Proverbs 21:8-24

⁸Kari ikup ago mu ko bagara aolak mu daeldel pukakung; bare awiriya ko bagara aolak ko sinar taso mu munan ningo diram la beteso.

⁹Nika imet ining singi bitiruk mu ilak kawam ningi bager i? Mena. Aratu ale matangi siwik motam atumu bager mu terong.

¹⁰Kari memek mu inang ko kuakoyam memek bitirukko kua lagoso; ale nu bo gomang tua me ikiso.

¹¹Ikia sinar suwik sapara ko kari moar se ninguru me sinarara alo mu sinarmonko; ikia ningo ko kari bo due to, mu nu ikia ningo nunguningkiri karogo terong maukko.

¹²Yawe mu ningo se diram nunguningkiri; se nu kariimet memek nunga bagara aolak mu ari iki saposo, ale memek te nunga bitirukko.

¹³Awiriya kariimet kituwura nunga niara ko dogowa baguso, mu nu tom bo uwutatala niaruk bare kuring me ilumonko.

¹⁴Kari bo ni ko ko gomang magawuruk mu kariimet saki me karkamon la, munan ningo bo tui ale gomang te kulukuru se gomang kua kaparukko.

¹⁵Tom munan ningo mu sor ereso, mu kariimet ningo diram mu amilmilasan; bare memek betera ko kariimet alo mu nguangasan.

¹⁶Awiriya ikia ningo ko lage karowa bita taso, mu nu nama kua namoso.

¹⁷Awiriya na ningo se waen ningo no se, oil kumik palunguru se bagara amilmil mu ko kua lagoso, mu ko manga mel menaruk se nu kari kituwura ko bagarukko.

¹⁸Kariimet ningo diram mu ningo la namamon, bare kariimet diram la me bagara mu nunga memek koma tamonko.

¹⁹Kutek am sor garagarayam memek te keta bagara lagara mu terong nuam; bare gomang magara se ining singi ko imet mu ilak bagara mu mel ikup.

²⁰Kari ikia sinar ago mu inang ningo ningo ko kawam digo tuguso; bare kari sinar mena mu ko mel ningo am no maguwu lagoso.

²¹Awiriya munan ningo diram se bo kua tua ko munan mu ko kua lagoso, mu daiga bagara ningo arigiso ale nup ningo karogo lagoso.

²²Ikia sinar kari mu wonong aora bo nongorak kageraruk ale nunga sokel te ira sanamiwasan mu parusuwurok menawurokko terong mam.

²³Awiriya kuring kuamili ko sinar taso mu ikup bo me arigiso.

²⁴Numi patawura ale supuling lagara ko kari mu numi patawura ko munan me bita arigiso; noko nup mu “Patawura”.