Text copied!
CopyCompare
Holi Baibul - Jadjis

Jadjis 20

Help us?
Click on verse(s) to share them!
1Wal ola Isreil pipul bin majurrumap miselp na. Deibin kaman brom ebriweya langa det Isreil kantri, brom det taun gulum Den deya langa nowathsaid langa det kantri raidap langa det taun gulum Biyashiba deya langa sauthsaid, en brom det kantri gulum Giliyad deya langa sanraisaid. Deibin ol majurrumap miselp langa det Seikridwan Pleis blanga YAWEI det trubala God deya langa det taun gulum Mispa.
2Ola boswan blanga ol detlot pipul blanga God bin deya, en 400,000 solja bin deya du.
3Oni Benjamin klen nomo bin deya garram olabat. Bat deibin irrim det nyus. Wal ol detlot Isreil pipul bin askim det Libai men, “Yu dalim melabat. Wanim bin hepin deya? Hau dijan nogudbala ting bin hepin?”
4Wal det Libai men bin tok, “Wal ai dalim yumob wanim bin hepin. Aibin go garram main waif langa det taun gulum Gibiya deya langa det kantri blanga Benjamin klen. Minbala bin go blanga silip deya wan nait,
5en ola nogudbala men brom det taun bin kaman en jandap raidaran langa det haus blanga meigim mi dai. Bat deibin meigim main waif dai, dumaji deibin ol silip garram im en dumbat brabli nogudbala ting langa im.
6“Wal afta aibin deigim im bodi, en aibin kadimap im bodi, en aibin jandim difrinwan pat langa ebri Isreil klen. Aibin dum lagijat dumaji detlot kantrimen blanga wi bin dum brabli nogudbala ting blanga wi holot.
7Wal ol yumob pipul iya, yumob ol Isreil pipul, indit? Wal wanim wi garra du?” Lagijat na det Libai men bin tok.
8Wal ol detlot pipul bin jandap mijamet, en deibin tok wanwei, “Nomeda hu wi iya, bat stil wi kaan gobek langa wi ronwan kemp raidap wi garra streitinimap dijan trabul gudwei.
9Wal lagijat na wi garra dum. Wi garra tjakambat det dubala speshalwan ston blanga pikimat sambala men blanga go en fait langa detlot pipul deya langa Gibiya.
10Dei garra go en fait langa olabat blanga panishim olabat blanga det nogudbala ting weya deibin dum. En sambala men garra lukaftumbat daga blanga detlot men hu garra go en fait.”
11Lagijat na deibin tok blanga dum, en deibin ol agri blanga fait langa detlot pipul langa det taun.
12Afta na detlot Isreil pipul bin jandim wed ebriweya langa det kantri blanga Benjamin klen, en deibin tok, “Yumob bin dum brabli nogudbala ting.
13En yumob lafta hendimoba detlot nogudbala men brom Gibiya, en melabat garra kilim olabat ded, dumaji im peibek blanga det nogudbala ting weya deibin dum.” Wal detlot pipul brom Benjamin klen nomo bin lisin langa detlot najalot Isreil pipul,
14en Benjamin klen bin majurrumap miselp blanga fait langa detlot najalot Isreil pipul. Deibin majurrumap ola gudwan solja brom ebri taun blanga olabat,
15en deibin abum 26,000 solja deya hubin sabi fait garram longwan naif, en brom Gibiya bin kaman 700 lefthenbala solja hubin brabli gudshot langa det shangai.
17Wal ol detlot najalot Isreil klen hubin majurrumap miselp bin abum 400,000 solja hubin sabi fait,
18en deibin go langa det Seikridwan Pleis blanga YAWEI deya langa det taun gulum Bethel, en deya na deibin askim God, “Wujan klen garra go lida en fait det Benjamin klen?” Wal YAWEI bin dalim olabat, “Det Juda klen garra go lida blanga fait basdam.”
19Ailibala neksdei deibin go gulijap langa Gibiya, en deibin meigim kemp deya redibala blanga fait,

20en afta deibin jandim detlot solja blanga jandap gulijap langa det taun blanga fait detlot Benjamin solja,
21en detlot Benjamin solja bin kamat brom det taun, en deibin fait langa olabat, en detlot Binjaman solja bin bidim olabat brabliwei, en deibin kilim 22,000 Isreil solja ded.
22Brom deya detlot Isreil pipul bin go langa det seikridwan pleis blanga YAWEI igin, en deya na deibin sori miselp en kraikrai raidap sangodan, en afta deibin askim God, “Melabat garra stil gobek en fait langa detmob?” En God bin tok, “Yuwai. Yumob garra gobek en fait.” Wal wen God bin tok lagijat, ola Isreil solja bin gudbinji, en deibin filim miselp strongbala, en deibin gobek langa det taun, en ola solja bin go en jandap langa det seim pleis blanga fait igin,
24en detlot Benjamin solja bin kamat brom det taun blanga fait langa olabat, en nomeda detlot Isreil solja bin sabi fait, bat stil detlot Benjamin solja bin bidim olabat, en deibin kilim 18,000 Isreil solja ded.
26Brom deya detlot Isreil pipul bin go langa det seikridwan pleis blanga YAWEI igin, en deibin sori miselp en kraikrai en nomo dagat eni daga raidap det san bin godan, en deibin gibit det ofring gulum feloship ofring langa God, en deibin abum det sekrifais serramoni blanga im du.
27Deibin dum lagijat dumaji det Seikridwan Boks garram det lowa blanga God bin jidan deya gin langa det taun, en det haibala serramonimen neim Finiyas bin jidan bos blanga det boks. Det serramonimen bin grengrensan blanga Eliyeisa, det san blanga Eran. Wal ol detlot Isreil pipul bin askim YAWEI, “Melabat garra stil gobek en fait langa detlot Benjamin solja? O maitbi melabat kaan go en fait? Wanim melabat garra du?” En God bin tok, “Yumob garra gobek en fait, en tumorro ai garra meigim yumob win.”
29Wal detlot Isreil solja bin go en blandim sambala solja raidaran langa Gibiya,
30en afta ola najalot solja bin go en jandap langa det seim pleis weya deibin fait basdam.
31Wal bifo deibin go en fait, detlot Isreil solja bin meigim plen blanga deigidawei detlot Benjamin solja brom det taun en fait langa olabat atsaidwei langa det dubala meinwan roud. Wal detlot Benjamin solja nomo bin sabi det plen, en wen deibin kamat brom det taun blanga fait, deibin stat kilimbat detlot Isreil solja deya langa det dubala meinwan roud. Deibin kilim 30 solja ded, en ol detlot najalot Isreil solja hubin fait deya bin stat ranawei blanga deigidaweibat olabat brom det taun. Bat detlot Benjamin solja bin reken deibin bidim olabat, en deibin tok, “Wibin bidim olabat seimwei laik bifo.”
33Wal ol detlot Isreil solja bin meigim detlot Benjamin solja bulurrum olabat longwei brom det taun, en deibin go raidap langa det pleis gulum Beilteima. En wen detlot Isreil solja bin majurrumap miselp deya blanga fait igin, detlot najalot Isreil solja hubin blandim miselp basdam langa det stoniwan kantri weya bin jidan raidaran langa det taun bin kamat na.
34Deibin abum 10,000 brabli gudwan solja hubin blandim miselp deya, en deibin go insaid langa det taun en fait langa ola pipul deya. Wal nomeda ol detlot Benjamin solja bin reken dei garra bidim detlot Isreil solja, bat stil dei nomo bin sabi dei garra ol dai, en deibin abum bigiswan fait,
35en YAWEI bin meigim ola Isreil solja bidim detlot Benjamin solja, en deibin kilim 25,100 solja ded,
36en afta ola Benjamin solja bin sabi deibin lus det fait, dumaji detlot Isreil solja bin meigim det plen basdam. Deibin ranawei brom detlot Benjamin solja dumaji deibin meigim det plen blanga detlot najalot Isreil solja hubin blandim miselp raidaran langa det taun,
37en wen detlot Benjamin solja bin ranimap detlot Isreil solja longwei brom det taun, detlot najalot Isreil solja hubin blandim miselp bin kamat, en deibin gowin langa det taun kwikbala, en deibin kilim ebribodi deya ded,
38en afta deibin barnimap det taun.
39Wal wen detlot Isreil solja hubin ranawei bin luk det smok bin kamat brom det taun, deibin sabi imbin taim blanga olabat blanga tenaran blanga fait langa ola Benjamin solja. Bat detlot Benjamin solja nomo bin sabi wanim garra hepin, dumaji deibin olredi kilim 30 Isreil solja ded, en deibin dalim miselp, “Trubala wibin bidim olabat seimwei laik bifo.”
40Wal wen det smok bin gidap brom det taun, detlot Benjamin solja bin lukbek, en deibin hatjamp wen deibin luk bigiswan faiya bin gidap brom det taun weya imbin barnbarn,
41en seimtaim detlot Isreil solja bin tenaran en stat fait langa detlot Benjamin solja, en detlot Benjamin solja bin bradin, en dei nomo bin sabi wanim blanga dum, dumaji deibin sabi detlot Isreil solja garra bidim olabat,

42en deibin stat ranawei langa det plein kantri. Bat dei nomo bin gidawei, dumaji detlot Isreil solja hubin barnimap det taun bin go en album detlot najalot Isreil solja, en detlot Benjamin solja bin faindim miselp rait langa midul langa olabat, en deibin binijimap olabat.
43Detlot Benjamin solja bin trai ranawei sanraisaid brom det taun. Bat detlot Isreil solja bin ranimap olabat, en deibin kilim olabat ded olawei.
44Wal deya na 18,000 gudwan solja brom Benjamin klen bin dai.
45Bat ola najalot solja bin gidawei, en detlot Isreil solja bin ranimap olabat raidap langa det plein kantri deya langa det ston gulum Riman, en deya na langa det roud deibin kilim 5,000 Benjamin solja ded, en detlot Isreil solja bin kipgon ranimap detlot Benjamin solja raidap langa det pleis gulum Gidam, en deya na deibin kilim 2,000 solja ded.
46Brom ol detlot Benjamin solja hubin deya langa det fait, 25,000 bin dai, en deibin ol brabli gudwan solja du.
47Bat 600 solja bin ranawei, en deibin blandimbat miselp deya langa det plein kantri langa det ston gulum Riman fo fobala mants.
48Wal afta wen detlot Isreil solja bin binij kilimbat ol detlot Benjamin solja, deibin go en kilim ded ola Benjamin pipul weya deibin faindim. Deibin kilim ola men en ola wuman en ola biginini en ola enimul blanga olabat, en deibin barnimap ola taun blanga olabat du, en afta nomo enijing bin jidan.