1Yetemsi ding bakate, ne teinkemin abin ayem teinbe Kamok fian beem yuk teing dim kel mali so mali so fut tem boko, sok so einggesiliw fut mak atemsi te. Sak kawtiw i ki keko, fut beelo silelko, nam busuliw kasike, i fut be ben kel sok kin so falalko, eingge dukuliwi, ne atemsi te.
2Atebi ding bakate, Sunbin-Got em dabalakamin finik auk so mak kitil kuw gaaneko, bokolomele: “Nimin kawtiw ite mak wangweng kesomi, ki keko, fut kale silelko, busulokoliw a?”, angbei, ne atemsi te.
3Kate, abiil tikin katem so, kawin dim kale so, kawin dim beem afak so, alik alik aneng angom bi mak kawtiw ki keko, fut beelo busuko, beem dim atemokoliw kawtiw mak atin kuw banim kasike, ne amemin fian mak kesi te.
5Kelii, kak yetebiliw kunum biim mutuk ka beelote kunum mak bokonemomele: “Ku kanelom amemokolew te! Kunum makmak wiin alew so bete kuw ki keko, fut kin so sok ben kel falalsiliw fut kale sileloke te. E maka iso ganeko, kitil keko, elo de mit da kolewse kasike, em wiin mak e ‘Suda kawtiw biim kasel im alaion ete te!’, dangenaliw te. Dangeko, em wiin mak e ‘Emisik kamokim Debit em mulkis ete te!’, dangenaliw te.”, nangse te.
6Nangbe ding dim bakate, Kamokim em teinkemin abin ayem beso, finik so biliw ketket teben eisneng biso, 24 kak yetebiliw kunum biso, alik alik biim mutuk e, Siwsiw Men asiliw emdiw mak mobelei, ne atemsi te. Atemsi siwsiw beem kak dim e gesen akal ben kel, kiin akal ben kel kebelei, ne atemsi te. Siwsiw beem dim atemsi ben kel eisneng bi Sunbin-Got em ben kel finik em kiskiw ete te. E ilo kawin dim aneng aneng angom beelo yamdakabe te.
7Keko beli, Siwsiw Men be uneko, teinkemin abin ayem teinbe Kamokim beem yuk teing dim aluwbe fut beelo kulusomi,
8ketket teben finik so biliw eisneng so, 24 kak yetebiliw kunum iso, alik alik bi Siwsiw Men beem mit mewso uneko, sim bakamin eisneng so, sen kamgue eisneng so aluw de teleko, katin bukbuk angbiliwi, ne yetemsi te. Kamge eisneng be Sunbin-Got akalem wiin so galmose kunum waneng im eso weng bakabiliw weng beem kamge ete te.
9Yetemsi dim be, alik alik ka biliw angom bi bongguko, sim kikis mak siwsiw beelo kutileweko, bokolomeliw: “Kute kuw wangweng kebomi, ki keko, fut be aluwsomi, kin sok falalsiliw beelo silelokolew te! Nimtew angom? Maka i kulo keniwi, ku kuansomi, kaim buselsomi, Sunbin-Got em galmose kunum waneng im sili sili kemin beem sen yan e Sunbin-Got eso weselew kasike. Kom galmoko, weselew kunum waneng bi, kawin dim aneng aneng angom alik alik im weng amen amen so, kal amen amen so, kebiliw kunum waneng kebiliw te.
10Ku ilo kukalem gawman dim bin kunum waneng keyemeko, ilo kom am yol em kunum waneng ayem keyemsomi, “Kalew Sunbin-Got em wiin fian daolewbin kunum waneng kebina!”, yangesomi, ilo mali kawtiw im yetebin wiin so kamokim keyemselew te.”, angeko, sim kutilewbiliwi, ne yetemsi te.
11Yetebi dim bakate, yemdakamin finik banban fufu banso inkalso kawtiw teing bokolinba kis kebiliw yemdakamin finik demdem i Kamokim beem teinkemin abin ayem so, ketket teben finik so biliw eisneng so, kak yetebiliw kunum iso, alik alik biilo falal keyembiliwi, ne im bakabiliw weng mak kililomelii,
12i kitil kuw keko, Siwsiw Men beelo sim kutilewsomi, bokolomeliw: “Maka i Siwsiw Men kulo keniwi, ku kuanselew kate, kute kuw wangweng kebomi, ki kebelew kasike, kute kuw auk so, on kisol fian so, kal fian so, kitil so, kulukabelew te. Kuluko, belewi, kunum waneng i kulo kamsulbomi, kom wiin fian daokembiliw te.”, angbiliwi, ne kiliko, yetemsi te.
13Kiliko, yetebi dim bakate, abiil tikin so, kawin dim kale so, kawin dim em afak be so, okmun tem be so, aneng aneng angom alik alik biim kilkese eisneng bi sim mak bokolomeliw: “Teinkemin abin ayem teinbe Kamokim so, Siwsiw Men beso, diwkuw diwkuw nu aso biilo wangweng keyembomi, biilo yemsulbomi, biim wiin fian daoyembomi, im afak kakamoluwka!”, yangbiliwi, ne kiliko, yetemsi te.
14Yetemsomi, ketket teben finik so biliw eisneng bikati bokolomeliw: “Be feinka!”, angbiliwi, kak yetebiliw kunum ikati Kamokim beso, Siwsiw Men beso, aso im mit katin bukbuk angeko, im wiin daoyembiliwi, ne yetemsi te.
