LUKA 12:2-31

²E ḡova ahu ḡaudia iboudiai do bae hedinarai, bona hehuni ḡaudia iboudiai do bae dibadia.

³Taunabunai, dibura lalonai o gwaurai herevadia na diari ai bae kamonai; bona daiutu lalodiai o hemaunulai herevadia na ruma guhidia amo bae harorolai.

⁴Turagu verina e, na hamaoromuimu, tau-anina ialana mai dibadia murinai ḡau ta ikarana asi dibadia taudia na garidia basio gari.

⁵A baina hamaoromui daika garina ba gari; baine alamui mase murinai mai siahuna Gehena lalonai baine tahomui dobi tauna, ia hari garina ba gari.

⁶Bisini ima davadia na cent rua mo, ani? A Dirava ese idia ta se laloa herekwamu.

⁷Umui kwaramui huidia iboudiai vada e duahi vaitani. Taunabunai, basio gari; umui ese bisini diaḡau o hereadiamu.

⁸Na hamaoromuimu, taunimanima vairadiai bae gwauraigu hedinarai taudia iboudiai na Taunimanima Natuna ese Dirava ena aneru vairadiai baine gwauraidia hedinarai;

⁹a taunimanima vairadiai baine ḡoregu tauna na lau ese Dirava ena aneru vairadiai baina ḡorea.

¹⁰Taunimanima Natuna bae ere dika henia taudia iboudiai edia dika bae hegwau tao; a Lauma Helaḡa baine ere dika henia tauna ena dika basine hegwau tao.

¹¹Dubu biagudia bona hanua lohiadia bona siahu taudia vairadiai bae hakaumui lao negadia ai na lalomui basie hekwarahi, ede ba haere toma eiava ede ba hereva toma;

¹²badina be una hora ai ba gwaurai herevadia na Lauma Helaḡa ese baine hadibamui.

¹³Aru taudia bogaragidiai tau ta ese e noia, eto, Hahediba taumu e, mani emu kara kakagu ba hereva henia, ba hamaoroa, tamamai ena kohu amo lau ahugu baine henigu.

¹⁴A Iesu ese e haere henia, eto, Tau e, daika e gwaumu lau be hahemaoro taugu eiava emui kohu iharina tau.

¹⁵Bena ia ese e hamaorodia, eto, Nahuamui-ba toho, kohu iura-henina ena lalo-ani garina. Badina be taunimanima na edia kohu momo ese basie hamauridia.

¹⁶Bena ia ese sivarai heḡereḡerena ta e henidia, eto, Taḡa tauna ta ena uma anidia na diaḡau.

¹⁷Bena lalona e hadaia, eto, Lau na ede baina kara toma? Badina be egu uma anidia ihaboudia na asi gaabuna.

¹⁸Ma eto, Ini hari baina kara toma: egu roge hari baina roho, badadia haida baina hagini; bena egu uma anidia bona egu ḡau iboudiai unuseni ai baina habou;

¹⁹bena laumagu baina hamaoroa, bainato “Laumagu e, emu kohu na diaḡau, laḡani momo davadia; ba laḡa ani, bavaniani, ba inuinu, ba moale”.

²⁰A Dirava ese e hereva henia, eto, Kava taumu, hari hanuaboi laumamu na emu amo baina abia oho; bena hari o haboumu kohudia na daika ese baine abi?

²¹Ena kohu e haboumu to asi ena taḡa Dirava enai tauna na unu mo heto.

²²Ia ese ena hahediba ma e hamaorodia, eto, Badina bunai na hamaoromuimu, lalomui na basie hekwarahi emui mauri dainai, dahaka bavani; eiava taumui daidiai, dahaka ba hahedokilai.

²³Mauri ese aniani e hereaiamu; bona tau-anina ese danu dabua e hereaiamu.

²⁴Galo ba haerodia: asie hadohadomu, asie taboromu, asi edia taḡa, asi edia roge; a Dirava ese e ubudiamu. Umui ese manu asio hereadiamu a?

²⁵Umui daika ena lalo-hekwarahi amo tauna anina sisina taina mo baine halataia diba?

²⁶Benaini, ina ḡau pipikina ikarana asi dibamui, haida ma o lalo hadailaimu anina be dahaka?

²⁷Herahera ba haero, ede e vara tomamu: asie ḡaukaramu, asie hatuhatumu; a lau na hamaoromuimu, Solomon mai hairaina idoinai ena namo idia ta ida asie heḡereḡere.

²⁸Benaini, tano avadia, harihari mimia, kerukeru lahi ai bae taho kau, to Dirava ese unu e hadabualai tomamu; be, ia ese umui danu basine hadabualaimui a? Abidadama maraḡi-maraḡi taumui!

²⁹Taunabunai, aniani ḡaudia basio tahu, bona lalomui basie daradara.

³⁰Badina be unu ḡau be tanobada besedia iboudiai ese e tahumu; bona Tamamui na mai dibana o dabumu ḡaudia bunu.

³¹A iena basileia ba tahua; bena unu ḡau iboudiai danu ma baine henimui.