3Bona diho kahana ia lao ela bona Akarabima raka vareai gabuna, ma ela bona Sini. Bona Negebe dekena amo Iuda edia tano hetoana be Kadesi Baranea dekenai ia lao, bona Hesarona ia hanaia, ia lao ela bona Ada. Ada dekena amo ia giroa, Karaka dekenai ia lao.
4Karaka dekena amo, edia tano hetoana be Asamona dekenai ia lao, bona Aigupito ena hetoana, sinavai maragina ia badinaia, ela bona Davara Badana ena kone dekenai ia doko. Iuda taudia edia tano hetoana diho kahanai be unai.
5Edia tano hetoana dina daekau kahanai be Davara Mase ena isena, ela bona Ioridane Sinavai be unai Davara Mase lalonai ia heau vareai gabuna. Edia tano hetoana mirigini kahanai be inai Davara Mase sinavai ia heau vareai gabuna dekenai ia matamaia,
6ia lao ela bona Bete Hogila. Vadaeni Bete Arabaha ena mirigini kahana dekena amo ia lao, ela bona Bohani Rubena ena nadi.
7Unuseni dekena amo tano hetoana be Debiri dekenai ia lao, Kerere Koura dekena amo. Bona mirigini kahana dekenai ia daekau lao ela bona Gilegala, Adumimi ena raka vareai gabuna ena vairanai, koura ena diho kahana dekenai. Vadaeni tano hetoana be ma ia lao, Ene Semese ranu gabuna ia badinaia ela bona Ene Rogele.
8Ene Rogele dekena amo ma ia lao, Hinoma ena Koura dekena amo, ela bona Iebusu Ororo, ena ladana ta be Ierusalema, ena diho kahana. Unuseni dekena amo ma ia lao, ela bona Hinoma Koura unai kahana ororo ena ataiai, dina diho kahana dekenai. Unai be Repaima Koura dokona mirigini kahana dekenai.
9Unai ororo ena ataiai dekena amo tano hetoana ma ia lao, ela bona Nepetoa ranu gabuna, ma ia lao, ela bona Eparona Ororo ena hanua maragidia. Unai gabu dekena amo tano hetoana be ia diho lao ela bona Bala, ena ladana ta be Kiriata Iearimi.
10Ma Bala ena dina diho kahana dekena amo tano hetoana be ia hagegea lao ela bona Seiri Ororo. Vadaeni Iearimi Ororo, (ladana ta be Kesalono), mirigini kahana dekenai ma ia lao, ela bona Bete Semese. Unai gabu ia hanaia, bona Timuna dekenai ia ginidae.
11Ma tano hetoana be Ekarona Ororo ena mirigini kahana dekena amo ia hagegea lao, ela bona Sikerono, ma ia lao, ela bona Bala Ororo. Vadaeni Davara Badana ena kone dekenai ia ginidae, Iabinele dekenai.
12Iuda iduhu ena dina diho tano hetoana be Davara Badana ena kone. Iuda iduhu taudia edia bese ta ta dekenai idia henia tano hetoana be unai.
13Iosua ese Kaleba Iepune dekenai Iuda iduhu ena tano kahana ta ia henia, Lohiabada ese ia oda henia hegeregerena. Kaleba ena tano be Kiriata Araba. Inai Araba be Anaki ena tamana, bona iena ladana ta be Heberona.
14Vadaeni Kaleba ese Heberona dekena amo Anaki bese toi ia lulua ore, Sesai, Ahimana bona Talimai.
15Unai murinai Kaleba ese Debiri, ena ladana gunana be Kiriata Sepere ia tuari henia.
16Kaleba ia gwau, “Kiriata Sepere do ia halusia bona do ia abia tauna dekenai lauegu natuna kekeni Akisa do lau henia, iena adavana.”
17Vadaeni Otoniele Kena, Kaleba ena tadina Kena ena natuna ese Debiri hanua ia abia, vadaeni Kaleba ese iena natuna kekeni Akisa be Otoniele dekenai ia henia, iena adavana ia halaoa.
18Idia ruaosi idia headava murinai, Otoniele ese iena hahine Akisa dekenai ia hereva goada, Akisa ese iena tamana do ia noia, tano ta do ia henia totona. Vadaeni Akisa be iena tamana Kaleba dekenai ia lao. Iena doniki dekena amo ia diho neganai Kaleba ese ia nanadaia, ia gwau, “Oiemu ura be dahaka?”
19Hahine be ia haere, ia gwau, “Lau ura harihari gauna ta lau dekenai do oi henia. Guna oi ese Negebe ena tano ta lau dekenai oi henia, to ranu be lasi. Lau ura, harihari ranu gabudia danu lau dekenai do oi henia.” Vadaeni Kaleba ese ranu gabudia ia henia, atai kahanai bona henuna kahanai ranu gabudia ia henia.
20Inai tano be Iuda taudia edia bese ta ta ibounai idia abia, edia tano korikori:
21Iuda taudia edia hanua, Negebe kahanai, Edoma ena tano hetoana ena badinai, edia ladana be inai: Kabisele, Edere, Iaguru,
22Kina, Dimona, Adaba,
23Kedesi, Hasoro, Itinana,
IOSUA 15
IOSUA 15:3-23