Pesalem 25:4-20

⁴O Apômtau, ôwa nêm lêŋ sa êndêŋ aê. Ôkêŋ aê jajala nêm intênamaŋ.

⁵Ôndôŋ aê ma ôkêŋ aê jasêlêŋ jasa nêm biŋŋanô ŋaintêna, gebe aôm kôtu ŋoc Anôtô gêjam aê saŋa. Aê kakêŋ matoc aôm kêtôm bêcgeŋ.

⁶O Apômtau, taêm ênam nêm taêm walô to nêm têmtac gêwiŋ teŋgeŋŋa, taŋ gêc gêdêŋ andaŋgeŋ e mêŋgêdêŋ galoc naŋ.

⁷Taêm ênam ŋoc sec to geo ŋapalêgeŋŋa atom. O Apômtau, taêm ênam aê êtu têmtac gêwiŋ teŋgeŋŋa to nêm moasiŋŋa.

⁸Apômtau eŋ ŋajam to gêdêŋ. Amboac tonaŋ tec kêdôŋ lau sec sêsa lêŋ gêdêŋ.

⁹Eŋ gêwê lau, taŋ sêkôniŋ tauŋ naŋ, sêsa nêŋ lêŋ gêdêŋ ma kêdôŋ nê lêŋ gêdêŋ lau, taŋ sêkôniŋ tauŋ naŋ.

¹⁰Apômtau gêwê lau, taŋ sêmasaŋ ênê poac to biŋsu naŋ. Sêsa ênê lêŋ têtac gêwiŋ teŋgeŋŋa to biŋŋanôŋa.

¹¹O Apômtau, ôsuc ŋoc biŋ kapôêŋ naŋ ôkwi êtu nêm ŋaêŋa.

¹²Ŋac taŋ kêtêc Apômtau naŋ, eŋ asa. Apômtau oc êndôŋ lêŋ, taŋ ŋac tau êjaliŋ sa naŋ, êndêŋ eŋ.

¹³Eŋ tau oc êŋgôŋ tomoasiŋ ma nê wakuc oc sêwê kaiŋ gamêŋ tau.

¹⁴Lau taŋ têtêc Apômtau naŋ, têtu ênê lau ôliŋ andaŋ eŋŋa. Ma eŋ gêwa nê poac sa gêdêŋ êsêac.

¹⁵Matoc kêsap Apômtau tôŋ gebe eŋ oc ênu ockaiŋ su aŋga lakô.

¹⁶Ôkac taôm ôkwi êndêŋ aê ma taêm labu aê gebe aê taucgeŋanô gaŋgôŋ toŋoc ŋalêlôm ŋawapacgeŋ.

¹⁷Ôŋgôm ŋoc ŋalêlôm ŋawapac êtu gaô ma ôŋgamboac aê su aŋga ŋoc ŋandaŋ.

¹⁸Taêm ênam ŋoc ŋalêlôm ŋawapac to biŋ, taŋ kêlênsôŋ aê ma ôsuc aêŋoc sec samob ôkwi.

¹⁹Ôlic ŋoc ŋacjo samob, taŋ sêjac aê ŋawae naŋ. Êsêacnêŋ ŋalêlôm kêmoatiŋ tôŋ aêŋa.

²⁰Ônam gôliŋ katuc ma ônam aê sa. Ôkêŋ lau sêŋgôm aê majoc êsa atom gebe aê gaê lamu aôm.