Joshuwa 13:21-33

²¹En Mosis bin gibit det klen ol detlot taun du langa det hil kantri weya det king neim Saihan bin jidan bos bifo. Mosis bin bidim King Saihan, en imbin bidim detlot faibala bosmen blanga det king du hubin jidan deya langa det kantri gulum Midiyan. Detlot faibala bosmen bin neim Ibi, Rekem, Suya, Huwa en Reiba.

²²En detlot Isreil pipul bin kilim ded det klebabalamen neim Beilam hubin san blanga det olmen neim Biyowa.

²³Wal ol detlot taun en ol detlot kantri Mosis bin gibit langa ola femili blanga Rubin klen.

²⁴Wal Mosis bin gibit sambala kantri langa Ged klen.

²⁵Imbin gibit olabat det kantri gulum Giliyad en det taun gulum Jeisa en ola najalot taun deya langa det kantri, en imbin gibit olabat haf det kantri gulum Eman raidap langa det taun gulum Eroya sanraisaid brom det taun gulum Reiba.

²⁶Det kantri blanga olabat bin go brom det taun gulum Heshban raidap langa detlot thribala taun gulum Remamispa, Betonim en Mahanaiyim raidap langa det pleis gulum Lodaba,

²⁷en brom deya imbin go sangodanwei langa det Jodan Riba raidap langa det bigwan woda gulum Leik Gelali. En Mosis bin gibit olabat detlot fobala taun langa det Jodan Riba kantri gulum Betharam, Bethnimra, Sukait en Seifan, en imbin gibit olabat haf detlot kantri weya det king neim Saihan bin jidan bos bifo.

²⁸Wal ol detlot taun en ol detlot kantri Mosis bin gibit langa ola femili blanga Ged klen.

²⁹Wal Mosis bin gibit sambala kantri langa sambala pipul brom Manesa klen.

³⁰Imbin gibit olabat ola kantri nowathwei brom det taun gulum Mahanaiyim. Imbin gibit olabat detlot kantri gulum Beishan weya det king neim Og bin jidan bos bifo, en imbin gibit olabat detlot 60 lilwan taun deya langa det kantri gulum Jaiyiya,

³¹en imbin gibit olabat haf det kantri gulum Giliyad, en imbin gibit olabat det dubala taun gulum Idrei en Eshtaroth weya det King Og bin oldei jidan. Wal ol detlot taun en ol detlot kantri Mosis bin gibit langa haf ola femili blanga det san blanga Manesa neim Mekiya.

³²Wal lagijat na Mosis bin kadimat ol detlot kantri sanraisaid brom det Jodan Riba en det taun gulum Jeriko. Imbin kadimat detlot kantri wen imbin deya langa det plein kantri gulum Moweb.

³³Wal Mosis nomo bin gibit eni kantri langa det Libai klen. Imbin gibit olabat det rait blanga dagadagat det serramoni daga, dumaji tharran na YAWEI bin gibit olabat.