Ipru 6

1

2

3

4

5

6

7

8

9

10

11

12

13

¹Iei mine sisap chüen eäni ekewe lepoputän lessen usun Kraist, nge sipwe sopwela ren ekewe afalafal mi fich ngeni chokewe mi mirit lon ar souläng. Sisap chüen aliwinisefäli ngenikemi ewe afalafalen longolongun ach souläng usun ach aier seni ekewe föför mi lomotongau, usun ach lükü Kot,

²ekewe afalafal usun papatais me ach isetä pöüch won aramas, usun ewe manausefäl seni sotup, pwal usun ewe kapwüng esemüch.

³Iwe, iei met sipwe föri are Kot epwe mwüt ngenikich.

⁴Pun epwe ifa usun ach sipwe tongeni aliwinisefäli chokewe mi pöütala ar lükü, pwe repwe aiersefäl? Ra eäni än Kot saram me mwan, ra neni ewe lifang seni läng o angei ewe Ngünmifel.

⁵Ra silei seni mine a fis ngeniir, pwe än Kot kapas a mürina o ra mefi ekewe manamanen ewe fansoun epwe feito.

⁶Nge mürin ra pöütala ar lükü! Ese fokun tufich ach sipwe aliwinisefäliir pwe repwe aiersefäl, pun ra iräpengesisefäli ewe Nöün Kot o asäwa i me mwen mesen aramas.

⁷Kot a afeiöchü ewe pwül mi ünümi ewe üt a püngütiu won fän chomong, pwe a amärätä irä mi lomot ngeni chokewe ewe pwül a molotä fän iter.

⁸Nge ika ewe pwül a amärätä iräfölüföl me pötöwölingau, esap fokun wor lomotan. A fetal ngeni chök an epwe anümamau me ren Kot, nge feilfeil epwe karala ren ekkei.

⁹Iwe, ämi chiechiem kana mi achengicheng, inamwo ika aia eäni ekei sokun kapas, nge aia apilüköch fän itemi o silei pwe oua eäni ekewe feiöch mi kon aüchea ra nom lon ämi küna manau.

¹⁰Kot esap eäni föför esepwüng, esap manlükala ewe angang oua föri me ewe chen oua pwäri ngeni i lupwen oua alisi chiechiemi kewe souläng, nge oua pwal sopwela le alisiir.

¹¹Äm aia fokun mochen, pwe eman me eman leimi epwe chök achocho tori sopolan, pwe ekewe mettoch oua apilükülükü repwe pwönüetä.

¹²Äm aisap mochen pwe oupwe chipwang, nge oupwe wewe ngeni chokewe mi angei mine Kot a eäni pwon ren ar lükü me mosonotam.

¹³Iwe, lupwen Kot a pwon ngeni Apraham, a pwon fän akapel pwe epwe apwönüetä. Pokiten esap wor eman mi tekia seni püsin i, a akapelü püsin itan.

¹⁴A apasa, “Üpwe fokun afeiöchuk o achomongala mwirimwirum.”

¹⁵Apraham a likitü fän mosonotam, iei mine a fis ngeni mine Kot a eäni pwon.

¹⁶Are eman aramas a eäni eu akapel, a akapelü iten eman mi tekia seni püsin i. Iwe, ei akapel a alükülükü met a pwon o aükätiu än aramas anini meinisin.

¹⁷Kot a mochen afata ngeni chokewe repwe angei mine a eäni pwon pwe esap fokun siwili ekiekin letipan, iei mine a apacha an akapel ngeni mine a eäni pwon.

¹⁸Ikkei ekewe ruu mettoch resap tongeni siwil, pun esap tufich pwe Kot epwe tongeni chofona. Iei mine kich mi nom fän tümwünüan sia fokun tipepwora lon ach kamwöchünük lon ewe apilükülüköch a anomu mwach.

¹⁹Sia eäni ei apilükülüköch usun eu angkö mi allükülük o nüküchar fän iten manauach, a tolong pekilongen ewe cheech mangaku lon ewe imwenfel lon läng o tolong lon ewe leni mi unusen pin.

²⁰Fän itach Jesus a akomwolong mwach lon ewe leni o wiliti eman souasor mi lap tori feilfeilachök lon tettelin Melkisetek.