Kölfel 25:4-20

⁴Ai Samol mi Lapalap, kopwe aiti ngeniei om kewe al o aitöchüür ngeniei.

⁵Kopwe emweniei lon om let o aiöüei, pun en ewe Kot mi amanauaei, üa apilükülükuk fansoun meinisin.

⁶Ai Samol mi Lapalap, kopwe chechemeni om ümöümöch me om tong ellet, ka pwärätä seni chök lomlom.

⁷Kopwe amusala ai kewe tipis me ai kewe pupungau üa föri lesäräföi. Ai Samol mi Lapalap, kopwe chechemeniei lon om tong me om kirikiröch.

⁸Ewe Samol mi Lapalap a pwüng o kirikiröch. Iei mine a aiti ngeni ekewe chon tipis ewe al repwe fetal won.

⁹A emweni chon tipetekison lon mine a pwüng o aiti ngeniir letipan.

¹⁰Ewe Samol mi Lapalap a eäni tong me allükülük ngeni chokewe mi apwönüetä an we pwon o aleasochisi an kewe allük.

¹¹Ai Samol mi Lapalap, kopwe amusala ai tipis usun ka pwon, pun ai tipis a kon chomong.

¹²Iö ewe aramas a niuokusiti ewe Samol mi Lapalap? Kot epwe aiti ngeni ewe al epwe fetal won.

¹³I püsin epwe wöümong, nge nöün kana repwe fanüeni ewe fanü.

¹⁴Ewe Samol mi Lapalap a chiechifengen me chokewe mi niuokusiti i. A asile ngeniir an we pwon.

¹⁵Üa sachetä ngeni ewe Samol mi Lapalap fansoun meinisin, pun i epwe angasaei seni feiengau.

¹⁶Kopwe kul ngeniei o ümöümöch ngeniei, pun ngang üa metip o osupwang.

¹⁷Kopwe akisikisala weiresin letipei o angasaeila seni ai kewe riaföü.

¹⁸Kopwe ekieki usun ai riaföü me ai weires o amusala ai kewe tipis meinisin.

¹⁹Kopwe nenengeni chomongun ekewe chon pälüeniei, pwal usun ar oputangauaei.

²⁰Kopwe tümwünü manauei o angasaei. Kosap mwüt ngeniei pwe üpwe säw, pun üa feito reöm pwe kopwe tümwünüei.