1Mepibaenitique Melquisedec chenu su. Tueda da Salem ejude sa echua puji aida puidha. Diusu aida sa sacerdote puidha. Biahua tiempo Abraham chenu, mesa soldado cuana neje echua puji madhada cuana manuamepe putsu, esiapatibeyu su, Melquisedec chenu ja tsutitaidha. “Diusu ja ibunebataque”, Abraham chenu ataidha.
2Da su Abraham chenu ja echua puji madhada cuana jenetia jemitaidha ai cuana Melquisedec chenu piada diezmo tiataidha. Melquisedec chenu ebani da, “Salem ejude sa Echua Puji Nimebutsepi”, puidha. Tueda ejude su pamapa nimepijajajiji anitaidha.
3Tata, cuara mahue bataji puidha. Cuaja shanapa taji mahue cuaja pupirume puidha. Cuaja shanapa taji mahue tusa bataji puidha tsine. Daja huecha cuaja manume puidha. Da su tueda da sacerdote epueni Diusu sa Ebacua Jesucristo nime.
4Mepibaenitique Melquisedec chenu su. Tueda da deja aida puidha putsu, ecuana sa tata Abraham chenu ja echua puji madhada cuana jenetia jemitaidha ai cuana piada diezmo tiataidha.
5Beju Moisés chenu ja judío cristiano cuana uja cuatsasiataidha: “Pamapa Levi chenu sa familia jenetia sacerdote cuana diezmo tia taji tuna etsahua puji.” Daja Moisés chenu ja cuatsasiataidha patiata huecuana, sacerdote cuana Abraham chenu sa familia cuana jenetia putaidha biame.
6Beju Melquisedec chenu da aimue Levi chenu sa familia jenetia mahue biame, diezmo inatsutaidha. Da putsu, Melquisedec chenu ja Abraham chenu: “Diusu ja ibunebaque”, ataidha.
7Daja Melquisedec chunu ja Abraham chenu ataidha tueda Abraham chenu ebia su aida puidha putsu, Diusu ja Abraham chenu bahui mesa jamitsuti tiataidha biame.
8Sacerdote cuana da deja emanu cuana biame, diezmo einatsutani huecuana cristiano cuana peje jenetia. Melquisedec chenu ja mu deja emanu mahue nime putsu, diezmo inatsutaidha Abraham chenu jenetia.
9Beju sacerdote cuana da Levi chenu sa familia jenetia. Tuneda diezmo cuana inatsutaidha cristiano cuana peje jenetia. Levi chenu da Abraham chenu jenetia bataji puidha. Da su Abraham chenu ja Melquisedec chenu diezmo tiataidha su, Levi chenu di tia cua pu cua nime diezmo tiame ataidha, bataji puji mahue biame, Abraham chenu da Levi chenu sa tata chenu puidha putsu.
11Levi chenu, pamapa sacerdote cuana di Aarón chenu sa familia jenetia. Tuneda Moisés chenu sa jacuatsasiati cuana israelita cuana tiataidha. Aimue tueda sacerdote cuana ja jacuatsasiati neje cristiano cuana saida, nimebutsepi Diusu peje su ataidha mahue. Da putsu, pia sacerdote Melquisedec chenu nime jatsatidha cristiano cuana Diusu peje su saida, nimebutsepi yameta puji.
12Beju sacerdote cuana eturucati su, jacuatsasiati cuana sa di jaturucati taji.
13Equene sacerdote cuana da Levi chenu sa familia jenetia bahui dharejiji puina. Tuneda Diusu peje su irutsuataidha cristiano cuana sa puji. Jiahue mu Echua Puji Jesucristo ecuana sa sacerdote aida eichacua. Diusu ja tueda sacerdote ichatana, tueda Judá chenu sa familia jenetia biame.
15Beju tueda da sacerdote aida Melquisedec chenu nime. Aimue Levi chenu sa familia jenetia mahue. Pamapa Levi chenu sa familia jenetia sacerdote cuana emanutani. Cristo mu aimue emanu mahue. Da putsu, Diusu ja tueda sacerdote aida ichataidha Melquisedec chenu nime.
17Uja Diusu puidha Cristo jepuiti: Mida da sacerdote epueni Melquisedec puidha nime.
18Da su Moisés chenu sa jacuatsasiati cuana Diusu ja apemetana, tueda jacuatsasiati cuana ja cristiano cuana cuaja d'eji su a taji mahue batana putsu.
19Tueda jacuatsasiati cuana ja aimue aidhe biame nimebutsepi atana mahue. Tueda jacuatsasiati cuana sa eturuca jiahue mu ecuana sa ebia su saida janimeid'uati yani. Jiahue ecuaneda Diusu peje su enariati Jesucristo jepuiti.
20Biahua tiempo sacerdote cuana aimue Diusu bahue neje ichajiji putaidha mahue. Tuneda sacerdote putaidha, Levi chenu sa familia jenetia hue putsu. Jiahue mu beju Diusu ja Cristo sacerdote ichatana Diusu bahue neje. Uja Diusu sa quirica su derejiji yani: Uja Diusu Diusu bahue puidha putsu, aimue detse aiya biame turucata cua mahue: “Mida da sacerdote epueni Melquisedec puidha nime.”
22Daja Diusu Diusu bahue puidha putsu, Jesucristo ja ecuana Diusu peje su, nimebutsepi ata cua pia equene sacerdote ebia su saida.
23Equene sacerdote cuana da tisutisu manutaidha. Da putsu, anitaidha jucuada.
24Jiahue mu aimue daja mahue Jesús neje. Tueda emanu mahue putsu, aimue pia ja tueda eturucata mahue.
25Da putsu, cristiano cuana d'eji su ata cua. Quebata cuana Cristo jepuiti Diusu peje su enariatita su, d'eji su eputa. Beju Cristo ja tuneseda puji Diusu pamapa hora su ebajatani, eid'e eni putsu.
26Da su Jesucristo da ecuana tsana sacerdote aida. Tueda da nimebutsepi, ai madhada jucha mahue. Juchaji cuana peje jenetia ichaderajiji yani. Tueda cielo su yani pamapa ai cuana ebia su aida.
27Aimue tueda pia equene sacerdote aida nime mahue. Aimue tuseda animalo cuana manuame taji puina mahue Diusu peje su eirutsua puji. Pia equene sacerdote cuana ja tuna sa jucha quitaita sa puji Diusu peje su manujiji animalo cuana equene irutsuataidha. Da su beju pia cristiano cuana sa jucha cuana sa puji di irutsuataidha huecuana. Jesús ja mu piada nuati hue Diusu peje su tueda quitaita jairutsuatiana pamapa cristiano cuana sa jucha cuana sa puji.
28Equene sacerdote aida cuana da deja juchaji cuana putaidha biame, sacerdote puji ataidha huecuana cuaja Moisés sa jacuatsasiati batame. Da su Diusu ja jacuatsasiati cuana apemetana, mesa Ebacua Jesucristo Diusu bahue neje sacerdote aida, eichacua, butsepi ichaenitana putsu.
