1Melikisede e hâcne Salem haere ŋicwofuŋ â Anutu femicne sâko ere taha bapa juwec. Eki hâcne Abrahamzi ŋicwofuŋ râsifâc‐ticne joparâ risiehame ra hatao bâfuarâ jambuŋkewec.
2Erâ e hâcne Abrahamzi mafa mateŋ bâtâc barâ teŋkonec wâŋ irec sâc râcnewec. Melikisede ʒâŋe‐ticne nâŋâcne dâŋko “Tiŋne ŋicwofuŋ”, â Salem ŋicwofuŋ ine “Wama ŋicwofuŋ”.
3Melikisede e neŋgoc mamac tâmiric, apa ŋosa fuŋne‐ticne qahuc mi mufuakicne, e juju‐ticne fufuŋke tâmiric â tatara tâmiric. E Anuture Ŋokâ ere sâsâc eocte mukicnezi taha bapa juju hati ewec.
4Ʒi honeniŋ, e ŋic fekicne mo iŋucne irec mimiŋne‐nâŋec Abrahamzi mafa mateŋ biaŋne sasawa bâwosâerâ teŋkonec wâŋ irec sâc râcnewec.
5Lewire ɋâricfâc gâcne taha gie baniŋte mujarekicne jaŋe ŋic ŋokac âgofâc‐jeŋic Abrahamte tofâfâc jaha sifu mafa wiac teŋkonec wâŋ irec sâc jowac roniŋte sâcmutâc dâŋqâhâcko mutâcne‐jarekicne.
6Â Melikisede e jaŋere guruonec mi fuakicnezi ine Abrahamtaonec teŋkonec wâŋ rowec. Ehuc miti biŋe qacnekicne e jambuŋkewec.
7Â fekicnezi wahakicne jambuŋkeekac i mozi mickeocmu?
8Dameŋ ʒi ŋic sisirowenezi teŋkonec wâŋ roeŋgopieŋ; ira ine juju hati mucnekicnezi rowec.
9No manape ʒiŋuc ekac, Lewi e teŋkonec wâŋ roekaczi Abrahamte bifuŋko fohuc wiac i Melikisede râcnewec;
10e mamac‐ticnere bifuŋko fohame Melikisedehec bâbâfuac epicte Abrahamzi râcneme Lewizi mâmâc râcnewec ekac.
11Lewire ɋâricfâc jaŋere taha bapa gie sâcke‐hâmozac muzac, wemocko ʒâhec taha bapa moc Melikisede ere sâcko fuazac â Aroŋte sâcko aricne? Taha bapa giere erâ ŋic ŋokac sâcmutâc dâŋ jarekicne.
12Eme taha bapa gie raŋɋane rârieha ɋâricne moc fuame, raŋɋanere sâcmutâc dâŋ iŋuc jaha râriehame ɋâricne moc fuaocmu.
13Findaŋdâŋzi ŋic rokac e taha ufuŋko gie mujarekicne jaŋere guruonec mi fuawec, e guru mockonec.
14Wofuŋ‐nâŋec e Judare tofafâc jaŋeraonec fuawec, i mana‐fâreŋgopeneŋ. Eme ŋicguru i jaŋe taha gie baniŋte Mosezi moc mi muwec.
15Erâ irec fuŋne moc taniŋke‐hâmokac wâc. Taha bapa moc Melikisedere sâcko fuaocte mukicne,
16e sahaczi fuakicnere sâcmutâc râekicne irec sâcko mâcne, juju fofo sanaŋte tâpirio taha bapa erâ juwec jukac.
17Ere hâcne dâŋ ʒiŋuc mutaniŋkekicne: “Goki Melikisede ere sâcko taha bapa juraʒihuc jucmu sanaŋ.”
18Ine hâcne sâcmutâc dâŋ mârâc mukicne i tâpirimâc â fâri tâmiric ewecte bârâriekicne.
19Sâcmutâc dâŋzi wiac moc mi emataucke‐fârewec; eme irec okacne woworic fârine bâfuakicne, izi fârec‐nâpome Anutu sâcne maickeeŋgopeneŋ.
20Ɋâricne fuawec i mumupaŋ dâŋsanaŋ tâmiric mi fuawec, raŋɋane jaŋe mumupaŋ tâmiricko taha bapa erâ jumbiŋ.
21Ɋâricne ʒi ine mumupaŋ faio taha bapa ewec jukac. Ere dâŋqâreŋ ʒiŋuc fokac: “Wofuŋzi mumupaŋ dâŋ muwec i mi beheocmu: ‘Goki taha bapa juraʒihuc jucmu sanaŋ’.”
22Fuŋne iŋucte ʒâʒâfic fârinere jâcne ewec, Jesu hâcne.
23Raŋɋane jaŋe hâmohuc tuczi tuc juwarembiŋte bocjaha juwarembiŋ.
24Ɋâricne e ine juju sanaŋ jukacte taha bapa gie‐ticne ʒuʒuhuc focnehuc juocmu sanaŋ.
25Irec ere ŋesiŋko Anutu maickeeŋgopieŋ jaŋe sâcne bâbâpiaŋko râe basanaŋ ejareekac, e juju sanaŋ jukaczi hâcne dameŋ sâc roroŋ sasape ejareekac.
26Taha bapa sâko‐nâŋec hâcne e furu, bahacmâc, ɋaɋacne, sâqocne bapa jaŋere sâcko mi juhuc qâtâcnerâ pectâc jujune, erâ samâŋ hucke‐fârewec jukac. Iŋucnezi hâcne junâreme sâcke‐hâmokac.
27E taha bapa raŋɋane jaŋe iŋucne mâcne, e sindaŋ tâmiriczi wemocko ʒoaŋne ʒoaŋne qanaŋ e jahacne sindaŋte erâ taha bâzi rikerâ ʒâhec ŋic jaŋere rikezac, e jahacne maŋ sahac i taha bâzi‐nâŋec mocjaha hâcne râeme tarawec.
28Sâcmutâc dâŋko ŋic maŋjeŋiczi dodocne jaŋe taha bapa sâko juniŋte mukicne. Eme ʒâhec ine sâcmutâc dâŋ faicnao mumupaŋ dâŋsanaŋzi Ŋokâ âkendâŋnewec. Eki hâcne maŋfuru jaha juraʒihuc juocmu sanaŋ.
