Josue 21:3-12

³Umbe, sumalà dutun te insuǥù te Nengazen mibeǥayan is menge kevuwazan ni Levi te menge inged wey menge tanà he menge pepenebtavè dan he midtarin diyà te menge vahin te tanà te menge Israilihanen.

⁴Is nehuna he mibeǥayan te menge inged iyan is menge kevuwazan ni Kohat. Kevahin te kevuwazan ni Kohat is menge kevuwazan ni Aaron, ne mibeǥayan sikandan te 13 he menge inged he nesakup diyà te tanà te tribu eni Juda, Simeon, wey Benjamin.

⁵Is duma he menge kevuwazan ni Kohat mibeǥayan te 10 he menge inged he nesakup diyà te tanà te menge tribu eni Efraim, Dan, wey ketengà he tribu ni Manase.

⁶Is menge kevuwazan ni Gershon mibeǥayan te 13 he menge inged he nesakup te menge tanà te tribu eni Isachar, Asher, Naftali, wey te ketenga he tribu ni Manase diyà te Bashan.

⁷Is menge kevuwazan ni Merari mibeǥayan te 12 he menge inged he nesakup te menge tanà te menge tribu eni Reuben, Gad, wey Zebulun.

⁸Pinaaǥi te kedripa, mibeǥayan te menge Israilihanen is menge kevuwazan ni Levi te menge inged wey menge penebtavà, su iyan heeyan insuǥù te Nengazen ki Moises.

⁹Iyan heini menge inged he nesakup te tanà te tribu ni Juda wey ni Simeon he imbeǥey ziyà te menge kevuwazan ni Aaron. Heini sikandan menge kevuwazan ni Kohat te anak ni Levi. Iyan sikandan nehuna he neripahan he ebeǥayan te menge inged.

¹¹Imbeǥey kandan is Kiriat Arba (he iyan is Hebron) ziyà te menge vuvungan te Juda, ragkes en is menge penebtavà diyà te peliǥuy kayi. (Si Arba iyan amey ni Anak.)

¹²Piru is menge vevesukà wey zezeisey he menge inged diyà te peliǥuy kayi he inged imbeǥey en mulà diyà te ki Caleb te anak ni Jefune he iyan kandin he vahin.