1Teina Melekisedeka ta iya Salema yodi wasawasa, yo Yaubada Saesaekalilina yona taukaitalasam tamowaina. Huyana Abelahama wasawasa ye saepwaidi gehena na yona uyoma magai unai, meta Melekisedeka iya ye hailobai na hededehenamwa ye mosei Abelahama unai.
2Yo Abelahama gogo iyala unai ye haiꞌuyoidi wa maudoidi luwadiwai yona taiti ye hai ye mosei Melekisedeka. Hesa Melekisedeka kaniyona ede “laulaududulai wasawasana”, yo hesa Salema kaniyona ede “nuwadaumwali”, unai iya hinage “nuwadaumwali wasawasana”.
3Iya nige tamana yo sinana yo kana mumugao yo yona huyatubu yo yona mauli sigana wasadi, na iya meta taukaitalasam tamowaina ye lau huya nige sigana, doha Yaubada natuna.
4Na tamada Abelahama iyala unai gogo ye haidi wa yona taiti ye mosei Melekisedeka, unai ta nuwatulobai meta tamowai ta ye saekalili.
5Laugagayo ye hedede meta taukaitalasam siya ede Lewi kana isimulitao hekadiyo, bena Isalaela tamowaidi maudoidi udiyedi taiti se tanoi. Tamowaidi ta meta siya kadi kahao, na maudoidi ta Abelahama unai se tubuma.
6Teina Melekisedeka ta iya nige Lewi kana boga hesau, na iyamo taiti ye hai, yo hinage Abelahama, iya hededehesunuma tauhaina wa, ye hededehenamwa.
7Nige gonowana ta nuwapwanopwano, matawuwuna maudoida kabina ta kata meta tamowai dobidobina hededehenamwa ye hai tamowai saesaena unai.
8Taiti tautanotano ne, siya kabo se boita. Na taiti tauhaina hesau ede Melekisedeka, na Yaubada ye hedehedede meta iya kabo ye miya ye lau nige kana siga.
9Unai gonowana kabo ta wane, Abelahama taiti yona tolena ta meta Lewi hinage taiti ye tole,
10matawuwuna ede huyana Melekisedeka Abelahama ye hailobai, meta Lewi iya sola kana mumuga Abelahama tauna luwanawai.
11Taukaitalasam Lewi unai tautubuma wa yodi paisowa yona kabalaoma ede Mose yona laugagayo. Na iyamo taukaitalasam ne nige gonowadi tamowai yodi yababa udiyedi se tolehedudulaidi. Unai Yaubada taukaitalasam hesau ye hetamaliyama, iya ede doha taukaitalasam Melekisedeka, na nige doha Aloni.
12Teina unai Yaubada taukaitalasam yona paipaisowa ye bui, ede laugagayo hinage ye bui.
13Teina hedehedede maudoidi ta tamowaina wa meta iya nige Lewi kana isimulita hesau, na iya boda udoi. Na tenem boda ne unai meta nige tamowai hesau kaitalasam paisowana ye ginauli.
14Ye masalaha meta yoda Guiyau iya Yuda kana isimulita, yo Mose nige saha ye hedede bena taukaitalasam hesau Yuda kana boda unai kabo ye tubuma.
15Yo saha ka hedede ta ye masalahakalili, ena taukaitalasam hesau doha Melekisedeka ye masalahama.
16Iya ye hemala taukaitalasam meta nige laugagayo debanawai, kaniyona ede kana mumugao siya taukaitalasam bagubagunadi. Na ye hemala taukaitalasam mauli nige yona kabagehe yona gigibwali debanawai.
17Matawuwuna Yaubada ye hededeyako ye wane, “Kowa taukaitalasam miyamiyahaina doha Melekisedeka.”
18Laugagayo yo kabikabidi bagubagunadi wa Yaubada ye tolehesuwaladi matawuwuna ede se basabasa yo nige kaniyodi,
19matawuwuna laugagayo ta nige gonowana tamowai se tole hedudulaidi. Na Yaubada hededehesunuma namwanamwadi ye ledima, se saguida na udiyedi kabo gonowana ta sigilau Yaubada unai.
20Laugagayo yo kabikabi hauhauna ta Yaubada ye hetubu na hededekaigwala ye ginauli Yesu unai. Na nige hededekaigwala hesau ye ginauli taukaitalasam tamowaidiyao bagubagunadi udiyedi.
21Na huyana Yesu ye hemala taukaitalasam, Yaubada hededekaigwala ye ginauli ye wane, “Guiyau ye kaigwalako, yo iya taba nige nuwana ye bui: Kowa kabo taukaitalasam ye lau ee huya nige sigana”
22Teina hededekaigwala ta debanawai Yesu ye hemala talam namwanamwana tauhaiyamana. Talam ne ye namwakalili na kabo talam beyabeyana.
23Taukaitalasam Lewi unai tautubuma wa meta se badokalili, matawuwuna boita ye hekaiyawasidi unai kadi paisowa nige se laei sigana unai.
24Iyamo Yesu ye miya ye lau nige sigana, unai iya ye hemala taukaitalasam miyatahitahina.
25Unai iya gonowana tamowai ye hemaulidi, siya ede tamowaidiyao Yesu debanawai se laoma Yaubada unai. Matawuwuna iya ye miya ye lau nige kana siga na huya maudoina kabo yodi ye kaikaibwada.
26Ye namwakalili to yoda taukaitalasam saesaena ede Yesu, matawuwuna iya tabuna, nige kana gilu hesau, ye aꞌa, iya tamowai yodi yababa nige ye patulau udiyedi, yo galewa ne unai ye saekalili.
27Taukaitalasam saesaedi Lewi kana isimulitao, siya bena mayadai badobado kaitalasam se ginaginaulidi, bagubaguna se bom yodi yababa hesabadi na kabo tamowai maudoidi yodi yababa hesabadi. Na Yesu meta udoi. Iya tamowai yodi yababa maudoidi debadiwai kaitalasam kesega mo ye ginauli huyana ye moseꞌuyoi sataulo ne unai.
28Tamowai se basabasakalili, na iyamo laugagayo debanawai se hemala taukaitalasam saesaedi; na laugagayo mulinawai hededekaigwala ye laoma, na unai Yaubada Natuna ye kaisunuwai ye hemala taukaitalasam saesaena. Yaubada iya ye tolehedudulaimamohoiyei ye lau ee nige kana siga.
