Psalm 25:4-20

⁴Fahkak inkanek lom nu sik, O LEUM GOD, Luti nu sik innek lom.

⁵Lutiyu in moul fal nu ke ma pwaye lom, Tu kom God luk su moliyula. Nga lulalfongi kom pacl e nukewa.

⁶O LEUM GOD, esam pakoten ac lungse kawil lom Su kom akkalemye oemeet me.

⁷Nimet esam ma sutuu ac ma koluk luk in len in fusr luk. A esamyu, O LEUM GOD, Fal nu ke lungse kawil ac pakoten lom.

⁸Ke sripen LEUM GOD el suwohs ac wo, El luti mwet koluk ke inkanek elos in fahsr kac.

⁹El kol mwet inse pusisel nu ke inkanek pwaye Ac lotelos ke ma lungse lal.

¹⁰Ke oaru ac lungse, El kololos su Karinganang wuleang lal ac akos ma sap lal.

¹¹LEUM GOD, nunak munas ke ma koluk luk, fal nu ke Inem, Tuh ma koluk luk arulana pus.

¹²Elos su sunakin LEUM GOD El ac fah luti nu selos inkanek su fal elos in fahsr kac.

¹³Elos ac fah kapkapak, Ac fwil natulos ac fah usrui facl selos.

¹⁴LEUM GOD El mwet kawuk lalos su sunakunul Ac El ac fah akpwayeye wulela lal nu selos.

¹⁵Nga suk kasru sin LEUM GOD in pacl nukewa, Ac El moliyu liki mwe sensen.

¹⁶LEUM GOD, ngetma nu sik ac pakomutuk, Tuh nga muku ac munas.

¹⁷Akfisrasrye mwe fosrnga nu sik Ac moliyula liki mwe ongoiya.

¹⁸Akilen fosrnga ac keok luk Ac nunak munas ke ma koluk luk nukewa.

¹⁹Liye pusiyen mwet lokoalok luk, Ac ke lupan srunga sulallal lalos nu sik.

²⁰Karinginyu ac moliyula: Nikmet lela in akmwekinyeyuk nga, Tuh nga tuku in moulla yurum.