Luka 12:2-31

²Paana ede nige ginauri esau se hebuitawai, na abotai abo se hemasaraha; eo nige ginauri esau hinage se toreyamui, na abo abina se ata.

³Arinai ede saha eo saha au ribaedi masigiri boeana eai, na marana eai abo se ataiedi; meta hinage riba wa au riba moninihi biri alona eai, numa ewana eai abo se painaei.

⁴“Egu heriamyao e, omi ea heribamiu ta, ea ’ne, isi tauaiaiunu, tau ahaaha mo se unui, tabu au matausiedi, taiede taba nige ginauri esau se abi.

⁵Ia mo matausina au matausi ia ede ea ribahesanapunonohaimiu ta: ia au matausiei, taumiu mo i unuidi, eo hinage ena gigibori eai abo i gabadobemiu Gehena boeana eai; mamohoi ea heribamiu ta, ia mo bena au matausiei ede!

⁶Manu gagiridi se uneuneidi pene labui maisadi wa, na Eaubada matana eai nige esau se nuagabaei?

⁷Urumiu maiawadi gamagaridi se hasiriheohidio. Arinai ede tabu au matausi: omi emi lolo wau manu gagiridi gamagaridi wa au saetawatawaidi.

⁸Hinage ea heribamiu ta, ea ’ne, esau eo esau tatao matadi eai i wasawasaegu, tau Natuna hinage ia abo i wasawasaei Eaubada ena aneru matadi eai:

⁹na ena esau, tatao matadi eai i halelegu, Eaubada ena aneru matadi eai ia hinage abo se halelei.

¹⁰Ena tau esau eo esau tau Natuna arinai riba baaea i ribaei, ena baaea abo se ribagigiri: na ena Earua Tabuna arinai riba baaea i ribaei, ena baaea taba nige se ribagigiri.

¹¹Eo ena se woeaimiu sunagodi eai, eo tauhedudurai eo tanuaga matadi eai, arinadi bena au heuioidi, eo saha eo saha abo au ribaedi, tabu au nuatu nonohai.

¹²Paana Earua Tabuna nei huiana ne ia abo i hesibasibamiu saha eo saha abo au ribaedi.”

¹³Edi pele esau i ribalau ia arinai, i ene, “Tanuagagu e, egu tau u heriba bena tamamai ena gogo i soiedima.”

¹⁴I ribalau ia arinai, i ene, “Tau e, eai i hetorogu enamiu tauhedudurai, eo enamiu tausoisoi eau?”

¹⁵Abo i ribalau isi aridi eai, i ene, “Au komakomanimiu, gogo tabu nuamiu se lauedi: tatao gogo gamagamagari se abidi, meta edi mauri nige’e.”

¹⁶Parabole esau i heribadi, i ene, “Tau monamonaune ena oea i masuri ariri:

¹⁷abo iabom ena nuanuatu, i ene, “Saha abo ea abi, egu masuri nige egu abapeiaurina?’

¹⁸Abo i ene, ‘Teina mo abo ea abi: egu sanara abo ea lopahaidi, lailaidi ea abidi: alodi eai egu masuri, eo egu gogo egu abapeiauri.

¹⁹Nuagu ea ’ne, Nuagu e, gogo gamagaridi u peiauridi borimai gamagamagari adi laubagi: abo u aiyawasi, u aiai, u nomnom, eo u kode.’

²⁰Na Eaubada i ribalau ia arinai, i ene, ‘Oa eauyaure, maiona ta earuam abo se abihai: wau ginauri wa oa u peiauridi wa abo aidimo enadi?’

²¹Doha ede ina ia gogo i peiauri iabom enana, eo nige ena gogo Eaubada arinai.”

²²Ie ribalau ena heaheatayao aridi eai, i ene, “Arinai ede ea heribamiu ta, ea ’ne, Tabu maurimiu au nuatudaoiei, saha abo au ai; eo taumiu saha abo au helui.

²³Mauri mo i sae ariri ede, aiai nige’e, taumiu hinage se sae, lulu nige’e.

²⁴Boeoboeo au nuatuidi: nige adi se uma; eo nige adi se paipaisoa; eo nige edi sitoa, eo edi sanara nige’e; na Eaubada mo i heaidi; omi manudi au saetawatawaidi, e nige’e?

²⁵Esau arimiu eai taba i nuatudaoi abo siarina i heloha kubita esega wa?

²⁶Ginauri gagiridi wa nige abina au ata, ginauri gamagaridi omi saha au nuatudaoiedi?

²⁷Oea baeobaeodi se inima au nuatui: isi nige se paisoa, eo nige se lulu haturi; hinage ea heribamiu ta, Solomona ana tepo lolodi eai ana ao nige i lolo doha hinage isi.

²⁸Taba Eaubada ina doha oea leidi i heluidi, wau ie ota oea eai, maraitom se gabu um boeana eai: omi abo nige i heluimiu wa, sunuma gagiri tataomiu e!

²⁹Eo saha abo au ai, eo saha abo au nom, tabu au eoo, nuamiu tabu se dagugu.

³⁰Paana teina ginauri gamagaridi tanoubu enadi se eooidi: Tamamiu hinage i nuatuiyao omi teina ginauri gamagamagari bena au abidi.

³¹Eaubada ena basileia mo au eooi: abo teina ginauri gamagaridi se hepatulediwa arimiu eai.