁹Den ben sroto a man disi fu wan dyugudyugu ini a foto, èn fu di a ben kiri wan sma.

²⁰Dan fu di Pilatus ben wani lusu Yesus, a taki baka nanga den sma.

²¹Ma den ben e bari taki: “Spikri En na wan kroisi! Spikri En na wan kroisi!”

²²Pilatus taki a di fu dri leisi nanga den. A aksi den taki: “Ma sortu ogri a man disi du? Mi no feni noti fu meki tak' A mus dede. Dat'ede mi o wipi En, dan mi o lusu En.”

²³Ma den sma ben e tan bari bun tranga tak' den mus spikri En na wan kroisi. Te fu kba a ben abi fu yere den.

²⁴Dan Pilatus teki a besroiti fu gi den san den wani.

²⁵A lusu a man san den ben wani, di ben sroto fu wan dyugudyugu èn fu di a ben kiri wan sma. Dan a gi Yesus abra fu den du nanga En san den wani.

²⁶Di den e tyari Yesus gwe, den grabu wan man Simon fu a foto Sirena, di ben kmopo na boiti e kon. Dan den poti a kroisi tapu en skowru fu a tyari en na Yesus baka.

²⁷Wan bun bigi grupu fu a folku ben e waka baka Yesus. Ini a grupu yu ben abi furu umasma, di ben e sari èn di ben e krei fu En ede.

²⁸Ma Yesus drai taigi den taki: “Uma fu Yerusalem, un no krei fu Mi ede, ma un krei gi unsrefi nanga den pikin fu unu.

²⁹Bika wan ten o kon pe sma o taki: ‘Den uma di no man kisi pikin, nanga den wan di no kisi pikin ete, abi koloku. Èn den uma di noiti gi pikin bobi, abi koloku tu.’

³⁰Dan den sma o bigin taigi den bergi taki: ‘Fadon na un tapu!’ Den o taigi den pikin bergi taki: ‘Kibri unu!’

³¹Bika efu na disi den e du nanga a lala udu, san den sa du nanga a drei udu dan?”

³²Makandra nanga Yesus, den ben tyari tu abani gwe fu go kiri.

³³Di den doro na a presi san den e kari Dede-ede, den spikri Yesus na a kroisi. Den spikri den tu abani na wan kroisi tu: wan na En let'anu sei, èn a trawan na En kruktu-anu sei.