HEREVA LADA-ISIDIA 21:8-24

⁸Kerere tauna ena dala na gageva-gageva, a lalo-ḡoevaḡoeva tauna ena kara na maoromaoro.

⁹Tau ta abikau ai baine noho be namo; a hereva momo hahinena ida ruma ai bae noho bou na dika.

¹⁰Kara dika tauna laumana ese dika e ura heniamu, bona dekena tauna se bogaia hisimu.

¹¹Ḡonaḡona tauna matana e hakaniamu negana ai, lalo-duhu tauna lalona e heaonegamu; aonega tauna e hadibaiamu negana ai, ena lalo-parara e habadamu.

¹²Kara maoromaoro tauna ese kara dika tauna ena ruma e itaia taomu; kara dika taudia na e hahebua tarimu.

¹³Ogoḡami taudia edia taitai se hakala henimu tauna na sibona baine tai lolololo a ta basine kamonai.

¹⁴Herahia ḡauna e heni hehunimu ese badu e laoa ahumu; bona koikoi henitaona e heni hehunimu ese badu aukana e hamanokaiamu.

¹⁵Hahemaoro ḡoevaḡoevana ese kara maoromaoro taudia na e hamoalediamu, a kara dika taudia na kudoudia e hahetahadiamu.

¹⁶Lalo-parara dalana amo e raka ohomu tauna ese mase taudia edia hebou ai baine noho.

¹⁷Moale-kava e ura heniamu tauna na baine ogoḡami; bona vine ranuna bona dehoro e ura henidiamu tauna na basine taḡa.

¹⁸Kara dika tauna na kara maoromaoro tauna ibodohilaina, bona kara koikoi tauna ese kara momokani tauna e bodohiamu.

¹⁹Tau ta tano ḡaḡaena ai baine noho be namo, a e hereva momomu bona e maumaumu hahinena ida baine noho na dika.

²⁰Kohu namo-hereadia bona dehoro na aonega tauna ena ruma ai mimia, a kavakava tauna ese e ha-orediamu.

²¹Kara maoromaoro bona hebogahisi e ḡavamu tauna ese mauri bona kara maoromaoro bona heimodai e davarimu.

²²Aonega tauna ese goada taudia edia hanua maḡuna amo e dada daemu; bona edia ruma aukana, e abidadama heniamu ḡauna, e ḡiḡia dobimu.

²³Uduna bona malana e naridiamu tauna na hekwakwanai amo e roho maurimu.

²⁴Heaḡi bona hekokoroku tauna na “gonaḡona tauna” e gwauraiamu; ia na e kara heaḡi-heaḡimu.