1Ätei Melkisetek i kingen Salem, pwal eman souasor nöün Kot ewe mi Unusen Tekia. Lon fansoun Apraham a liwinto seni ewe maun lupwen a akufu ekewe föman king, Melkisetek a churi o afeiöchü.
2Iwe, Apraham a ngeni ätei eu leengolun choon wokun meinisin. Aeuin wewen ei it Melkisetek “Kingen Pwüng”, nge pokiten i kingen Salem itan a pwal iei wewen “Kingen Kinamwe”.
3Esap wor uruwon saman ika inan ika an lewo, esap pwal wor uruwon an uputiu ika an mäla. Iwe, a usun ewe Nöün Kot, a nonom lon wisen souasor tori feilfeilachök.
4Ren ei oua silei usun tekian Melkisetek. Apraham ach we lewo mi iteföüla a ngeni eu leengolun choon wokun meinisin.
5Iwe, lon pwüngün ewe allük ekewe mwirimwirin Lefi, ir mi wiseni ewe wisen souasor, ra wisen angei ewe leengolun seni mine ekewe chon Israel ra eäni, wewen seni pwiir kewe. Nge inamwo ika ir pwiir kewe, ir pwal mwirimwirin Apraham.
6Melkisetek esap eman mwirimwirin Lefi, nge a angei ewe leengol seni Apraham o afeiöchü Apraham, nge Apraham ätewe Kot a fen pwon ngeni.
7Sia fokun silei pwe ätewe mi lap a wisen afeiöchü ätewe mi kis.
8Ren ekewe souasor mi ionifengeni ewe leengol, ir aramas repwe tolong lon mäla. Nge ren Melkisetek a angei ewe leengol, i ewe eman mi manau, esap mäla usun mine a mak lon ekewe Toropwe mi Pin.
9Iwe, sipwe tongeni apasa, pwe lupwen Apraham a isetiu ewe leengol, Lefi a pwal isetiu, inamwo ika mwirimwirin kana ra angei ewe leengol seni aramas.
10Pun Lefi esamwo uputiu, nge sia tongeni apasa pwe a nom lon inisin an we lewo Apraham, lupwen Melkisetek a churi.
11Kot a ngeni ekewe aramasen Israel ekewe Allük, nge ra longolong won angangen ekewe souasor, ir mwirimwirin Lefi. Iwe, are angangen ekewe souasor, ir mwirimwirin Lefi, epwe unusöch, esap wor lomoten än pwal eman souasor epwe wareto seni lon tettelin Melkisetek, nge sap eman seni lon tettelin Aaron.
12Pun are tettelin ekewe souasor epwe siwil, epwe pwal wor siwilin ekewe allük.
13Iwe, ekei kapas ra makketiu fän iten ach Samol a nom lon pwal eu sokun ainang. Esap wor eman seni an we ainang a fen mwo nge wiseni ewe wisen souasor.
14Pun a fokun fat pwe ach Samol a uputiu seni ewe ainangen Juta. Nge Moses esap kapas usun ei ainang lupwen a fos usun ekewe souasor.
15Ei pworaus a fokun fatafatöchüla, pwe pwal eman souasor usun chök Melkisetek a wareto.
16I a tolong lon ewe wisen souasor sap pokiten än aramas allük ika akot, nge pokiten manamanen eu manau esap tongeni müchüla.
17Pun a mak lon ekewe Toropwe mi Pin, “En kopwe eman souasor tori feilfeilachök lon tettelin Melkisetek.”
18Iei usun ewe allük minen lom a wesila, pun a apwangapwang o lomotongau.
19Pun ekewe Allük resap tongeni aunusöchüela och mettoch. Nge iei eu apilükülüköch mi mürina seni a fen molotä fän itach, pwe sipwe arap ngeni Kot ren.
20Iwe, mi pwal wor än Kot pwon fän akapel. Lupwen ekewe pwal ekoch ra tolong lon wisen souasor, esap wor ena sokun akapel.
21Nge Jesus a wiseni ewe wisen souasor ren eu pwon fän akapel, lupwen Kot a üreni, “Ewe Samol a pwon fän akapel, nge esap siwili an ekiek, ‘En kopwe eman souasor tori feilfeilachök.’”
22Pokiten ei pwon fän akapel Jesus a wiliti eu minen allükülükün eu pwon mi fokun mürina.
23Iwe, mi wor chomong ekewe souasor, pokiten ra mäla resap tongeni sopwela angangen wiser.
24Nge Jesus a manau tori feilfeilachök, an angang lon wisan wisen souasor esap la ngeni pwal eman.
25Iei mine a tongeni amanaua chokewe meinisin mi arap ngeni Kot ren i fansoun meinisin, pun a manau tori feilfeilachök pwe epwe tüngor ngeni Kot fänäsengesiir.
26Iei usun Jesus ewe Souasor mi Lap a alisikich lon ach osupwang meinisin. I ewe mi pin, esap wor an mwäl ika an tipis. Kot a aimwüela i seni chon tipis o atekiatai seni ekewe läng.
27Nge Jesus esap pwal wewe ngeni ekewe ekoch souasor mi lap. Esap wor lomoten an epwe eäni asor iteiten rän, akom fän iten püsin an tipis, mürin fän iten än ekewe aramas tipis. A eäni eu asor fän eu chök, nge a naf ngeni fansoun meinisin, lupwen a asor püsin inisin.
28Lon pwüngün ekewe Allük, aramas resap unusöch ra kefilitä lon ewe wisen souasor mi lap. Nge än Kot pwon mi fis fän akapel a tapweto me mürin ekewe Allük, a filätä ewe Nau mi unusöch tori feilfeilachök.
