IOSUA 13:21-33

²¹Tano palaka ena hanua ibounai be idia edia, bona Sihona, Amoro taudia edia lohia, Hesebona ena king, ena basileia ibounai. Unai Sihona be Mose ese ia halusia, ia bona Midiana lohia taudia, Evi bona Rekeme bona Suru bona Huru bona Reba. Unai be Sihona ena basileia lohia taudia, unai tano dekenai idia noho bona naria taudia.

²²Balama Beoro, ia ese gabeai do idia vara gaudia ia gwauraia tauna, be Israela taudia ese tuari kaia dekenai idia alaia, taunimanima momo danu.

²³Rubena iduhu taudia edia tano hetoana be Ioridane Sinavai ena isena. Rubena iduhu taudia dekenai Mose ese ia henia hanua badadia bona hanua maragidia be unai, edia bese ta ta ese edia ahuna idia abia, edia tano korikori.

²⁴Mose ese Gado iduhu taudia dekenai danu tano ena kahana ia henia vadaeni, edia bese ta ta dekenai edia tano ta ta ia henia, edia tano korikori ia lao.

²⁵Edia tano be Iasere, bona Gileada dekenai noho hanua ibounai, bona Amono taudia edia tano kahana, ela bona Aroere, Raba ena dina daekau kahana dekenai.

²⁶Edia tano danu be Hesebona dekena amo ela bona Ramata Misipe, bona Betonimi, bona Mahanaimi ela bona Lo Debara ena hetoana.

²⁷Ioridane Koura lalonai Gado taudia edia tano lalonai inai hanua idia noho: Bete Harama, Bete Nimera, Sukoto, Sapona, bona Sihona, Hesebona ena king ena basileia orena kahana. Gado taudia edia tano hetoana be Ioridane Sinavai ia lao mirigini kahana, ela bona Galilea Gohu, Ioridane Sinavai ena dina daekau kahanai.

²⁸Gado iduhu taudia dekenai Mose ese ia henia hanua badadia bona hanua maragidia be unai, edia bese ta ta ese edia ahuna idia abia, edia tano korikori.

²⁹Mose ese Manase iduhu kahana taudia dekenai danu tano ena kahana ia henia vadaeni, edia bese ta ta dekenai edia tano ta ta ia henia, edia tano korikori.

³⁰Edia tano be Mahanaimi dekena amo ela bona Basana ena tano ibounai, Oga, Basana ena king, ena basileia ibounai, bona Iairi ena hanua ibounai Basana lalonai, hanua ibounai 66.

³¹Gileada ena kahana danu be Manase iduhu kahana taudia edia, bona Asataroto bona Ederei, Oga ena basileia hanua badadia Basana lalonai. Unai hanua bona gabudia be Mose ese Makiri Manase ena bese taudia dekenai ia henia. Makiri iduhu kahana taudia ese inai tano idia abia, edia bese ta ta dekena amo, edia tano korikori.

³²Unai dala dekenai Mose ese Ieriko bona Ioridane Sinavai ena dina daekau kahana tano ia haria lao, Moaba ena tano palaka dekenai ia noho neganai.

³³To Mose ese tano ta Levi taudia dekenai ia henia lasi, Lohiabada, Israela ena Dirava ia oda henia hegeregerena, idia edia davana be ia, Lohiabada.