Kölfel 17:6-15

⁶Ai Kot, üa kökköruk, pun en kopwe pälüeniei, kopwe aü selingom ngeniei o rongorong ai kapas.

⁷Kopwe pwärala om tong ellet mi amwarar. Ren om manaman ka amanaua chokewe mi feito reöm pwe kopwe tümwünüür seni chon ü ngeniir.

⁸Kopwe tümwünüei usun chök fituken lon mesom, kopwe aopaei fän nürün poum,

⁹seni ekewe aramasangau mi fiu ngeniei, seni ekewe chon oputaei mi pwelifeiliei o mochen nieila.

¹⁰Ra pineela leluker pwe resap eäni tong, ra eäni kapasen tunesikesik.

¹¹Ra eipwa ipwei, iei ra pwelifeiliei, ra chök änenaei pwe repwe aturueitiu lepwül.

¹²Ra wewe ngeni eman laion mi achocho le kütta liapan, ika wewe ngeni eman nienifön laion mi öüröürela lon an lenien op.

¹³Ai Samol mi Lapalap, kopwe feito. Kopwe ü ngeni chon oputaei o akufuur. Kopwe angasaei seni ekewe aramasangau ren noum ketilas.

¹⁴Ai Samol mi Lapalap, kopwe angasaei seni ekewe aramas mi chök angei ar feiöch me lon ei fanüfan. Kopwe apwüngüür ren ekewe riaföü ka amolätä fän iter, amwo epwe naf ngeni nöür me nöün nöür.

¹⁵Nge me rei, ngang üpwe nenengeni mesom, pun üsap föri och mi mwäl. Lupwen üpwe nenela, üpwe fokun pwapwa ren ai nenengonuk.