SALMOS 17:6-15

⁶Žḻiža' Le', Dios, dan' ženlo' chi'a. Bze nag chi'a, na' benle da' ẕnnia'.

⁷Bḻoe'el neda' kan žeyache' ḻáže'ḻe'elo' benách ka'. Beslá benne' ka' žx̱en ḻáže'gake' Le' ḻo na'gak benne' ka' bi ẕḻé'egekle' ḻégake' chawe'.

⁸Bwia neda' ka žon no benne' ẕwíakze' yej ḻawe'. Wdape chi'i neda' ka žon ẕkoko', bian' žape chi'iba' bríse'do' ka' ẕan x̱ilba'

⁹nich bi be gongak chia' benne' wen da' ẕinnj ka', benne' ka' bi ẕḻé'egekle' neda' chawe', na' žénegekle' gótgake' neda'.

¹⁰Bi žeyache' ḻáže'gekle' ljéžgake' ka', na' ḻo yeḻa' ẕka'n ẕen kwíngake' ẕcháḻjgake'.

¹¹Gáte'teze gan ẕda' ẕwíagake' neda'. Žénegekle' wžía yí'gake' neda'.

¹²Zej nake' ka to bež yíx̱e'do' žénelba' bi da' gawba'. Zej nake' ka to bež yix̱e', bia ẕkache' kwinba' nich senba' biado' ka'.

¹³Da, X̱ana' Dios, bdiḻ-ḻen benne' ka' bi zej nake' chawe', na' bžia yi' ḻégake'. Beslá neda' ḻo na'gak benne' ka' bi zej nake' chawe', wkonlo' žin ya ntoche' chio'.

¹⁴Beslá neda' ḻo na'gak benne' ka' ḻen no'o waḻe, X̱ana' Dios. Beslá neda' ḻo na'gak benne' ka', benne' zej ze'e nich yekwásgake' yežlyó cheto' nga, benne' ka' žáwgake' da' záka'ḻe'e chio' na' ẕwáwgaken' ẕí'ngake' ka', na' ẕga'nkze da' gawgak ẕa'sógake' ka',

¹⁵san neda', ḻe'ela' ḻawo' Le' dan' naka' chawe'. Chaz ḻaža'a gaka' ka nakkzo' Le' kate' yebana'.