Ola Saam 25:4-20

⁴Shoum mi YAWEI wujei yu wandim mi blanga jidan. Shoum mi blanga wok langa det rait roud.

⁵Shoum mi det trubalawei blanga jidan. Yu na det wanbala God mi oldei bulurrumbat. Yu na det God weya yu oldei seibum mi. Mi oldei trastimbat yu.

⁶YAWEI, jinggabat ol dislot ting na. Brom longtaim yubin oldei jidan kainbalawan, en yubin oldei kipgon laigimbat pipul.

⁷Wen aibin yangbala, YAWEI, aibin dum loda nogudbala ting. Wal yu sori langa mi en fogedabat ol detlot ting na. Yu oldei kipgon laigimbat pipul olataim en yu gud langa ola pipul. Wal mi askim yu blanga dum lagijat langa mi du.

⁸Dumaji YAWEI det trubala God oldei dum ebrijing raitwei en im gudwan, wal im shoum detlot nogudbala pipul hau blanga jidan raitwei.

⁹Im shoum ol lobala pipul wujei blanga go langa det raitwan wei, en im lenimbat olabat ebrijing im wandim olabat blanga dum.

¹⁰Dumaji im trubalawan en im oldei laigimbat pipul, wal im shoum detlot pipul hu laigim im det raitwei blanga kipum im strongwan pramis.

¹¹Yubin pramisim langa yu neim blanga sori langa ola pipul blanga olabat nogudbalawei. Wal yu sori langa mi na blanga ol main nogudwan ting.

¹²Ol detlot pipul hu teiknodis langa wanim YAWEI wandim olabat blanga dum, wal olabat garra len brom im na blanga bulurrum det rait roud.

¹³Olabat garra oldei abum detmatj ebrijing. Blanga olabat ola bigininimob garra jidan boswan blanga olabat ronwan kantri.

¹⁴Ol detlot pipul hu dum ebrijing weya God wandim olabat blanga dum, wal im gudfren blanga olabat. Im kaan nokambek im strongwan pramis langa olabat.

¹⁵Mi weit olataim langa yu YAWEI blanga album mi. Oni yu oldei seibum mi brom ola brabli nogudwan trep.

¹⁶Kaman en album mi YAWEI. Yu kain langa mi. Mi jidan miselp kantri en mi garram loda trabul.

¹⁷Album mi nomo blanga woribat en blanga jinggabat main trabul olataim. Yu deigidawei ol main trabul.

¹⁸Luk haumatj trabul ai garram. Yu sori langa mi blanga ola nogudwan ting aibin dum.

¹⁹Ai garram loda bedfren. Yu gin luk olabat detmatj na. Brabliwei na olabat nomo laigim mi. Yu gin luk, YAWEI.

²⁰Nomo larram olabat bidim mi en meigim mi sheim. Yu maindim mi, en yu kipum mi seifwan du. Langa yu mi askim yu blanga lukinatbat mi olataim.