Luka 12:2-31

²Wiac hemackekicne fokac i foku mi foocmu, i qaratiezo, â wiac soŋsoŋ fokac i foku mi foocmu, i bataniŋkezo.

³Ŋoŋe dapâcko dâŋ kamierâ mueŋgopieŋ i juku ʒoaŋ ɋaɋacko ŋeratieocmu, â ficmaŋko ɋawe faio mueŋgopieŋ i juku ʒae sâkoo fuaocmu.

⁴“Âgofâc‐nane, no ʒiŋuc ŋazape: Sahac‐ŋeŋic sawa qarâ irec fainao wiac eŋareniŋte tâpiri basaniŋmu jaŋere mi hâwic‐ŋopazejec.

⁵Â mocte hâwic‐ŋopazejec, irec ŋazape mananiŋ: Hârâcko qa sâroc eŋareocte tâpiri focnekac, ere jâmbomac hâwic‐ŋopaocte mukopac.

⁶Sawa hehetâc wipe i wiac omane, i furine mi bazo. Eme Anutu e jaŋeraonec mocjaha mac qâoma mi ecneekac.

⁷Â ŋic ŋoŋerao ine qizec susuc‐ŋeŋicte ʒare i wâc mana‐fâreekac. Irec hâwicmâc junʒepieŋ, ŋoŋe sawa hehetâc wipe mâcne, ŋoŋe ŋic.

⁸“Erâ moc ŋazape mananiŋ: Moc e ŋic jaŋere maio muɋaɋacnuocmu e Ŋic Fâri Wâtuŋnezi iŋuc jaha Anuture aŋelofâc jaŋere maio muɋaɋackeocmu.

⁹Â moc e ŋic jaŋere maio mic bacnuocmu, e Ŋic Fâri Wâtuŋnezi iŋuc jaha Anuture aŋelofâc jaŋere maio mic baocmu.

¹⁰“Moc e Ŋic Fâri Wâtuŋne musoriŋkeocmu, e sâqocne i bâtâmirecnezo, â moc e Tiri Mâro musoriŋkeocmu, e sâqocne i mi bâtâmirecnezo.

¹¹Juku mitific‐jeŋicko me kia jaŋerao bacŋopa rapie dâŋ ŋifecne weniŋuc munaŋmu muhuc mana mezac mi enʒepieŋ.

¹²Dameŋ ira dâŋ muniŋmu i Tiri Mârozi mufua‐ŋareocmu.”

¹³Eme ŋic ŋondeŋkonec ŋic moczi Jesu ʒiŋuc âzâcnewec: “Qaqazu, hahac‐nanezi mamacte merâfâc buc bajuekac, irec go âzâcnetec bârâwiŋnerâ tucne no narezejec.”

¹⁴Mume Jesuzi ʒiŋuc âzâcnewec: “Mozi no soŋaŋ me kia râecnuwecte norao mukic?”

¹⁵Iŋuc murâ dâŋ moc ʒiŋuc ʒuhuckewec: “Ŋoŋe buchâro junʒipiŋte bâec bahuc maŋŋeŋic soŋaŋkenʒepieŋ.”

¹⁶Iŋuc murâ dâŋ herâricne moc ʒiŋuc jazawec: “Ŋicbomboŋ moc e kise mâriri sâko fuacnewec.

¹⁷Eme maŋticnezi ʒiŋuc muwec: ‘Wenac epemu? Kise fârine sâko fic wena guruckepe?’

¹⁸Iŋuc murâ muwec: ‘Miŋecne manakopac, no kisefic heropierâ ɋâricne bâsokarâ barâ kise mâriri‐nane hepe ŋeocmu.

¹⁹Erâ maŋnanezi ʒiŋuc mupemu: No mâriri sâko fonarekacte ŋemac qamanahuc dameŋ ʒora aŋacnuha nâhuc juzepac.’

²⁰Iŋuc mume Anutuzi ʒiŋuc âzâcnewec: ‘Mutuc go, ŋafe ʒi jaha jujuge gowac rozo. Eme wiac râe qâzuc emeŋ i more eocmu?’

²¹Moc e Anuturaonec maŋ mâriri mi focneha e jahacne biŋe nânâ mafa hure hemârec eocmu, e sâc ijaha fuacneocmu.”

²²Erâ motecfâcne ʒiŋuc jazawec: “Irec hâcne ŋazakopac, ŋoŋe juju‐ŋeŋicte mana mezac ehuc ʒiŋuc mi munʒepieŋ: ‘Wemo wiac ba nâc enaŋmu?’ Me sahac‐ŋeŋicte mu heŋɋâŋ ehuc ʒiŋuc mi munʒepieŋ: ‘Wemo wiac rojunaŋmu?’

²³Nânâzi fârine mâcne, juju‐ŋeŋiczi fârine, â ŋaqi qoruczi fârine mâcne, sahac‐ŋeŋiczi fârine.

²⁴Ŋoŋe kâec kâec honecjopaniŋ, jaŋe he sarac mi eeŋgopieŋ â nâ rowaŋ â nâ ukic mi eeŋgopieŋ. Eme Anutuzi sifu nânâ bâfua‐jareekac. Ŋoŋe ine wipe mâcne, ŋone ŋic.

²⁵Me tâpiri‐ŋeŋic moc fokacko mu waiʒoc ehuc juju dameŋ‐ŋeŋic sâcne moc bâʒoraniŋmu me?

²⁶Ŋoŋe wiac piticne iŋucnere eipierâ wemocte wiac gâcne sâkore mana mezac boc eeŋgopieŋ?

²⁷Ŋoŋe firindoac honeniŋ, e ŋaqi qoruc‐ticnere gie mi baekac, erâ mupe mananiŋ, Salomo e eri qaraweŋ‐ticneheczi hawari biaŋ iŋucne mi rojuwec.

²⁸Eme kâteo âri wiac dodocne, miŋecgac iŋucne fuaekac, â tomâcko iŋucne mârâŋkeekac, i Anutuzi sifu mume hawari biaŋ fuaekac, ehuc ŋoŋere ŋaqi qoruc mi bâfuaocmu muŋgopieŋ, mamanasiŋ gogoroŋ ŋoŋe!

²⁹Irec ŋoŋe maŋbahac‐ŋopame ʒiŋuc boc mi munʒepieŋ: ‘Wemo wiac ba nâc enaŋmu?’

³⁰I qâpuc mâreŋ sâc jaŋe maŋ mamanasu‐jeŋic ira duckepie foekac. Ŋoŋe wiac i tâmiric sâcne mi juniŋmu, i Mamac‐ŋeŋiczi manakac.

³¹Ŋoŋe ine ere uucmaŋ fua tâcneocte maŋŋeŋic râepie domazejec, eme fainao wiac jabane i wâc fua‐ŋareocmu.