1Ango edo Yesu mi oro kotopu bajinada isite jisi piedo goteiri gaiapade embomaimi awamaneda kando mauwa matu siya arida pipisitera.
2Imo daedo goteiri mapa eutu rori da (1) ami ganu babaingae tote (2) mauwada pipisisina.
3Edo ami sisina, “Ge arapada imondemane tena, eiwa giwo! Mapa eutu rori emi embo nenei berari daginegedo bajinabé piesira.
4Ge engo tena aindabé, embomai berari eiwa awamaneda gunaguguyeda siya ari awa budo God de kando pietera. Ata, mapa eutu eiwa, ainda yai saka ro isira, ami ainda itarida jigamo ae esira awa, berari piesira.”
5Edo embo neneimi oro kotopu bajinada ganuma ove davegave ari, ae kando God de pipisitera aindemi giro ari awa gido mina tara esitera. Ango tero Yesu mi sisina,
6“Iji amboda, ro inemane einda gotewa awa, gitopo embobomi ainda ganuma berari awa daro duraina edo oro kotopu bajina eiwa dedo sitedo usibesibé ara.”
7Ango tesiri awamanemi ainde tedogositera, “Atopatari, iji bé nonde buro angogo awa gumaini? Edo kariwa ro gari, buro ango idegain eira iji ainde?”
8Edo ami sisina, “Bé gidogogo ewo! Embomi imomane atopatari ge pitawami udumbeorekae! Aindabé, embo jiwaemi dao natoda gundo ge pitawami ‘Na awa God da Avigari Embo,’ edo ‘Nato iji atutumbeteira.’ Ango taro, imomane awamane ambo ambo eove.
9Iji nonde embo neneimi duduno era, edo yai neneinda ge jindarida iwata kawatada bino ango ingido, adu eove. Wasiri angogo awa gisi idegaina, ata iji beao aribé awa aikae atutumbae.”
10Edo Yesu mi awamanede sisina, “Embomai yai neindami erido embomai yai neinda ainde mina dara ara. Edo daotarida embobo neimi erido daotarida embobo neinde duduno ara.
11Yai neindekaindeda jijirami butu ikanade jipaina. Edo embo jiwaebé indari rorae itae ari beji bebetegara, edo embo jiwaebé nenei karu amburo bebegaebé bara. Edo embomaimi wasiri babain idegari gido adu ara, edo daedo utuda kariwa babain gisi gae awa idegari gara.
12“Ata buro engogo idegae gisida awa, aindabé imomane awa nato ambodani, embomi imomane jido memesi neindekainde imondemane pipisite kundo maundo Judah embomainda benunu oroda katedo bundari oroda piara. Edo imomane nenei awa daotari ae gisijiari mane deda jisida katain kundo gundo piaro petawa.
13Emi awa imomane begata piari awamanede nato bino dave awa karigawa.
14Aindabé, nanemi imondemane dubogari ge piano tawo itomane gitopo embomai berari ami ge awa gido mina tari tao ae o ajiregari tao ae ara, awatedo, boroko kotembarida memesi bove ge ro iji ainde awamanemi imomane bekumba aro mina tawa.
16Edo bé itomane aimamo ae nanonameji de, edo orobe ae otatawo demi imomane awa, kundo itomane gitopo embomainda ipada piara. Edo awamane imomane nenei awa daro betawa.
17Aindabé imomane na gebé edo ewa, embo berarimi imondemane sinigambari ara.
18Ata imomane tataimbarimi God gebé edo ewo. Ango awo embomaimi imomane usibesi ari tao ae edo God mi itomane wasiri tonemaina.”
20Edo Yesu mi sisina, “Iji nonde imomane gitopo embobomi Jerusalem nasi jiroro eiaro gido awa, dave edo giwo, awamane burigibé nasi awa dedo sitara.
21Iji ainde imomane avekave yai Judea doda itewa awa, adu tumundo pejida visiwo. Imomane avekavemi Jerusalem doda itewa gido, nasi awa dodo idegewo. Edo avekave nasi ainda demonda isima ewa awa, ainda torainyae.
22Nane ge eiwa tena aindabé, iji ainde awa God mi Israel embomainde rirowa piaina. Peroveta manemi ro berari idegaina gaguritera awa bé aina.
23Awarata, iji ainde eutumai watoude ae aimono mamai ami beda itera ainde, awamanemi adu tumundo dedegari bari awa okain bé tambara. Awatedo, awamane do ari! God Judah embomainde sinigambaribé aina. Memesi bougabé awamane itari yaida gumaina.
24Gitopo embobomi Judah embo jiwaebé awa dudunoda daro bebetegara. Edo awamanemi Judah embo nenei jiwaebé bundedo yai berarida kundo mambara. Butuda gisijijiegari, Judah embo ae, ami Jerusalem nasi embomai nenei bundedo nasida ainda gisijijieiaro memesi bougabé budo ara. Ango edo awamanemi Judah embomai gisijijieite isiaro, iji awa God mi Judah embo aeda yai gisijiorote pipisisina bureite beao aina.”
25Edo daedo Yesu mi sisina, “Kariwa embomi gisi gae awa iji ae kariga de edo dabori mane deda yai idegaina. Ewa yawatada yavi ingido embomai butu umbugo neneinda kotembarida memesi bara, edo buro ro ari awa gain darara.
26Aindabé God mi utuda rorae ango dabori mane ae doga mane de awa jipari gido, embomai nenei adu edo jisivi betara, wasiri ro butuda idegaini awa kotembeteite.
27Ango eiaro, embo butu berarida ami na, Embo da Mai awa, goroba de taogari bajina de poragada gupeiano gara.
28Iji ainde imomane wasiri engo tuturo edo idegeteiari gido, ainda moka awa God mi itomane yai, iji tupobé, udegari piaina. Awatedo, pangedo jisi utuda piewo.
29Edo ami eniya ge eiwa awamanede sisina, “Imomane gari, ni dunga ami ro edo eira awa, edo ni nenei berari daedo.
30Iji nonde tuturo edo ni tuno pipiteira awa, imomane akuta gotewa, ni awa burigibé uji edo be ekaina.
31Edo imomane daedo, iji ainde rorae angogo idegari goteite awa kotembewo, God mi embo berari gisijiaina, ainda iji awa burigibé gumaina.
32“Awara! Edo ge ro nane imondemane tena awa giwo! Embomai iji einda itera awa betainyae isiaro, rorae awa berari idegaina.
33Rorae berari utuda edo butuda awa mandedo itae aina. Ata ge nato eiwa mana mandedo itae aina.
34“Bé gidogogo ewo! Do awo butuda wasirimi itomane jiro kotembari God da yai awa usibesi eure. Un okain jiwae injido wasiri bebegae eove. Edo butu wasirida kotembari jiwaemi do buriya ari bainyae. Imomane ango eiawo deguta awa burigibé gumbari boroboro awa.
35Nane engo tena, aindabé, nato gumbari awa embomai yai berarida isima edo era awa, waomi wo darago aina.
36Awatedo, imomane akuta goteite iwo! Edo iji berari benunu tewo, God mi itomane wasiri dambu darari gido ainda awara ari piari rorae engogo gumbari awa daginegave, edo iji nonde na, Embo da Mai, katari ijide gumano, imomane mengainyae nato dombuda petave.”
37Edo iji berari Yesu oro kotopu bajinada do arapada torido embomai atopasido esisina. Edo muyae berari imo idegedo nasi Jerusalem dodo Ni Olive de Peji da maundo ainda isima edo esisina.
38Edo iji berari sipo ataede embomaimi Yesu da atopatari ingaintedo erido oro kotopu bajinada do arapada torido ainda yai gundo esitera.
