1Melkizedek azi mi miri qetŋi Salem miaŋgö kiŋ kembuŋi aka Anutu öŋgöŋgöŋaŋgö jike nup galömŋa malök. Mewö maliga Abrahamnöŋ kiŋ kembuŋi kembuŋi bim qeba luhut al eŋgiba liliŋgöba miriŋe kayöhi, nalö miaŋgöreŋ kaba Abraham miwikŋaiba kötuetköm waŋgiyök.
2Kötuetköm waŋgiiga sukinapŋi pakpak mendeŋda ten mieŋgöreŋök mohot mohot (1/10) memba nalukŋa al waŋgiyök. Melkizedek qet miaŋgö könaŋi mi “ahakmeme solanŋaŋgö kiŋ kembuŋi.” Qetŋaŋgö dop mutuk “ahakmeme solanŋaŋgö kiŋ kembuŋi” ahök aka toroqeba mewöyök “Salemgö kiŋ kembuŋi” malök. Salemgö kiŋ kembu qet miaŋgö könaŋi mi “luaigö kiŋ kembu”.
3Melkizedeknöŋ iwinamŋi aka saiwaurupŋi qahö, ahuahu nalöŋi qahö aka kömukömuŋi qahö. Mewö jike nup galöm bohonŋi aka nalö teteköŋi qahö mal öŋgöma. Yaŋön Anutugö Nahönŋaŋgö tandök ewö akza.
4Bömönjalönini Abrahamgö gödaqeqe silikŋan Melkizedekö könaŋi kondeli mi kewö ek asarime: Abraham nanŋak sukinap yuai aködamunŋambuk kalöpköba memba kayöhi, mieŋgöreŋök börö yahöt (10) pakpak kewöta bahöŋi mohot memba Anutugö nalukŋa al waŋgii miaŋgöra Melkizedeknöŋ mönö ölŋa öŋgöŋgöŋi ketaŋi qainŋi kun akza.
5Anutunöŋ Köna keuŋan keu kewö jim kutum neŋgii ahöza, “Liwaigö gwölönarökurup al eŋgigetka jike nup meme azi (Liwait) aketka könagesö eŋön mönö sukinapŋini börö yahöt (10) pakpak kewöta mieŋgöreŋök bahöŋi mohot memba Anutugö naluha al eŋgimakŋe.” Yeŋön iŋini ewö Abrahamgö gwölönarökurupŋi akzemö, mi töndup nanŋini könagesöurupŋini eŋgö böröŋineyök naluknini mi buŋa qem aŋgumakŋe.
6Jimkutukutu keu mewö ahözapmö, Melkizedeknöŋ Liwaigö gwölönarökŋi kun qahö akza. Mi töndup Abrahamnöŋ Anutugö jöhöjöhö keu möt aŋgön köla mala sukinapŋi kewöta tenöhök mohot memba Anutugö nalukŋa alöhi, mi mönö buŋa qem aŋguba kötuetköm waŋgiyök.
7Ketaŋamninaŋgö nembö bapŋine maljini, yeŋön mönö kötuetköm neŋgigetka maljin. Keu mi qaŋ kölbingö osimakzin.
8Könagesö neŋön tenöhök mohot memba Anutugö naluha alakzini, mi gölmegö jike nup meme (Liwait) ambazipnöŋ buŋa qem aŋgumakze. Yeŋön gölmenöŋ mala kömumakzemö, Suep mire euyaŋgöreŋ kungöra naŋgöba jigetka köhöiba mal öŋgömawi, yaŋön mönö mi buŋa qem aŋgumakza.
9Abrahamnöŋ sukinapŋi kewöta börö yahöt (10) pakpak mieŋgöreŋök bahöŋi mohot memba Anutugö nalukŋa alöhi, yaŋön mi gwölönarökŋi Liwaigöra mewöyök qeljiŋe alök. Mewö jiinga ölöp dop kölbawak. Nalö kewöŋe tenöhök mohot memba Anutugö nalukŋa alakzini, mi bömönini Liwaigö gwölönarökurupŋan buŋa qem aŋgumakze.
10Liwaigö salupŋe mewöyök naluk alöhi, miaŋgö könaŋi kewö: Liwainöŋ amböŋaŋgö körö uruŋe tariga Melkizedeknöŋ mönö nalö miaŋgöreŋ kaba Abraham miwikŋaiyök. Mewö.
11Anutunöŋ Köna keuŋan Israel ambazip jim kutum neŋgiiga miaŋgö dop Liwai kambunöhök azi kuŋgum eŋgiinga jike nup galömnina aket. Nup mi megetka mewö miaŋön aködamunini pakpak miwikŋaibinak ewö, nini mönö jike nup galöm qainŋi kungöra qahö osibinak. Nup miaŋgö ölŋan qahö dop kölöhaŋgöra aka Jisösnöŋ mönö Melkizedek ewö asuhuyök. Ambazipnöŋ i Arongö areŋaŋgö dop qahö kuŋgugetka asuhuyök.
12Jike nup galöm nupŋaŋgö könaŋan uteközawi, nalö miaŋgöreŋ köna keuninan mönö mewöŋanök uteköza.
13Jike nup galöm qainŋi kun keu mi Kembuninaŋgöra jizinmö, yaŋön Liwai kambunöhök qahöpmö, mönö kambu kunöhök asuhuyök. Kambu miaŋgö azi kunŋan mönö jöwöwöl jikegö altanöŋ kinda nup qahö memba malök.
14Kembuninan Juda kambunöhök asuhuyöhi, keu mi aukŋe ahöza. Mosesnöŋ Juda kambu yeŋön jike nup galöm kölmegö keu kun qahö jiyök.
15Miaŋgöra jike nup galöm kun Melkizedekö tandök ewö asuhuzawi, miaŋön mönö keu jizinaŋgö ölŋi mi aukŋeyök kondeliga dopŋe akza.
16Yaŋön gölme ambazipnöŋ Köna keu wuataŋgöba kambuŋaŋgö dop jim kutugeraŋgöra aka jike nup galöm qahö ahökmö, malmal köhöikŋi qahö ayapkömawi, miaŋgö kukösumŋan mönö nam köl waŋgiiga jike nup galöm ahök.
17Kunöŋ yaŋgö könaŋi naŋgöba jiiga Buŋa Kimbinöŋ kewö ahöza, “Göŋön Melkizedek ewö jike nup galöm aka nalö teteköŋi qahö mal öŋgöman.”
18Anutunöŋ mewö jiba jimkutukutu mutukŋi mi qeapköyök. Keu miaŋgö kukösumŋan qahöwahiga bauköm neŋgimapkö osimakzawi, miaŋgöra mi qeapköyök.
19Köna keunöŋ ambazip aködamunini miwikŋaibingö qahö bauköm neŋgiyök. Qahö. Miaŋgöra keu areŋ mutukŋi qeköba salupŋe jörömqöröm qetpuk sorok neŋgiza. Nini jörömqöröm miaŋgö qakŋe kinda ölöp Anutugö kösutŋe anda köulukömakin.
20Anutunöŋ jike nup galöm dölökŋaŋgö keuŋi jiba mi jöjöpaŋ keuŋan jim köhöiyök. Mewö ahökmö, jike nup galöm tosatŋi yeŋgö keuŋini mi jöjöpaŋ keunöŋ qahö jim köhöigetka töndup mewö aket.
21Tosatŋan jike nup galöm öne aketmö, Anutunöŋ Jisös kuŋguba keuŋi mi jöjöpaŋ keuŋan jim köhöiba yaŋgöra kewö jiyök, “‘Gi mönö jike nup galöm aka nalö teteköŋi qahö mal öŋgöman.’ Kembunöŋ keuŋi mi jöjöpaŋ keuŋan jim köhöiba uruŋan mi qahö uteköma.”
22Jöjöpaŋ keu miaŋgöra aka Jisösnöŋ mönö jöhöjöhö areŋ dölökŋaŋgö ölŋi asuhumapkö galömŋi akza. Mewö Anutu aka ambazip sutnine nup memba malja. Jöhöjöhö areŋ miaŋön walŋi oŋgita qetpuk sorok akza.
23Jike nup galöm tosatŋi mi mönöwök gwötpuk malget. Kömumba nupŋini toroqeba membingö osigeri, miaŋgöra mi mönö gwötpuk malget.
24Yeŋön gwötpuk malgetmö, Jisösnöŋ nalö teteköŋi qahö mal öŋgömawi, miaŋgöra jikegö galöm nup mi mönö teteköŋi qahö memba mal öŋgöma.
25Nup mi memba maljawaŋgöra Jisösnöŋ ambazip yaŋgöreŋ kagetka eŋguaŋgiri Anutugö kösutŋe anakzei, mi ölöp köhöiba amöt qem eŋgii keuŋinan kömumakza. Nalö dop yeŋgöra aka Anutu köulukömak-ŋapköra maljawi, miaŋgöra mönö ölöp amöt qem neŋgim tekömakza.
26Jike nup galöm bohonŋi mewöŋan mönö ölöp dop köl neŋgiza. Yaŋön töröŋi köpösihitkö keuŋi qahö aka sarakŋi akza. Anutunöŋ Jisös siŋgisöndok ambazip neŋgöreŋök tiriŋ kutuba waŋgiri Suep jakeŋi pakpak kutuba euyaŋgöreŋ öŋgöba qainŋi kun akza.
27Jike nup galöm tosatŋan sömaŋi sömaŋi mutuk nanŋini siŋgisöndokŋinaŋgöra aka miaŋgö andöŋe könagesö yeŋgö siŋgisöndokŋinaŋgöra aka sömbupnöŋ jöwöwöl ohoba maljema. Jisösnöŋ nanŋi sileŋi köleŋniga jöwöwöl ohoho ewö ak waŋgigetka mewö miaŋön könagesö neŋgö siŋgisöndoknini mi indim mohot miaŋgöreŋök lök köl könjörari dop köl teköza. Miaŋgöra Jisösnöŋ mi jike nup galöm tosatŋi ewö nalö dop ahakŋapkö qahö osiza.
28Anutunöŋ Köna keuŋi Moses waŋgiiga miaŋgö dop ambazipnöŋ azi mi kuŋgum eŋgigetka jike nup galöm bohonŋi ahakze. Gölme azi yeŋön kukösumŋini qahö maljemö, Anutunöŋ oyaeŋkoyaeŋ akingö keuŋi mi könaŋgep neŋgiba mi jöjöpaŋ keuŋan jim köhöiyöhi, miaŋgö dop Nahönŋi kuŋguiga bohonini akza. Bohonini yaŋön mönö aködamunŋi körek pakpak lök miwikŋaiba nalö teteköŋi qahö köhöikŋi mal öŋgöba malma. Mewö.
