Yosua 21:3-12

³Ani layagola Isaraele hameigini bu hearume Anduane Homogohanda layadagua bialu dindi marubi tano marubi tininaga winiru Libai hameigini helonaga tu wa mini.

⁴Ani bialu tigua dindi tu wa mulene pigane Anduane Homogo ibunime Kohada hameiginiru dindi agohayagi tu wa mibehedabe hondolenaga ege to̱le̱ emene biaru baraga hene. Ani baraga howa handalu hearia loma binigo mo miaga Arono aguaneneru Kohada hameigini hayadaruni ti Yuda dindihabi Simiono dindihabi Beniyamini dindihabi dindi uruniha howa tano pira mbirani tebira (13) bibahende mini.

⁵Ani biyagola Kohada hameigini maru hayadaru tibi nde tano maru Eberaimi hameigini dindihabi Dana hameigini dindihabi Manase halu mende ni paliragohayagi henerunaga dindihabi dindi uruniha howa tano timbuni pira ti helonaga tu wa migi bini.

⁶Ani bialu Gesono hameigini hearu tibi nde tano pira mbirani tebira (13) tu wa mini. Tano timbuni uruni Isaga hameigininaga dindihabi Ase hameigininaga dindihabi Nabadali hameigininaga dindihabi Manase hameigini halu mende ni tagira ibiragohayagi henerunaga dindihabi dindi uruniha howa tu wa migi bini.

⁷Merari hameigini hearu tibi nde tano pira mbirani kira (12) tu wa mini. Tano timbuni uruni Lubene dindihabi Gada dindihabi Sebulunu dindihabi dindi uruniha howa tu wa miyagola ti uruniha hene.

⁸Isaraelealime Anduane Homogo ibugua Moseseha howa bi latagi hayadagua talialu tigua ege to̱le̱ emene biaru baraga halu Libai hameiginiru dindi ani tu wa migi bini. Tano uruniha dindi emene wigi biarubi Libai hameigini tinaga nogo sibi bulumagaru hinu helobi mini.

⁹Yuda hameiginibi Simiono hameiginibi tinaga dindiha howa tano timbuni Arono aguaneneru Kohada hameigini tu wa migi binirunaga mini uru gilibu wigi bida. Kohada hameigini ti Libai aguaneneru hene. Isaraelealiru tigua Arono aguanenerunaga dindi ala tu wabagi holenaga ege to̱le̱ baraga hene.

¹¹Tano timbuni mbira Araba mini mende Heberono ogoni winigo Yuda hameiginirunaga dindi hari bare wiagohayagi wini. Mini Araba ogoni Anaga aba hene. Yuda hameigini tigua dindi ogoni Arono aguanene ti helo mialu dindi bayale gibugibu wiarubi ti nogo sibi bulumagaru hinaga bialu helo mini.

¹²Ani bialu Heberono tano timbuni ogoninaga dindi emene wiarubi tano emene wia para ho wiarubi ala Isaraele hameigini tigua Yabune igini Kalebehondo tu wa mialu ibunaga dindi ogoniore ngelonaga mini.