Luka 12:2-31

²Sa soi garavdo ka arakhel pe; sa soi garavdipe ka šunđol pe.

³Adalese, sa so vaćerđen ani tomina, ka šunđol pe ano svetlost; hem so poxari vaćerđen ko kan ano sobe, ka vaćeri pe taro krovija sare te šunen.

⁴Ali phenava tumenđe, amalalen: ma daran okolendar kola šaj te mudaren samo o telo, adalese so više adalestar na ka šaj te dukhaven tumen.

⁵A ka phenav tumenđe kastar te daran: te daran taro Devel kas palo mudariba isi zoralipe te frdel ano pakao. Oja, vaćerava tumenđe, olestar te daran!

⁶Na biknela pe li pandž čiriklja zako samo duj pare? A palem nijekh olendar nane bisterdi anglo Devel.

⁷A o Devel čak džanel kobor bala isi tumen ko šero. Adalese, ma daran! E Devlese injen po dragocena negoli but čiriklja!

⁸A vaćerava tumenđe: Đijekh kova anglo manuša ka vaćeri dai mlo učeniko, me, o Čhavo e Manušesoro, anglo anđelja e Devlesere ka vaćerav dai ov mlo učeniko.

⁹A te odrekninđa pe neko mandar anglo manuša, hem me ka odrekninav man lestar anglo anđelja e Devlesere.

¹⁰I te vaćerđa neko lafi protiv mande, protiv o Čhavo e Manušesoro, ka ovel lese oprostime; ali na ka ovel oprostime okolese kova hulini upro Sveto Duho.

¹¹A ked ka anen tumen anglo sudo ko sinagoge, anglo vladarija hem o vlastija, ma oven zabrinuta sar hem soja te braninen tumen, so te vaćeren!

¹²Adalese so tegani o Sveto Duho ka sikaj tumen so te vaćeren.”

¹³Tegani neko oto narodo phenđa e Isusese: “Učitelju, vaćer mle phralese te ulaj mancar okova so ačhavđa amenđe amaro dad.”

¹⁴A o Isus phenđa lese: “Manušeja, ko čhivđa man te ovav sudija ili delioco upra tumende?

¹⁵Tegani phenđa sarijenđe: “Arakhen tumen hem ciden tumen tari pohlepa. I sa edobor barvalipe te ovel e manuše, lesoro dživdipe na avela oto adava so isi le.”

¹⁶Tegani o Isus phenđa lenđe akaja paramiz: “Nesave barvale manušesiri phuv bijanđa but bijandipe.

¹⁷I ov mislinđa pe ana peste: 'So te ćerav? Nane man edobor baro than kote te čhivav i žetva mli.'

¹⁸I phenđa: 'Akava ka ćerav! Ka peravav mle purane šupe hem ka vazdav po bare, i adathe ka čhivav sa o điv hem sa soi mlo.

¹⁹Tegani ka vaćerav korkoro maje da isi man baro barvalipe bute beršenđe. Ka šaj te odmorinav, te xav, te pijav, te uživinav!'

²⁰Ali o Devel phenđa lese: 'Hulavona! Akaja rat ka mere! A sa adava so spreminđan, kasoro ka ovel?'

²¹Ađahari okolese kova pese čedela blago ki phuv, a na barvaljola okoleja soi šukar e Devlese ano jaćha.”

²²Tegani o Isus phenđa ple učenikonenđe: “Adalese vaćerava tumenđe: ma oven zabrinuta zako tumaro dživdipe: ka ovel tumen li so te xan; ni zako tumaro telo: ka ovel tumen li so te hurjen.

²³Adalese soi o dživdipe po bitno e xajbnastar hem tumaroi telo po bitno e šejendar.

²⁴Dikhen e gavranen! Ni sejinena ni čedena, nane len ni šupa kote te čhiven o điv, a palem o Devel parvari len. A tumen injen e Devlese po bitna e čirikljendar!

²⁵A ko tumendar šaj adaleja so brinini pe te produžini plo dživdipe za jekh dive?

²⁶Znači te našti ni adava najxari te ćeren, sose onda injen zabrinime zako bilo so aver?

²⁷Dikhen o divlja luluđa sar barjona. Na ćerena buti, čak na sivenafse šeja, a vaćerava tumenđe da ni o caro o Solomon, kova inele but barvalo, na inole edobor šuže šeja sar jekha olendar.

²⁸Te o Devel ađahar šukar hurjavela i čar ko polje savi avdive adari, a tejsa frdela pe ani jag, kobor li više tumenđe ka del šeja, tikora verakere manušalen!

²⁹Tumen ma oven zabrinuta zako adava so ka xan hem so ka pijen.

³⁰Ađahar ćerena okola manuša kola na džanen e Devlese. Tumaro Dad, o Devel, džanel da valjani tumenđe sa adava.

³¹Nego roden o carstvo e Devlesoro, a ov ka del tumen sa adava so valjani tumenđe!