39Eme irec Wofuŋzi ʒiŋuc âzâcnewec: “Oi, farisaio ŋoŋe, oto râqâc‐ŋeŋic ʒure ɋaɋackeeŋgopieŋ, maŋŋeŋicko ine nânâ mafare sasec â bâbâsifuczi fusucmakicne.
40O ŋic mutucne ŋoŋe, wiac sasawa irec sahacne bâfuaweczi maŋne mi bâfuawec me?
41Irec ŋoŋe maŋkonec bâmec gie bâfuanʒepieŋ, eme ŋoŋerao wiac sasawa wâwânâŋ tâmiric efâreocmu.
42Oi farisaio, ŋoŋe hâwic‐ŋopazac me, ŋoŋe wiac racne, romboc, wifu, qase â iŋucne gâcne i tucne Wofuŋte biŋe qahuc râeeŋgopieŋ, ehuc ŋifecne wiac fârine, mitio mubâtiŋ â Anutu sâsâse ine mi eeŋgopieŋ. Moc reŋkehuc moc reŋkezo.
43Oi farisaio ŋoŋe, mitificko ŋicbomboŋ ŋeŋeoa micne ŋeniŋte mueŋgopieŋ â hatao ŋic ŋokac omanezi bâfuac‐ŋoparâ mu ʒeri eŋareniŋte irec maŋŋeŋic domaekac.
44Oi ŋoŋe ʒâŋeruŋ rârâŋnekicne iŋucne, ira ŋic jaŋe mi manahuc fainao rac warec eeŋgopieŋ.”
45Jesu e iŋuc mume sâcmutâc mamana ŋic moczi manarâ micnao rorâ ʒiŋuc muwec: “Qaqazu, go dâŋ iŋuc mutec sâcmutâc mamana nâŋerao wâc qacnekac.”
46Mume Jesuzi okacne kecʒiŋuc bâtikiecnewec: “Jei, sâcmutâc mamana ŋoŋe wâc hâwic‐ŋopazac, ŋoŋe tagi bâmâckerâ ŋic fai‐jeŋicko râehuc ŋaŋcne metariŋ jueŋgopieŋ.
47Jei, mimiŋnefâc‐ŋeŋic jaŋe porofete jopa sipiric embiŋ i jaŋere ʒâŋeruŋ ericke emasaŋ eeŋgopieŋ.
48Iŋuc ehuc mimiŋnefâc‐ŋeŋic qâtec‐joparâ ʒika‐jeŋicte manapie biaŋkeekac. Jaŋe jopa sipiric embiŋ â ŋoŋe ine ʒâŋeruŋ‐jeŋicko ma âkendâŋne‐jareeŋgopieŋ.
49Irec hâcne Anuture mamana birio dâŋ moc ʒiŋuc fuawec: ‘No ŋoŋerao porofete â aposolo sorec‐jopape fisipie gâcne jopa sipiric â jopa jâpec eniŋmu.
Luka 11
Luka 11:39-49